U Prazie sudziać futbolnaha fanata za zamach na zabojstva biełarusa
3 śniežnia haradski sud u Prazie pačaŭ razhladać spravu 40‑hadovaha hramadzianina Čechii Piatra Zemaneka. Jamu pahražaje da 20 hadoŭ turmy pa abvinavačańni ŭ zamachu na zabojstva pa nacyjanalnych matyvach, piša Radyjo Svaboda.
Tak palicyja i prakuratura tłumačyli incydent, jaki adbyŭsia ŭ sakaviku 2025 hodu ŭ Prazie. Pavodle viersii śledstva, Zemanek tady pjanym išoŭ pa vulicy, kali ŭbačyŭ kala praduktovaj kramy dvuch mužčyn — ukrainca i biełarusa, jakija razmaŭlali pa-rusku.
Abvinavačany paličyŭ, što heta ŭkrainskaja mova, i pačaŭ abražać nieznajomcaŭ, plunuŭšy ŭ adnaho ź ich.
Pryjacieli spytali ŭ jaho, ci źjaŭlajecca jon nacyjanalistam ci rasistam. U adkaz na heta Zemanek pačaŭ uskidvać ruku ŭ nacysckim pryvitańni i kryčać «Sieg Heil» i «Heil Hitler», paviedamlaje češki partał Novinky.
Paśla jon dvojčy ŭdaryŭ biełarusa i sa słovami: «Tak, ja vas zabju. Zaraz pajdu vaźmu nož i pistalet», nakiravaŭsia ŭ svoj pakoj u internacie.
Zamiežniki pieramiaścilisia na najbližejšuju čyhunačnuju stancyju Praha-Radotín i stajali na płatformie ŭ čakańni ciahnika. Zemanek znajšoŭ ich i praciahnuŭ kryki i pahrozy. Paźniej Zemanek stuknuŭ nahoj adnaho mužčynu, a zatym pačaŭ bić kułakami druhoha, vyciahnuŭ składny nož i ŭtorknuŭ jaho biełarusu ŭ hrudzi na 10 santymietraŭ. Žyćcio paciarpiełaha vyratavała apieratyŭnaja dastaŭka ŭ špital i terminovaja apieracyja.
Padčas pieršaha sudovaha pasiadžeńnia abvinavačany pryznaŭ fakt napadu, ale adprečyŭ nacyjanalny matyŭ. Pavodle jaho słoŭ, u toj viečar jon viartaŭsia z futbolnaha matču i mocna vypiŭ (kala 10 kubkaŭ piva i butelku mocnaha ałkaholu), tamu amal ničoha nie pamiataje.
«Mnie škada, što ŭsie my akazalisia tut. Mnie škada, što heta adbyłosia. Ja adčuvaju siabie vinavatym, ale nie zhodny z pravavoj kvalifikacyjaj», — skazaŭ Zemanek.
Jon abvierh, što napaŭ na nieznajomcaŭ z-za taho, što jany zamiežniki, a spuskavym miechanizmam kanfliktu stali ŭzajemnyja abrazy.
Advakat padsudnaha dalej dapoŭniŭ, što incydent nie byŭ zamacham na zabojstva z papiarednim abdumvańniem ci nacyjanalnym ci etničnym matyvam.
«Moj klijent nikoli nie mieŭ prablem z zakonam pa rasavych ci etničnych pryčynach. U jaho mnostva znajomych i kalehaŭ siarod zamiežnikaŭ, u tym liku ŭkraincaŭ», — zajaviŭ abaronca.
Zemanek pryznaŭsia, što raniej uvachodziŭ u hrupoŭku fanataŭ pražskaha futbolnaha kluba «Sparta», ale kateharyčna adprečyŭ, što maje dačynieńnie da fašysckaha ci nacysckaha ruchu.
Akramia zamachu na zabojstva Zemanek abvinavačvajecca jašče pa dvuch artykułach — chulihanstva i vykazvańnie simpatyi da ruchu, nakiravanaha na pryhniečańnie pravoŭ i svabod čałavieka.
Jon raskajaŭsia ŭ zroblenym i adpraviŭ list z prabačeńniami paciarpiełamu. Toj u jakaści kampiensacyi za pryčynienuju škodu patrabuje 340 tysiač kron (14 tysiač jeŭra).
Hałoŭnaje pasiedžańnie pa spravie adbudziecca na nastupnym tydni.
Ciapier čytajuć
Zahinuŭ biełaruski dobraachvotnik Alaksiej Łazaraŭ12
Kamientary