Biełaruska pakinuła syna ŭ Tesla — i trapiła ŭ mihracyjnuju turmu ŭ ZŠA. Praz paŭhoda jaje narešcie vyzvalili
Biełaruska Vieranika Kazłoŭskaja, jakaja žyvie ŭ ZŠA, trapiła ŭ imihracyjnuju turmu paśla taho, jak u mai 2025 hoda pakinuła trochmiesiačnaha syna ŭ mašynie Tesla z uklučanym klimat-kantrolem, pakul razhružała rečy kala doma. Adzin ź minakoŭ paviedamiŭ u palicyju i situacyju rascanili jak pakidańnie dziciaci ŭ niebiaśpiecy. Hetaja historyja skončyłasia, prytym pazityŭna, tolki ciapier.
Paśla taho incydentu Vieraniku aryštavali, i choć prakuratura štata Fłaryda paźniej vyrašyła, što jana ni ŭ čym nie vinavataja i navat nie stała vystaŭlać abvinavačańnie, fiederalnaja mihracyjnaja słužba ICE nie adklikała pradpisańnie ab jaje zatrymańni. U vyniku žančynu pieravieźli ŭ imihracyjnuju turmu ŭ Ńju-Mieksika za bolš jak try tysiačy kiłamietraŭ ad jaje domu, apisvała historyju raniej «Lusterka».
Status Vieraniki Kazłoŭskaj u ZŠA na toj momant byŭ «na razhladzie»: u 2017 hodzie jana pryjechała razam ź pieršym mužam i padała na palityčny prytułak. Razhlad spravy zaciahnuŭsia, a taki niavyznačany status rabiŭ jaje ŭraźlivaj pierad ICE. Na dumku samoj Vieraniki, jaje historyja stała vynikam bolš žorstkaj u paraŭnańni z papiarednikami mihracyjnaj palityki administracyi Donalda Trampa.
U hetaj siamji troje dziaciej, i muž Vieraniki Rołand padčas źniavoleńnia žonki vychoŭvaŭ ich adzin. Prytym siamja sutyknułasia ź vialikimi finansavymi ciažkaściami: na advakataŭ i sudovyja vydatki pajšło 30 tysiač dalaraŭ.
Ciapier, zdajecca, u hetaj historyi adbyŭsia chepi-end: muž Vieraniki napisaŭ u fejsbuku, što jahonaja žonka narešcie vyjšła na volu.
«Kali ja ŭbačyŭ jaje fatahrafiju z samalota, kali jana siadzieła kala akna, cichaja, stomlenaja, ale žyvaja…
Kali ja zrazumieŭ, što hetyja dźviery detention-centra začynilisia za jaje śpinaj nazaŭždy…
Kali ŭśviadomiŭ, što jana dychaje volnym pavietram i znoŭ moža prosta hladzieć na nieba, mienavita tady niešta ŭnutry mianie adpuściła ŭpieršyniu za paŭhoda.
Nie pieramoha. Nie radaść. A viartańnie žyćcia», — napisaŭ Rołand.
Jon vykazaŭ padziaku za padtrymku i dapamohu Ofisu Śviatłany Cichanoŭskaj, Asacyjacyi biełarusaŭ Amieryki, Amierykanska-biełaruskamu zadzinočańniu, Siarhieju Cichanoŭskamu, daradcu Śviatłany Cichanoŭskaj pa pravavych pytańniach Leanidu Marozavu i mnohim inšym biełarusam i amierykancam.
Kamientary