«Zarobak u try razy vyšejšy, čym doma». Biełarus raskazaŭ, jak papracavaŭ u Jehipcie na budaŭnictvie AES

Za paŭhoda suma za vadu była 13 rubloŭ — na troch žycharoŭ

Vitalu 32 hady. Paśla zakančeńnia ŭniviersiteta jon pa raźmierkavańni papracavaŭ na Biełaruskaj AES, potym na minskaj budoŭli. U pačatku 2022‑ha ŭładkavaŭsia inžynieram u biełaruski filijał rasijskaj kampanii, a praz paŭhoda kiraŭnictva prapanavała papracavać u Jehipcie.

Pavialičyć

— Ź Minska da Kaira lacieli ź pierasadkaj u Maskvie. Prylatali maleńkaj kampanijaj, tamu za nami adpravili lehkavuju mašynu. Ciapier arhanizacyja ŭžo zdymaje čartar, raz na dva tydni latajuć sto-dźvieście čałaviek u aeraport u hadzinie jazdy ad haradka.

Da Madziny, dzie znachodziŭsia haradok budaŭnikoŭ, jechali 5 hadzin.

Avijabilety nam apłačvali: dva razy na hod kampiensavali pieralot tudy i nazad.

Biaspłatna davali žyllo i trochrazovaje charčavańnie ŭ pracoŭnyja dni. Płacić samim treba było tolki za elektryčnaść i za vadu. Suma za paŭhoda za vadu składała ŭ pieravodzie na biełaruskija 13 BYN, heta na ŭsich žylcoŭ. U miesiac za elektryčnaść płacili ŭ rajonie 43 BYN.

Pasialili traich biełarusaŭ u kvatery z tryma spalniami. U kvatery było ŭsio novaje, navat posud i kuchonnaje načyńnie. Hatavać sabie samastojna davodziłasia tolki pa vychadnych. Pa adčuvańniach Vitala, kvatera pieršapačatkova budavałasia dla siamji ź dziećmi, tamu što pakoi byli roznaha pamieru — u samym maleńkim źmiaščaŭsia tolki łožak, stolik i šafa.

— Pracoŭny dzień doŭžyŭsia z 8:00 da 17:00. Abied z 12:00 da 13:00.

Na abied nam pryvozili sup, jałavičynu abo kurycu z harniram, niejkuju harodninu i sadavinu.

Pavialičyć

Ranicaj da śniadanku časta była bułačka abo kruasan. Za 2,5 hady mnie hetaja ježa nie nadakučyła, tym bolš niekalki razoŭ mianiałasia kampanija, u jakoj zamaŭlali charčavańnie. Ježu pryvozili prama ŭ kantejnierach i pakidali ŭ kamiendanta; kožny prychodziŭ i pad rośpis zabiraŭ svoj nabor. Śniadanak možna było zabrać z 5:00 da 7:00, abied z 12:00 da 14:00, viačeru z 18:00 da 20:00.

Pry arhanizacyi byŭ miedpunkt i daktary, pry nieabchodnaści chvoraha adrazu dastaŭlali ŭ bližejšuju balnicu. Vitalu miedycynskimi pasłuhami skarystacca nie daviałosia, bo ni razu nie chvareŭ.

Ale niekatoryja jaho kalehi lačyli zuby — heta było biaspłatna.

Pavialičyć

Pajezdki za terytoryju haradka ŭzhadniali sa słužbaj biaśpieki

Atamnaja elektrastancyja budujecca ŭ pustyni, pobač — horad El-Dabaa z 15 tysiačami nasielnictva. Da pracy vaziŭ aŭtobus, ad budaŭničaha haradka jechali 15 chvilin.

— My žyli ŭ toj vobłaści, dzie ziamla pieršapačatkova naležała bieduinam. Miascovyja pratestavali suprać budaŭnictva atamki, tamu paŭsiul rabotnikaŭ achoŭvaje vojska.

— Zakony strohija. Spačatku dziaŭčaty jeździli na plaž u kupalnikach, miascovyja vykazvali niezadavolenaść. Bo dziaŭčaty-jehipcianki kupajucca ŭ kupalnikach, dzie cieła zakryta absalutna całkam. Na mora ja jeździŭ raz na tydzień.

Plaž płatny, Vital addavaŭ pa 200 funtaŭ, heta 14 BYN. U košt uvachodzić šezłonh, stuł, parason. Na terytoryi jość kafe, možna niešta kupić pierakusić.

