Departavanyja pry pasiarednictvie amierykancaŭ palitviaźni zaviśli miž piekłam i ziamloju — biez DNŽ i mahčymaści pracavać
«Naša Niva» pahutaryła z palitviaźniami, jakich vyvieźli 11 vieraśnia 2025 hoda. Minuła bolš za dva miesiacy, ale bolšaść ź ich jašče nie atrymała dazvołaŭ na žycharstva.
Były žurnalist «Biełsata» Jaŭhien Mierkis — adzin z tych ščaśliŭcaŭ, chto ŭžo atrymaŭ svoj dazvoł na žycharstva. Jon kaža, što kali prajšoŭ miesiac z padačy dakumientaŭ, to jon atrymaŭ paviedamleńnie: termin razhladu spravy padoŭžany.
Takija ž paviedamleńni atrymali i ŭsie byłyja palitviaźni, kaho vyvieźli ŭ Litvu 11 vieraśnia.
«Heta źbiantežyła ŭsich, chto padaŭsia na DNŽ — atrymać pa chutkim treku nie vyjšła. Ale mnie na minułym tydni napisali, što maje dakumienty hatovyja i ŭ mianie jość DNŽ na try hady. Ja ŭžo zabraŭ kartku», — kaža Jaŭhien.
Ale Mierkis adzin ź niamnohich, chto dakumient atrymaŭ. Bolšaść palitviaźniaŭ, vyzvalenych 11 vieraśnia, jašče čakajuć dazvołaŭ na žycharstva.
Vital Bandaruk — adzin z tych, kamu paščaściła mienš. Jon jašče čakaje DNŽ. Raskazvaje, što svajaki adnaho ź viaźniaŭ, jakija pierabralisia ź Biełarusi ŭ Litvu paśla 11 vieraśnia, užo padalisia na DNŽ i navat atrymali svaje kartki. A voś sam toj viazień, taksama jak i bolšaść jaho kaleh pa niaščaści, usio jašče čakaje dakumient.
«Spačatku spadziavalisia, što atrymajecca zrabić dakumienty dla našaj hrupy za paru tydniaŭ. Ale ŭsio trochi zaciahnułasia, i ludzi pačali chvalavacca, što praces moža raściahnucca na niekalki miesiacaŭ».
U takoj ža situacyi i Viačasłaŭ Łazaraŭ:
«Spačatku, kali my padavalisia na DNŽ, nam skazali, što čakać budziem niedzie dva tydni. Užo prajšło bolš za dva miesiacy».
Siarod palitviaźniaŭ niamała tych, chto chacieŭ by pierabracca ŭ Polšču, ale pakul im robiać DNŽ, jany pryviazanyja da Litvy.
Samaje hałoŭnaje, što biez dazvołu na žycharstva niemahčyma ŭładkavacca na pracu i davodzicca tracić tyja srodki, jakija sabrali im biełarusy.
Niemahčyma i źniać kvateru ci pakoj na praciahły čas, a časovaje žytło kaštuje daražej. Miž tym nie tolki ŭsio minułaje zastałosia ŭ Biełarusi: tam zastałosia i žytło, a ŭ starejšych ludziej — i piensii.
Departacyja vyrvała ludziej ź piekła łukašenkaŭskich łahieraŭ, ale kinuła na čužy bierah biez aničoha — mnohich navat biez pašpartoŭ.
«Ja stolki tam pieranios dziela svaich pierakanańniaŭ i dziela Biełarusi, mnie zastavałasia siadzieć para miesiacaŭ — a tut mianie vykinuli ŭ čužuju krainu biez pašparta. Časam ja dumaju: amierykancaŭ i nas padmanuli z takim «vyzvaleńniem» u dvukośsiach. Nie treba było im na takoje «vyzvaleńnie» pahadžacca. Maja siamja — tam, ja tut, i dva miesiacy siadžu biez radzimy, biez raboty i bieź ničoha», — skazaŭ «Našaj Nivie» adzin z vyzvalenych 11 vieraśnia, jaki paprasiŭ nie nazyvać jaho dziela biaśpieki rodnych u Biełarusi.
«Žyćcio dało takuju paŭzu, kab zvyknuć da novaj realnaści. Šmat čytaju, šmat havaru. Ščaście — vysypacca i hulać kolki chočaš. Nie bajacca. Ale jak tam Biełaruś biez nas? Nam by tudy», — dadaje jon.
«Naša Niva» — bastyjon biełaruščyny
PADTRYMAĆ«Kali ŭžo siudy prylacić ukrainskaja rakieta!» Vyzvaleny žurnalist Jaŭhien Mierkis raskazaŭ pra škłoŭskuju kałoniju
«U Viciebsku zachodziŭ u tralejbus i kazaŭ «Słava Ukrainie!». Ukrainca ŭ 67 hadoŭ pasadzili za kamienty, napisanyja paśla hibieli chrosnaj dački pad abstrełam u Kijevie
Kab nie trapić na Akreścina, minčuk źbieh žyć u les — voś jaho historyja
Kamientary
V čiem problema? On možiet nie nyť, a viernuťsia nazad