Arhanizacyja, jakoj kiruje Šunievič, pachvaliłasia čarhovym zabojstvam — čyrvanaknižnaj rysi
U Šarkaŭščynskaj palaŭničaj haspadarcy ŭpieršyniu paśla amal sarakahadovaj zabarony na palavańnie ŭ Biełarusi była zabitaja ryś. Hety vid usio jašče ŭklučany ŭ Čyrvonuju knihu Biełarusi, ale były ministr unutranych spraŭ prałabiravaŭ praz Łukašenku dazvoł na palavańnie.
Sa zdabyćciom pieršaha trafieja pavinšavała «Biełaruskaje tavarystva palaŭničych i rybałovaŭ», jakoje ŭznačalvaje były ministr unutranych spraŭ Ihar Šunievič.
Novy siezon i novyja praviły
Z 1 kastryčnika pa 31 studzienia ŭ Biełarusi adkryty siezon palavańnia na ryś. Heta pieršy siezon paśla taho, jak vid byŭ vyklučany z poŭnaj zabarony i ŭklučany ŭ pieralik žyvioł, na jakich dapuskajecca palavańnie zhodna z Płanam kiravańnia papulacyjaj rysi ŭ Respublicy Biełaruś, zaćvierdžanym Ministerstvam pryrodnych resursaŭ i achovy navakolnaha asiarodździa.
Palavańnie dazvolenaje tolki ŭ asobnych rehijonach Viciebskaj (15 rajonaŭ), Homielskaj (14 rajonaŭ), Hrodzienskaj (2 rajony) i Minskaj (8 rajonaŭ) abłaściej.
Ryś u Biełarusi ciapier maje «binarny pryrodaachoŭny status» — jana źjaŭlajecca adnačasova palaŭničym vidam i vidam, uklučanym u Čyrvonuju knihu. Heta značyć, što zdabyča mahčymaja tolki ŭ miežach navukova abhruntavanych kvot i pad strohim kantrolem.
Pryčynaj pierahladu achoŭnaha statusu rysi i častkovaha adkryćcia palavańnia na jaje nazyvaŭsia rost papulacyi hetaha vidu.
Pavodle danych Ministerstva pryrodnych resursaŭ, na pačatak 2024 hoda ŭ krainie naličvałasia tolki 1315 asobin jeŭrapiejskaj rysi. Pry hetym aptymalnaja kolkaść dla stabilnaści vidu — kala 1520 asobin.
Łabiravaŭ Šunievič, dazvoliŭ Łukašenka
18 listapada 2024 hoda Alaksandr Łukašenka padpisaŭ ukaz № 420, jakim dazvoliŭ palavańnie na ryś i miadźviedzia ŭ asobym režymie — na padstavie płanaŭ kiravańnia papulacyjami, padrychtavanych Nacyjanalnaj akademijaj navuk.
Heta rašeńnie stała vynikam šmathadovych namahańniaŭ «Biełaruskaha tavarystva palaŭničych i rybałovaŭ» i asabista jaho kiraŭnika, Ihara Šunieviča, byłoha ministra ŭnutranych spraŭ. Šunievič nieadnarazova vystupaŭ za ŭklučeńnie rysi i buraha miadźviedzia ŭ pieralik palaŭničych vidaŭ, arhumientujučy heta nieabchodnaściu rehulavańnia ich kolkaści i praduchileńnia škody sielskaj haspadarcy.
Pry hetym častka navukoŭcaŭ z NAN Biełarusi krytykuje inicyjatyvu, padkreślivajučy, što papulacyja rysi jašče nie dasiahnuła demahrafična stabilnaha ŭzroŭniu, a sam vid praciahvaje zastavacca ŭraźlivym u asobnych rehijonach krainy.
Na ŭsich nie chopić
Biełaruskaje tavarystva palaŭničych i rybałovaŭ naličvaje kala 67 tysiač čałaviek, ź jakich prykładna 35 tysiač majuć aficyjnyja bilety palaŭničaha i rybałova. Takim čynam, na kožnuju ryś u krainie prypadaje amal 30 palaŭničych — usim nie chopić.
«Naša Niva» — bastyjon biełaruščyny
PADTRYMAĆCiapier čytajuć
«Byŭ hałodny, jak z Aśviencima, nie jeŭ ni miasa, ni harodniny». Što viadoma pra śmierć babrujskaha žurnalista, na jakoha zaviali kryminalnuju spravu ŭ Polščy1616
Kamientary
Łukašystaŭ, asobna Šunieviča, čakaje piersanalnaje piekła.