Łukašenka śćviardžaje, što da pieramoŭnaha pracesu pa Ukrainie dałučyli Biełaruś
Palityk upeŭnieny, što kanflikt va Ukrainie, jak i ŭsie inšyja, rana ci pozna zavieršycca miram. Pra heta jon zajaviŭ u intervju amierykanskaj televizijnaj kampanii Newsmax, piša BiełTA.
«Lubaja vajna zakančvajecca miram. Kłasika. I hetaja vajna skončycca miram. Čym raniej, tym mienš zahinie ludziej. Ja časta kažu pa-mužčynsku: viedajecie, nu zahinuŭ i zahinuŭ, a kolki skalečanych ludziej z hetaj vajny viartajecca! Ź imi jak być? Biez noh, biez ruk», — skazaŭ jon.
Łukašenka adznačyŭ, što kali b pytańnie mirnaha ŭrehulavańnia zaležała tolki ad prezidenta ZŠA Donalda Trampa, to z ulikam jaho ciapierašniaj palityki vajna ŭžo daŭno b skončyłasia. Ale heta šmatbakovy praces.
«Tut jość jašče dva baki kanfliktu — Rasija i Ukraina. Nu i nas ža tudy jašče dałučyli — Biełaruś. My miažujem z hetym kanfliktam, i nam taksama nie abyjakava, jak tam buduć raźvivacca padziei i čym heta skončycca. I adzin Tramp hetaje pytańnie nie vyrašyć», — zajaviŭ Łukašenka.
Jon raskazaŭ, što jašče ŭ telefonnaj razmovie z Donaldam Trampam pierad jaho sustrečaj z prezidentam Rasii na Alascy ŭ žniŭni hetaha hoda papiaredžvaŭ: treba naładžvacca na ciažkuju pracu, bo z naskoku vyrašyć hetuju prablemu nie atrymajecca.
«Ja tady paraiŭ jamu, kab jon prykłaŭ usie mahčymyja namahańni, kab damovicca z Rasijaj ab spynieńni vajny», — skazaŭ jon.
Łukašenka ličyć važnym «zamarozić hety kanflikt ad pačatku da kanca» — spynić bajavyja sutyknieńni tak, kab u Rasii nie było naściarožanaści, što hety čas moža być prosta vykarystany dla pieraŭzbrajeńnia Ukrainy:
«Zrabić tak, kab nichto nie byŭ naściarožany, što voś my spynili kanflikt (u toj pieryjad, kali Rasija pieramahaje, heta sapraŭdy tak)… Kab u Rasii nie było naściarožanaści ŭ hetym płanie, treba zrabić usio, kab Ukraina i jaje armija nie pieraŭzbrojvalisia ŭ hety čas, kab amierykancy nie pastaŭlali tudy zbroju razam ź jeŭrapiejcami».
U hetym kantekście jon nahadaŭ pra «kryvadušnuju pazicyju jeŭrapiejskich palitykaŭ», kali ŭ Minsku ŭ 2015 hodzie byli dasiahnuty mirnyja damoŭlenaści pa Ukrainie.
«Kali b tady jeŭrapiejcy nie zaniali durnuju pazicyju… A jany chacieli zrabić tak, kab u ŭkraincaŭ, jak potym zajaviła Anhieła Mierkiel, byŭ čas pieraŭzbroicca i dać adpor Rasii. Akazvajecca, nie pra mir siudy pryjechali damaŭlacca, a pra budučuju vajnu, — skazaŭ Łukašenka. — Damova tady była zaklučana. Pasiarednikami, možna skazać, byli jeŭrapiejcy — Hiermanija i Francyja. Čym heta skončyłasia? Ničym. Ja tady prapanoŭvaŭ, što ŭ hetuju kampaniju treba ŭklučyć amierykancaŭ, biez Amieryki nijakaha tam miru nie budzie. Kali b tady byli realizavanyja pahadnieńni, jakija byli dasiahnuty tut, u Minsku, vajny b nie było».
Alaksandr Łukašenka pierakanany, što kali b Donald Tramp u toj čas uznačalvaŭ ZŠA i pravodziŭ svaju ciapierašniuju palityku, jon nie zastavaŭsia b u baku, i vajny, chutčej za ŭsio, udałosia b paźbiehnuć.
Razvažajučy pra toje, jak u ciapierašnich umovach kanfliktujučym bakam dasiahnuć miru, pAlaksandr Łukašenka vykazaŭ mierkavańnie, što da hetaha padšturchnie situacyja, jakaja składvajecca vakoł.
Naprykład, jon nie vyklučyŭ, što eskałacyja moža pryvieści da mabilizacyi ŭ Rasii.
«Heta budzie dobra dla Rasii? Nie budzie dobra, — adznačyŭ Łukašenka. — Nu što, rasijanam padabajecca, što idzie vajna? Viadoma, nie».
«Pavinny być harantyi. Rasija choča harantyj, kab heta było nazaŭsiody. Ja heta viedaju. Rasija choča zaklučyć taki mirny dahavor, kab nikoli bolš vajna nie pačynałasia. U hetym zacikaŭlena i Ukraina. Tramp hatovy vystupić harantam hetaha. Usio jość. Tamu treba paskorycca», — skazaŭ Łukašenka.
Kamientary
Murło ty škłoŭskaje! Ničoha mužčynskaha ŭ ciabie niama. Podły i brudny zabojca