Homielski zavod «Santeks» vykarystoŭvajecca jak pasiarednik pry pastaŭcy ŭ Rasiju bajavych dronaŭ
Homielski zavod emalavanaha posudu «Santeks», jaki na pieršy pohlad zajmajecca vypuskam mirnych rondalaŭ i śmietnic, akazaŭsia pasiarednikam u pastaŭkach bajavych dronaŭ u Rasijskuju Fiederacyju. Žurnalisty Biełaruskaha rasśledavalnickaha centra ŭ svaim novym rasśledavańni vyśvietlili, što praz zavod pastaŭlalisia kitajskija bieśpiłotniki DJI, jakija paśla traplali ŭ rasijskija vajskovyja struktury, u tym liku ŭ vytvorčaść dronaŭ-kamikadze VT-40 («Sudapłataŭ») dla rasijskaj armii.
Pa dakumientach, jakija ŭdałosia zdabyć žurnalistam, tolki ŭ 2022—2023 hadach «Santeks» pradaŭ u Rasiju 309 dronaŭ na sumu kala $2 młn. Kampanija supracoŭničała ź dźviuma rasijskimi firmami — TAA «Santros» i TAA «Rustakt». Apošniaja źjaŭlajecca viadučym vytvorcam bajavych FPV-dronaŭ dla rasijskich siłavych struktur i kirujecca vychadcam ź Biełarusi Paŭłam Nikicinym, jaki vałodaje bolšaściu akcyj kampanii.
«Rustakt» viadomy jak vytvorca asnoŭnych bajavych dronaŭ dla elitnaha centra «Rubikon», jaki biare ŭdzieł u rasijskich nastupalnych apieracyjach va Ukrainie. Pa danych vydańnia, tolki zakupki elektraruchavikoŭ i kampanientaŭ dla FPV-dronaŭ u kitajskich pastaŭščykoŭ za 2023—2025 hady skłali bolš za $323 miljonaŭ, što dazvalaje sabrać sotni tysiač koptaraŭ.
Ahulnaja suma pastavak rasijskim siłavym strukturam za 2023—2024 hady, uklučajučy abstalavańnie z «Santeks», pieravysiła $1,1 miljarda. Da śpisu płacielščykaŭ uvachodziać vajskovaja čaść 45807, 18‑y Centralny navukova-daśledčy instytut Minabarony Rasii, dabračynny fond «Narodny front. Usio dla pieramohi» i navukova-vytvorčaje abjadnańnie «Abuchaŭski zavod».
BRC taksama vyśvietliŭ, što Pavieł Nikicin naradziŭsia ŭ Minsku, ale pierajechaŭ u Rasiju ŭ 2000‑ch hadach, zastaŭšysia ŭładalnikam niekalkich biełaruskich firm, u tym liku homielskaha zavoda «Santeks». Jahony brat Jahor, jaki na momant rasśledavańnia jašče mieŭ biełaruskaje hramadzianstva, taksama byŭ saŭładalnikam zavodu. Abodva admovilisia kamientavać svaju dziejnaść žurnalistam.
Rasśledavańnie pakazvaje, što biełaruskija kampanii ź pieršaha dnia vajny va Ukrainie vystupajuć kanałami abychodu sankcyj na pastaŭki ŭ Rasiju. Usiaho 14 biełaruskich firmaŭ u 2022—2025 hadach pradali rasijskim siłavym strukturam bolš za 20 tysiač dronaŭ ahulnym koštam $34 miljonaŭ.
«Anlifanščyca ź Pinska» kaža, što jana nie anlifanščyca i nie ŭ rabstvie ŭ Mjanmie6
Kamientary