Łosik raskazaŭ pra žorstkaje zabojstva ŭ kamiery izalatara ŭ Barysavie

Eks-palitźniavoleny błohier Ihar Łosik u svaim telehram-kanale raskazaŭ žachlivuju historyju.

«Pres-chaty Biełarusi. Ujavicie, što vas zatrymlivajuć i zavoziać u izalatar časovaha ŭtrymańnia. Niachaj heta budzie Barysaŭski sumna viadomy. Była tam pieršaja kamiera, kudy trapić było vielmi niebiaśpiečna. Chacia ŭmovy ŭ kamiery cudoŭnyja: telefon, lubaja ježa, televizar, harełka, navat narkotyki. Ale traplajecie vy tudy tolki z-za niepryznańnia viny. I ŭ hetaj kamiery vas chutka pierakanajuć, što tak niapravilna. Što lepš napisać ščyraje pryznańnie, a jašče lepš uziać na siabie štości jašče z «visiakoŭ». I navat daduć zahadzia padrychtavany tekst i błank papiery. Za admovu — žorstkija paboi da taho momantu, pakul vy ŭsio nie padpišacie. A pradolnyja buduć stajać i hladzieć u adkrytuju karmušku, jak vas źbivajuć da paŭśmierci.

Ja sam nie vielmi vieryŭ, pakul nie sustreŭsia ź ludźmi, jakija ŭsio heta prajšli na ŭłasnym dośviedzie. U Žodzinie da mianie trapiŭ małady chłopiec, Jahor Bohdan, jaho zatrymali kala Dziaržynska z marychuanaj i kinuli ŭ dziaržynskuju pres-chatu.

Jaho źbili tak, što jon napisaŭ usio, što ad jaho patrabavali, słova ŭ słova. Bili tak, što Žodzinskaje SIZA jaho spačatku navat nie pryniało z-za pabojaŭ, ale mała taho, što bili, dyk jašče i prymusili patelefanavać maci i patrabavali, kab jana pieraličyła 500 rubloŭ na rachunak adnaho z «preschatčykaŭ». Paśla taho jak źbili da paŭśmierci prosta pad adkrytaj karmuškaj, za jakoj stajaŭ pradolny i naziraŭ za ŭsim i nie reahavaŭ na dzikija kryki, jaho zakinuli na «palmu» i napaili harełkaj. Ale papiery jon padpisaŭ, a kali jamu naniali advakata, toj tolki paraiŭ, što z hetym ničoha zrabić niemahčyma, što skarhi kudyści pisać biessensoŭna, tolki źjaviacca novyja prablemy. Biŭ jaho nibyta azierbajdžaniec nizkaha rostu.

Potym jašče pieryjadyčna da mianie danosilisia padobnyja historyi, u jakich fihuravaŭ hety azierbajdžaniec, jaki ŭ asnoŭnym znachodziŭsia ŭ Barysaŭskim IČU, ale časam hastralavaŭ i pa inšych.

I voś u hetym hodzie, za dzień da prezidenckich vybaraŭ, u SIZA KDB adkryvajecca dźviery i da nas prosta zakidvajuć adnaho mužyka. Uvieś sini, u kučy tatuirovak sa svastykami, pierabitymi, zavuć Viačasłaŭ Šviec, 48 hadoŭ, ź jakich 31 hod adsiedžanych. Zajechaŭ u «amierykanku» za zabojstva. Za zabojstva ŭ kamiery IČU. Vypadak davoli redki, tym bolš u takoje śpiecyfičnaje SIZA. U kalidory čujem, jak jašče bolš žorstka ŭ susiedniuju kamieru zakidvajuć jaho padzielnika. Taho samaha «azierbajdžanca» pa proźviščy Alijeŭ. Potym akazvajecca, što hety Alijeŭ u Baranavičach vučyŭsia sa mnoj u adnoj škole, i ja pamiataju jaho i jaho brata.

Siadzieli jany ŭ kamiery numar 1 u Barysavie ŭ poŭnym kamforcie i nibyta na pracy: lubaja ježa, vypiŭka, navat časam vadzili žančyn dla ŭciech, za kožnuju vybituju siłaj jaŭku atrymlivali jašče 80 rubloŭ. Tak, «kryšavali» (pavodle ich słoŭ) heta ŭsio HUBAZiK razam z kiraŭnictvam IČU. Kali było treba, zapisy z kamier vydalalisia.

Pracavali tak užo šmat hadoŭ, i voś za niekalki dzion da prezidenckich vybaraŭ 26 studzienia im zakinuli 59‑hadovaha mužčynu, jany, budučy vielmi napitymi «Mocnym areškam», unačy nastolki pierastaralisia z vybivańniem pakazańniaŭ, što da śmierci zabili hetaha mužčynu. Bili nahami, rukami i butelkaj z vadoj pa hałavie. U vyniku jon pamior. U IČU pryjechaŭ sam Kubrakoŭ, i zamiać spravu nie ŭdałosia.

Nakolki ja viedaju, kahości z načalstva IVS zvolnili, a kahości aryštavali. Chacia jany vielmi staralisia heta ŭsio zamiać i navat ukazvali Alijevu i Šviecu, jakija davać pakazańni. Ale niešta pajšło nie tak, u vyniku «preschatčyki» apynulisia ŭ KDB, a za nitku pačali ciahnuć i vyjaviłasia, što takich schiem pa krainie nie adna i nie dźvie.

Šviec i Alijeŭ spačatku navat nočču pryšpilalisia da nary kajdankami za dźvie ruki, a to raptam što. Vielmi chutka adnaho raskałoli, toj zrazumieŭ, što sensu adpiracca niama, usio trapiła na kamieru, i zapis na hety raz nie ŭdałosia schavać. Druhi supraciŭlaŭsia daŭžej, ale taksama zdaŭsia. U vyniku naźbirali pakazańniaŭ stolki, što, kali iści pavodle zakona, to vielmi šmat kryminalnych spraŭ treba pierahladać, tamu što pryznańni pa ich byli vybityja siłaj hetymi dvuma. Jany nazvali šmat proźviščaŭ: chtości jašče siadzić, chtości vyzvaliŭsia, i śledčyja pa ŭsioj krainie jeździli i brali pakazańni ŭ źniavolenych, jakich źbivała hetaja para».

• 4
• 0
• 1
• 7
• 23
• 4
• 39
• 0