U centry Hrodna pradajuć kvateru ŭ domie 1880 hoda z hołymi ścienami. Kolki prosiać?
Ceny na nieruchomaść u abłasnym centry apošnim časam mocna vyraśli praź vialiki napłyŭ turystaŭ. Pahladzicie, kvateru ŭ jakim stanie pradajuć pa amal $1400 za kvadrat.
Adnapakajoŭka ahulnaj płoščaj 40 kvadratnych mietraŭ znachodzicca ŭ histaryčnym centry Hrodna pa vulicy Lenina, 3 u domie 1880 hoda pabudovy.
Vyšynia stoli ŭ joj 3,5 mietra, što, pa mierkavańni pradaŭcoŭ, moža dazvolić novym uładalnikam pry nieabchodnaści stvaryć druhi ŭzrovień (ci antresolny pavierch). Sam dom byŭ rekanstrujavany ŭ 2023 hodzie i vyhladaje prystojna, čaho nielha skazać pra stan kvatery.
U pamiaškańni niama azdableńnia ścien i stoli. U niekatorych ścienach možna ŭbačyć dzirki. Adna sa ścien, miarkujučy pa materyjale, była pabudavana značna paźniej, čym sam dom.
Miescami sa ścien vypadajuć cahliny. Takoje žyllo ŭ apisańni da abjekta nazyvajuć kvateraj z šykoŭnaj płaniroŭkaj u histaryčnym centry Hrodna. «U kvatery praviedzieny poŭny demantaž da cehły, zroblena čystavaja ściažka, ustanoŭleny jakasnyja škłopakiety, mietaličnyja ŭvachodnyja dźviery», — havorycca ŭ apisańni.
Za hetuju adnapakajoŭku, jakaja patrabuje kapitalnych inviestycyj, prosiać $55 tysiač, što składaje $1375 za mietr — pry siarednich $1080 na druhasnym rynku žylla Hrodna.
Praź niemałuju canu i abadranyja ścieny kvatera pačała nabirać papularnaść u instahramie. U kamientarach pad pastom ahienctva adzin mužčyna žartam spytaŭ, ci pradajecca jana razam z Audi A7, jakaja na fota.
Inšy mužčyna pažartavaŭ, što za takija hrošy praściej tuju Audi kupić i žyć u joj, i navat hrošy zastanucca.
Na pytańnie, čamu tak doraha, ryełtarka adkazała, što takija realii rynku nieruchomaści ŭ histaryčnym centry Hrodna.
Padrabiaźniej pra ceny na nieruchomaść u histaryčnym centry Hrodna my pisali raniej.
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki39
Kamientary