U Ispanii zatrymali troch biełarusaŭ, padazravanych va ŭhonach aŭtamabilaŭ. U ich była svojeasablivaja schiema
U ispanskaj pravincyi Alikante, u miastečku Ła-Nusija kala Valensii, zatrymali troch hramadzian Biełarusi va ŭzroście kala 44—45 hadoŭ. Ich padazrajuć u kradziažy aŭtamabilaŭ, padrobcy dakumientaŭ i ŭdziele ŭ arhanizavanaj złačynnaj hrupie. Pra heta paviedamlaje miascovaje vydańnie Okdiario, piša sajt «Biełaruś i mir».
Palicyja pačała rasśledavańnie paśla taho, jak atrymała źviestki pra bandu, jakaja zajmałasia kradziažom aŭto peŭnaj marki na terytoryi pravincyi. Vyśvietliłasia, što mašyny raźbirali niedzie ŭ hetym ža rehijonie, a ich zapčastki stavili ŭ tak zvanyja «tapielcy» — aŭtamabili toj ža madeli, što paciarpieli ad pavodak paśla ŭrahanu «Dana» ŭ 2024 hodzie. Paśla hetaha atrymanyja «hibrydy» pradavali jak lehalnyja mašyny na rynku b/u ŭ inšych krainach.
Kali śledčyja akreślili troch padazravanych, jany arhanizavali za imi niehałosnaje nazirańnie. Heta pryviało da doma ŭ rajonie viłaŭ u Ła-Nusii, dzie i była abstalavanaja majsternia.
Vyśvietliłasia, što schiema vyhladała tak: złačyncy kuplali ŭ pryvatnych asob za najaŭnyja «ŭtoplenyja» aŭto siaredniaha i premijalnaha kłasa, paśla znachodzili na vulicy takuju ž madel, uhaniali jaje, niekatory čas trymali ŭ peŭnym miescy, a potym pryvozili dadomu i całkam raźbirali. Detali z uhnanaha aŭtamabila pieranosili na šasi kuplenaha va «ŭtoplenym» stanie, paśla čaho hatovuju mašynu vyvodzili na lehalny rynak.
Padčas praviedzienych pieratrusaŭ znajšli dva niadaŭna ŭhnanyja darahija aŭto: adnamu ŭžo pastavili novyja niamieckija numary, druhoje jašče raźbirali. Taksama kanfiskavali aŭtamabili samich troch padazravanych — vyjaviłasia, što jany taksama byli «tapielcami» i mieli nielehalnyja zapčastki.
U majsterni palicyja znajšła abstalavańnie dla ŭhonu: pryłady dla kłanavańnia klučoŭ, sistemy sačeńnia za aŭto, jakoje płanavali skraści, kompleksy dla pieraprahramavańnia elektronnych błokaŭ i vialikuju kolkaść klučoŭ dy dakumientaŭ da aŭtamabilaŭ tych marak, jakija fihuravali ŭ spravie.
Zatrymanych dastavili ŭ sud, dzie im abrali mieru strymańnia ŭ vyhladzie aryštu. Śledstva praciahvajecca, bo treba praanalizavać vialiki abjom dakumientaŭ, i nie vyklučana, što buduć novyja zatrymańni.
Ciapier čytajuć
Zahinuŭ biełaruski dobraachvotnik Alaksiej Łazaraŭ2
Kamientary
Krasočka jesť,MD10?