Pačatak słuchańniaŭ kryminalnaj spravy ŭ dačynieńni da byłoha dyrektara departamienta finansavych rasśledavańniaŭ KDK Anatola Hramoviča pa pieršaj instancyi ŭ Biełaruskim vajennym sudzie pryznačany na 21 maja, paviedamili ŭ Hienieralnaj prakuratury.
U zakrytym abo adkrytym farmacie budzie prachodzić sudovy praces, surazmoŭca ahienctva skazać nie zmoh.
Anatol Hramovič byŭ zatrymany 15 studzienia 2009 hoda. Jon padazravaŭsia ŭ atrymańni chabaru, uchileńni ad vypłaty mytnych płaciažoŭ. Hienprakuratura vystaviła jamu abvinavačańnie va ŭčynieńni złačynstva, praduhledžanaha č. 3 art. 285 Kryminalnaha kodeksa (udzieł u złačynnaj arhanizacyi słužbovaj asoby z vykarystańniem słužbovych paŭnamoctvaŭ).
Jak paviedamiŭ na pres‑kanfierencyi 6 sakavika 2009 hoda načalnik upraŭleńnia pa baraćbie z karupcyjaj i arhanizavanaj złačynnaściu Hienprakuratury Alaksandr Rakievič, «dastatkova vysokapastaŭlenyja supracoŭniki pravaachoŭnych orhanaŭ» pryciahvajucca da kryminalnaj adkaznaści pa spravie ab niezakonnym uvozie ŭ Biełaruś bujnych partyj darahich tavaraŭ pa padroblenych tavarasupravadžalnych dakumientach.
Hienieralnaj prakuraturaj ustanoŭlena, što ŭ 2000 hodzie na terytoryi krainy niekalki hramadzian Rasii i Biełarusi stvaryli złačynnuju arhanizacyju.
Jany zajmalisia niezakonnym pieramiaščeńniem z krain Zachodniaj Jeŭropy ŭ Rasiju cieraz punkt mytnaha afarmleńnia «Kazłovičy» bytavoj techniki, adzieńnia, abutku biez vypłaty ŭ poŭnym abjomie mytnych płaciažoŭ. U vyniku złačynnaj dziejnaści dziaržavie byŭ pryčynieny ŭron nie mienš jak na 20 młrd. rubloŭ. «Dla sadziejničańnia ŭ raspracoŭcy i realizacyi mier bieśpieraškodnaha pieramiaščeńnia hruzaŭ pa padroblenych dakumientach kiraŭniki złačynnaj arhanizacyi ŭciahnuli ŭ jaje dziejnaść šerah supracoŭnikaŭ KDB i mytnych orhanaŭ, — skazaŭ Rakievič. — Za chabar jany akazvali členam złačynnaj arhanizacyi sadziejničańnie ŭ supraćpraŭnym promyśle. Davali ŭkazańni padnačalenym supracoŭnikam ab niezatrymańni aŭtatranspartnych srodkaŭ i tavaraŭ, jakija pieramiaščalisia niezakonna. Supraćdziejničali praviadzieńniu apieratyŭna‑vyšukovych mierapryjemstvaŭ u dačynieńni da kiraŭnikoŭ i ŭdzielnikaŭ złačynnaj arhanizacyi, kansultavali ich».
Pakazalna, što ŭ kastryčniku 2002 hoda pad asabistym kantrolem dyrektara DFR KDK Anatola Hramoviča pravodziłasia pravierka pracy Bresckaj mytni, pavodle vynikaŭ jakoj byŭ raspačaty šerah kryminalnych spraŭ u dačynieńni da niekatorych jaje kiraŭnikoŭ.
Kamientary