Amierykanski šatdaŭn paralizavaŭ pastaŭki zbroi: pad pahrozaj i dapamoha Ukrainie
Praz praciahłaje prypynieńnie pracy fiederalnaha ŭrada ZŠA prypynili pastaŭki ŭzbrajeńnia svaim sajuźnikam u NATA. Zamarožanyja kantrakty na pastaŭku zbroi ahulnym koštam bolš za 5 miljardaŭ dołaraŭ, jakaja mahła być pieranakiravanaja va Ukrainu.
Pra heta piša amierykanskaje vydańnie Axios sa spasyłkaj na Dziarždepartamient ZŠA.
Pavodle danych žurnalistaŭ, pad zamarozku trapili kantrakty na ahulnuju sumu bolš za 5 miljardaŭ dołaraŭ. Heta ŭ tym liku rakiety AMRAAM, sistemy supraćpavietranaj abarony Aegis i reaktyŭnyja ŭstanoŭki HIMARS, pryznačanyja dla Danii, Charvatyi i Polščy.
Axios adznačaje, što kančatkovyja atrymalniki hetaj zbroi dakładna nieviadomyja. Adnak, z ulikam dziejnaj schiemy padtrymki Ukrainy, kali krainy NATA zakupajuć amierykanskija ŭzbrajeńni i pieradajuć ich Kijevu, zatrymka moža niepasredna paŭpłyvać na ŭkrainskuju armiju.
Šatdaŭn u ZŠA pačaŭsia 1 kastryčnika 2025 hoda, kali Kanhres nie zdoleŭ uzhadnić novy fiederalny biudžet. Heta pryviało da častkovaha spynieńnia pracy dziaržaŭnych viedamstvaŭ, u tym liku Dziarždepartamienta, jaki adkazvaje za vydaču licenzij na ekspart zbroi.
Pakolki biez hetych dazvołaŭ lubyja pastaŭki niemahčymyja, ekspart amierykanskaha ŭzbrajeńnia byŭ faktyčna paralizavany. Šatdaŭn doŭžycca ŭžo bolš za 40 dzion, staŭšy samym praciahłym u historyi krainy.
Ciapier čytajuć
«Kali mnie prylacić, ja hatovaja». Nasta Rahatko — pra seks-scenu ŭ svajoj knizie, prarasijskich svajakoŭ, Hajun i Matolku60
Kamientary