22‑hadovy Tajler Robinsan, abvinavačany ŭ zabojstvie amierykanskaha kansiervatyŭnaha aktyvista Čarli Kirka, učora ŭpieršyniu za try miesiacy paśla aryštu paŭstaŭ pierad sudom.
Suprać Robinsana sabrana šmat dokazaŭ: u jaho kvatery znajšli zapisku, u jakoj jon napisaŭ: «U mianie jość šaniec prybrać Čarli Kirka, i ja heta zrablu». Zabojstva jon taksama abmiarkoŭvaŭ u čacie ź siabrami. Akramia taho, na zbroi vyjavili jaho DNK, a ślady jaho abutku znajšli na dachu, ź jakoha byŭ zrobleny streł, nahadvaje Bild.
Jurysty miarkujuć, što advakaty Robinsana sprabujuć pierš za ŭsio vyratavać jaho ad śmiarotnaha prysudu. Kab paźbiehnuć pakarańnia śmierciu, Robinsan moža pryznać svaju vinu, što dazvolić zaviaršyć praces biez vyniasieńnia śmiarotnaha pakarańnia.
Pasiadžeńnie častkova tranślavałasia ŭ pramym efiry Fox News. Advakaty Robinsana patrabavali zabaranić zdymku ŭ zale suda i abvinavacili ŚMI ŭ «niedapuščalnych pavodzinach», bo žurnalisty zdymali dakumienty i ekrany. Na ich dumku, praźmiernaja ŭvaha presy moža parušyć prava Robinsana na spraviadlivy sudovy praces. ŚMI ž śćviardžajuć, što hramadskaść maje prava viedać usie padrabiaznaści.
Robinsan uvažliva sačyŭ za pasiadžeńniem, siedziačy za stałom abarony. Jon vyhladaŭ adnačasova zacikaŭlenym i spakojnym — u błakitnaj kašuli, halštuku i kajdankach.
Nastupnaje pasiadžeńnie pryznačana na 29 śniežnia.
***
31‑hadovy Čarli Kirk, kansiervatyŭny błohier i aktyvist, 10 vieraśnia byŭ zabity strełam u šyju. U hety momant Kirk vystupaŭ va ŭniviersitecie štata Juta. Tramp nazvaŭ złačynstva «žachlivym».
Kirk ličycca adnym z tych, chto dapamoh Respublikanskaj partyi ZŠA i samomu Trampu zaručycca padtrymkaj vialikaj kolkaści maładych vybarcaŭ na prezidenckich vybarach 2024 hoda.
Ciapier čytajuć
Jak u halečy śpivałasia radnia Łukašenki? Małaviadomyja fakty6
Kamientary