Siońnia adbudziecca sud nad Siarhiejem Kavalenkam

7 studzienia siabar KCHP BNF Siarhiej Kavalenka vyviesiŭ bieł‑čyrvona‑bieły ściah na hałoŭnaj jołcy Viciebsku. Za heta jaho vinavaciać u złosnym chulihanstvie. Jaho taksama vinavaciać u tym, što jon akazaŭ supraciŭ milicyjantam padčas zatrymańnia. Pavodle dvuch kryminalnych artykułaŭ, Siarhieju Kavalenku pahražaje da 5 hod abmiežavańnia voli.

Sud pa kryminalnych abvinavačańniach suprać Siarhieja Kavalenki budzie adbyvacca 12 traŭnia «z druhoj sproby». Pieršapačatkova praces byŭ pryznačany na 20‑ha krasavika, ale ŭ toj dzień jon tak i nie adbyŭsia. Aficyjnaja pryčyna pieranosu pracesu — toje, što ŭ pryznačanaha sudździ Jaŭhiena Burunova byli pilnyja asabistyja cpravy.

Adnak adnadumcy aktyvista nie vyklučajuć, što praces pieranieśli praz toje, što kala Kastryčnickaha rajsudu sabrałasia šmat achvotnych padtrymać Siarhieja Kavalenku. A jon sam, padychodziačy da sudu, razharnuŭ na vačoch u prysutnych vialiki bieł‑čyrvona‑bieły ściah.

Hetuju akcyju paličyli chulihanstvam, i 21 krasavika Siarhieju Kavalenku prysudzili 7 sutak aryštu. Udzielnikami niesankcyjanavanaha pikietu byli pryznanyja taksama siabar aktyvista Taras Surhan i małodšy brat Vital Kavalenka. Abodva chłopcy taksama adsiedzieli «sutki».

Siarhiej Kavalenka ŭpeŭnieny, što i hetym razam adnadumcy pryjduć padtrymać jaho — 10.30, Kastryčnicki rajonny sud:

«Kaniešnie, pryjdzie šmat narodu. Tamu što biełarusy mocnaja, śmiełyja ludzi. Hodnyja. I ŭsie, chto hodny i śmieły, pryjduć mianie padtrymać!»

Siarhieja Kavalenku buduć sudzić pavodle abvinavačvańniaŭ u złosnym chulihanstva. Jon moža atrymać da 5‑ci hod abmiežavańnia voli. Sam Kavalenka kateharyčna nia zhodny z takim abvinavačvańniem:

«7‑ha studzienia ja ŭźniaŭ ściah na hałoŭnaj haradzkoj jołcy. I heta była palityčnaja akcyja, a nie chulihanskaja. Chulihanskaj jana była b, kab ja kahości abraziŭ, źbiŭ ci papsavaŭ majomaść. A takoha nie było, tamu ŭsio heta — chłuśnia. Ja chacieŭ pakazać ludziam, jaki ŭ nas pryhožy, pravilny ściah — bieł‑čyrvona‑bieły».

Viciebskaha siabra KCHP BNF taksama buduć sudzić pavodle artykułu 363 — za supraciŭ milicyjantam, jakija jaho zatrymlivali.

Z materyjałaŭ kryminalnaj spravy, jakija składajuć try tamy, aktyvist daviedaŭsia, što troje milicyjantaŭ ‑‑ padpałkoŭnik Andrej Ivanoŭ, małodšy siaržant Maksim Maksimaŭ i staršy siaržant Vasil Palityka — patrabujuć ad jaho jašče j kampensacyi maralnaj škody ŭ pamiery 10 miljonaŭ kožnamu. Jany ćvierdziać, što apazycyjaner ich publična abražaŭ.

Siarhiej Kavalenka dvojčy źviartaŭsia ŭ Kastryčnicki rajsud, kab raspačać spravu suprać hetych supracoŭnikaŭ milicyi za toje, što jany nanieśli jamu paškodžańni. Ale dvojčy sud jamu ŭ hetym admoviŭ.

Za čas śledztva, jakoje viałosia z taho samaha 7 studzienia, Siarhiej Kavalenka byŭ spačatku zatrymany, a potym źmieščany ŭ śledčy izalatar na dva miesiacy.

Praŭda, praź niekalki dzion jaho adtul vyzvalili pad padpisku ab niavyjeździe. Apazycyjaner prajšoŭ psychijatryčnuju ekspertyzu, u jahonaj kvatery byŭ praviedzieny pieratrus. U dziaržaŭnych hazetach byli nadrukavanyja artykuły, dzie ŭčynak Siarhieja Kavalenki apisvali jak złačynny. U hazecie «Viciebski rabočy», da prykładu, apazycyjanera nazvali «mutantam, jakomu miesca ŭ kletcy zaaparku».

• 0
• 0
• 0
• 0
• 0
• 0
• 0
• 0