Jak Łukašenka lacić u Havanu?

Pavodle infarmacyi z aficyjnych krynic, apoŭdni na Kubu vylecieła biełaruskaja delehacyja na čale z Alaksandram Łukašenkam. Jana voźmie ŭdzieł u samicie Ruchu niedałučeńnia. Pakul Biełaruś tam pradstaŭlaje ministar zamiežnych spraŭ Siarhiej Martynaŭ. A tak zvanymi «prezydenckimi» dniami, kali słova dajecca kiraŭnikam dziaržavaŭ, zhodna z rehlamentam samitu, ličacca dva apošnija dni forumu – 15 i 16 vieraśnia.

Palot ź Miensku da Havany zvyčajna zajmaje 13 hadzin. Specyjalisty ćvierdziać: prezydencki «Boinh-737» nie raźličany na biespasadačny palot ź Miensku da stalicy Kuby. Hramadzianskich rejsaŭ ź Miensku u Havanu niama naahuł. Tamu balšynia biełarusaŭ karystajecca samalotami, jakija latajuć z Maskvy dvojčy na tydzień. Prynamsi, tak vymušany byŭ dabiracca da stalicy Kuby i kiraŭnik zamiežnapalityčnaha viedamstva Biełarusi.

Rasiejskija samaloty na šlachu da Havany robiać jak minimum adnu dazapraŭku ŭ Paryžy, Frankfurcie-na Majnie albo Amsterdamie. Adnak kiraŭniku biełaruskaj dziaržavy, jak viadoma, zabaronieny ŭjezd u krainy Eŭraźviazu i ZŠA.

Specyjalisty nazyvajuć dva mahčymyja aeraporty, dzie moža časova spynicca prezydencki «Boinh» – Barbados albo Kanarskija vyspy – apošnija, darečy, aŭtanomnaja abščyna Hišpanii.

Za hadzinu da pryznačanaha vyletu biełaruskaj aficyjnaj delehacyi ja źviazaŭsia pa telefonie z kiraŭnikom presavaj słužby prezydenta Biełarusi Paŭłam Lohkim. Pacikaviŭsia, dzie planujecca pramiežkavaja pasadka prezydenckaha «Boinhu» na jahonym šlachu u stalicu Kuby? Kiraŭnik presavaj słužby adkazaŭ:

(Lohki: ) «Hetaje pytańnie budzie vyrašanaje. Nie chvalujciesia».

Cikava, što biełaruskija ŭłady zahadzia paviedamili pra namier Alaksandra Łukašenki lacieć na Kubu ŭładam Złučanych Štataŭ Ameryki. Pra heta jašče 31 žniŭnia skazaŭ vykanaŭca abaviazkaŭ ambasadara ZŠA ŭ Biełarusi Džanatan Mur na sustrečy z hrupaj žurnalistaŭ niedziaržaŭnych medyjaŭ. Jon tady adznačyŭ, što hetaja tema abmiarkoŭvajecca. Siońnia ŭ ambasadzie ZŠA ničoha novaha da hetaj infarmacyi nie dadali.

Padobnaja prablema ŭžo paŭstavała viasnoju, kali na Kubu lacieŭ premjer Siarhiej Sidorski. Tady razam ź im źbiralisia lacieć kiraŭnik idealahičnaha ŭpraŭleńnia Administracyi prezydenta Aleh Pralaskoŭski j kiraŭnik Biełdziaržteleradyjokampanii Alaksandar Zimoŭski, jakija taksama ŭvachodziać u śpis «nieŭjaznych». Na hetaj padstavie ŭłady Kanady admovili biełaruskamu samalotu ŭ dazapraŭcy, a Iślandyja, dzie mierkavałasia zrabić pieršy prypynak, zhodu davała, ale pry ŭmovie, što Pralaskoŭski j Zimoŭski zastanucca ŭ salonie samalota. Urešcie abodva vymušanyja byli zastacca ŭ Miensku. Jak vynik, toj rejs byŭ zatrymany na hadzinu, a samalot dalacieŭ da Havany tranzytam praz ZŠA (nahadajem, što premjer Sidorski nie ŭvachodzić u «čorny śpis»).

Darečy, na zvarotnym šlachu samalot Sidorskaha ŭ amerykanskim Bostanie nie pryniali, spasłaŭšysia na toje, što biełaruski bok parušyŭ damoŭlenaść pra pryznačany čas prylotu ŭ Bostan. I tady samalot premjera pahadzilisia pryniać dla dazapraŭki na Barbadosie i Kanarskich vyspach.

• 0
• 0
• 0
• 0
• 0
• 0
• 0
• 0