U Drahičynie rajonka pachvaliłasia, što školniki zamiest telefonaŭ čytajuć jaje. Kamientatary kreatyvu nie acanili
Vydańnie «Drahičynski vieśnik» apublikavała ŭ tyktoku rolik, u jakim školniki pasłuchmiana składajuć svaje smartfony ŭ śpiecyjalnuju šafku, a paśla taho sadziacca za party i čytajuć papiarovuju hazietu. U podpisie redakcyja abviaściła pra pačatak inicyjatyvy «Hazieta zamiest internetu», jakaja nibyta budzie raspaŭsiudžvacca ŭ navučalnych ustanovach rajona, zaŭvažyła vydańnie BGMedia.
Adnak internet-supolnaść zamiest uchvaleńnia ŭspryniała heta videa ź ironijaj i paśmichańniami. Kamientatary pisali:
«Horš, čym u armii»;
«Ruchajemsia nazad u minułaje»;
«Tak, a videa ŭ internet navošta vykłali?»,
«Prahres užo nie ŭ modzie — para rehresavać u savok».
Adzin z karystalnikaŭ zaŭvažyŭ, što niejki vučań pakłaŭ u šafku nie telefon, a kalkulatar, i prymacavaŭ u dokaz hetaha skrynšot.
Mnohija ŭzhadali niadaŭni vypadak u Viciebsku, kali školnik złamaŭ ruku i nie zmoh patelefanavać maci, bo ŭ jaho zabrali telefon — heta, maŭlaŭ, pakazvaje, da čaho moža pryvieści padobnaja «dyscyplina».
Pavodle zadumy redakcyi, rolik pavinien byŭ padtrymać školnyja praviły i pakazać kaštoŭnaść drukavanych ŚMI, ale zamiest hetaha staŭ simvałam adstavańnia i nieadpaviednaści sučasnamu śvietu.
Karystalniki žartujuć, što, kab być paśladoŭnymi, aŭtaru videa taksama treba było zdać svoj telefon pierad zdymkami.
Ironija situacyi ŭ tym, što, prapahandujučy «žyćcio bieź internetu», hazieta zrabiła heta praz tyktok — adnu z samych «hadžetazaležnych» placovak.
U minskim mietro prachodziać vyprabavańni novyja ciahniki FOTY3
U minskim mietro prachodziać vyprabavańni novyja ciahniki FOTY
Rasijskaja nieanacystka, jakaja adsiadzieła 16 hadoŭ za zabojstva advakata i žurnalistki: Jon naprošvaŭsia svaimi pohladami na čačenskuju kampaniju2020
Kamientary