13‑ty źjezd Partyi BNF projdzie 29 maja

Niečarhovy, 13‑ty, źjezd Partyi BNF projdzie 29 maja ŭ Pałacy kultury Minskaha traktarnaha zavoda, paviedamiŭ lider partyi Alaksiej Janukievič. Pavodle jaho słoŭ, dazvoł Minharvykankama na praviadzieńnie źjezda ŭžo atrymany.

Hałoŭnaje pytańnie, jakoje vynosicca na źjezd, — vyznačeńnie farmatu ŭdziełu partyi ŭ prezidenckich vybarach 2011 hoda. U pryvatnaści, zaznačyŭ Janukievič, źjezd pavinien vyznačycca, ci treba partyi vyłučać svajho pretendenta abo sumiesna ź inšymi palityčnymi strukturami padtrymlivać na prezidenckich vybarach adzinaha demakratyčnaha kandydata.

Častka členaŭ Partyi BNF pryniała rašeńnie admovicca ad udziełu ŭ źjeździe. Jak paviedamiŭ staršynia Minskaj haradskoj arhanizacyi partyi Viktar Ivaškievič, ich nie zadavalniajuć kvoty i miechanizm vyłučeńnia delehataŭ na źjezd, jakija nie dajuć mahčymaści niekatorym členam partyi ŭpłyvać na jaho rašeńni.

U adpaviednaści z rašeńniem sojma Partyi BNF ad 18 krasavika pieravažnaje prava na ŭdzieł u źjeździe buduć mieć členy partyi, jakija brali ŭdzieł u miascovych vybarach u jakaści kandydataŭ u deputaty. U pryvatnaści, im dadziena prava zaprasić na źjezd troch čałaviek, jakija brali aktyŭny ŭdzieł u ich vybarčaj kampanii.

«My budziem ličyć mierapryjemstva 29 maja schodam asobnych členaŭ Partyi BNF. Ich rašeńni, u tym liku nakont padtrymki na prezidenckich vybarach taho ci inšaha kandydata, my nie budziem ličyć abaviazkovymi dla siabie», — skazaŭ Ivaškievič.

Janukievič źviazvaje kanflikt u partyi z pazicyjaj papiaredniaha namieśnika staršyni Vincuka Viačorki. «Jon dahetul nie moža pryniać lehitymnaje rašeńnie źjezda ab novym kiraŭnictvie. Jon chacieŭ vykarystać praviadzieńnie źjezda dla ŭziaćcia revanšu», — zajaviŭ Janukievič.

Palityk taksama padkreśliŭ, što ab raskole ŭ partyi razmova nie idzie. Pavodle jaho słoŭ, ab kanflikcie «ŭsie zabuduć praź niekalki tydniaŭ paśla praviadzieńnia źjezda».

Ivaškievič nie pahadziŭsia z pazicyjaj Janukieviča nakont sprobaŭ uziać revanš z boku papiaredniaha kiraŭnictva Partyi BNF.

«Heta niapraŭda. My nie stavim pytańnie pieraabrańnia kiraŭnictva partyi, vychadu ź jaje, stvareńnia alternatyŭnaj partyi, — skazaŭ jon. — Ale ŭ suviazi z tym, što Janukievič nie choča kansultavacca z častkaj členaŭ partyi, my ličym mahčymym samastojna vyznačycca nakont našaha ŭdziełu ŭ prezidenckich vybarach i padtrymki taho ci inšaha kandydata».

• 0
• 0
• 0
• 0
• 0