Mora z abstalavanym plažam (a kupańnie dazvolena tolki na abstalavanych) znachodziłasia ŭ paŭhadzinie jazdy ad haradka, jeździli na taksi. Pa praviłach, kali chacieli źjechać za terytoryju haradka, treba było pisać słužbovuju zapisku i ŭzhadniać pajezdku sa słužbaj biaśpieki. Heta datyčyłasia ŭsich pajezdak, u tym liku i na mora. Biez uzhadnieńnia možna było jeździć tolki ŭ mahazin.

Pavialičyć

«Za adzin pachod u mahazin addavaŭ prykładna 100 rubloŭ»

Pa vychadnych aŭtobus vaziŭ zakuplacca ŭ mahazin. Vital jeździŭ raz na adzin-dva tydni.

— Sneki, naprykład čypsy Lay's, kaštavali razy ŭ čatyry nižej, čym u nas. Taja ž situacyja z šakaładkami. Ja zvyčajna kuplaŭ rybu, arechi, sadavinu, šakaład. Ceny nazavu ŭ pieravodzie na biełaruskija. Kiłahram krevietak — 30 BYN, łasoś — 45 BYN. Sadavina była nie vielmi dobraj jakaści, ale ŭ dva razy tańniejšaja, čym u nas. Za adzin pachod u mahazin addavaŭ prykładna 100 BYN.

Pieryjadyčna mahiloviec jeździŭ za pakupkami na rynak u El-Dabaa.

Ceny, adznačaje jon, pradaŭcy biaruć z hałavy, ceńnikaŭ nidzie niama.

— Kuplaŭ kožny raz banany ŭ adnaho i taho ž čałavieka. Pieršy raz na 20 funtaŭ, heta našy paŭtara rubla, jon pakłaŭ niekalki źviazkaŭ bananaŭ na 16 štuk. U nastupny raz ja daŭ užo 10 funtaŭ — atrymaŭ u dva razy mienš. Na treci raz na tuju ž sumu čamuści atrymałasia ŭsiaho tolki try banany.

Pavialičyć

Pieršapačatkova, raskazvaje Vital, na budaŭnictvie AES pracavała 2 000 čałaviek, ciapier užo 12 tysiač. Ź ich 3 000 słavian i kazachaŭ, astatnija jehipcianie. Damoŭ u haradku ciapier nie chapaje, tamu rabotnikaŭ raśsialajuć u turystyčnyja łakacyi, zdymajuć kvatery ŭ hatelnych abjektach. Kamuści šancuje žyć na bierazie mora pobač z pracaj, a kamuści treba dabiracca da pracy aŭtobusam 40—50 chvilin.

Kožny hod padymali zarobak

Na pačatkovym etapie zarobak mahiloŭca byŭ u try razy vyšejšy, čym jon zarablaŭ u Biełarusi na toj ža pasadzie.

Potym roźnica pavialičyłasia jašče bolš, tamu što praz hod zarobak padniali, jašče praz hod — znoŭ.

— Nijakich finansavych met ja sabie nie staviŭ, chaciełasia prosta adciahnucca i nie dumać ni pra jakija bytavyja rečy, bo tabie dajuć žyllo, kormiać. Praca nie była ciažkaj. Spačatku ŭładkavaŭsia inžynieram pa zvarcy, zvalniaŭsia z pasady viadučaha inžyniera.

U haradku chapała zabaŭ: trenažornaja zała, basiejn, biblijateka, mini-futbolnaje pole, paźniej źjavilisia tenisny kort i sportplacoŭka.

Možna było chadzić na zaniatki anhlijskaj, arabskaj movami, vakałam i tancami, ładzili spartakijady.

Za čas pracy Vital źjeździŭ u Aleksandryju i Kair, padarožničaŭ na Sinajski paŭvostraŭ. Pavodle jaho słoŭ, pieršapačatkova dumaŭ prapracavać dva hady, ale zatrymaŭsia krychu daŭžej.

Istotnym minusam žyćcia ŭ Jehipcie jon nazyvaje adnastajnaść. Ci vierniecca jašče tudy na pracu, pakul nie vyrašyŭ. Pakul u płanach — znajści pracu na radzimie.

• 8
• 1
• 2
• 1
• 0
• 1
• 0
• 0