Takuju adnosna siensacyjnuju zajavu jon zrabiŭ učora, 18 maja.
Padčas učorašniaj narady ŭ pytańniach raźvićcia pryvatnych haspadarak Alaksandar Łukašenka pryznaŭsia, što ŭ volny ad prezydenckich spraŭ čas sam viadzie asabistuju haspadarku.
Pry hetym Łukašenka ŭdakładniŭ, što trymaje karovu. Maŭlaŭ, jak i dla sotniaŭ tysiač biełarusaŭ, dla jaho karova — karmilica. Vidać, pieradusim dla małodšaha syna Mikałaja, jakomu karysna ŭžyvać naturalnaje małako, a nie małočny napoj z kramy:
«Ja, naprykład, jary prychilnik raźvićcia pryvatnych padsobnych haspadarak. I nia tolki jak prezydent, ale i asabista. U mianie karova jość. Heta dla dušy. Tamu što ziamla ŭvohule robić vysakarodnym čałavieka, a žyvioła — tym bolš… Vielmi pravilna chtości zaŭvažyŭ, što heta i vychavańnie.
Kali dzicia ź dziacinstva krucicca tam, dzie jość skacina, ‑‑ heta zusim inšy čałaviek. Karova ŭ maim žyćci (dy i mnohich vašych) — heta duša siamji. Jana karmiła ŭsich. My ludzi takija…».
Da ŭłady Alaksandar Łukašenka taksama pryjšoŭ u «supravadžeńni» karovy: u 1994‑m honar i, jak akazałasia, «duša siamji» — Miłka — była amal takim ža papularnym hazetnym persanažam, jak i novaabrany prezydent.
Adnak najvyšejšy dziaržaŭny status nia daŭ mahčymaści ŭtrymlivać karmilicu nadalej: nieŭzabavie dom Łukašenkaŭ u Ryžkavičach byŭ uziaty pad uzmocnienuju vartu, a Halinie Radzivonaŭnie ŭ statusie pieršaj łedzi było nie z ruki siadzieć pad karovaj. Urešcie Łukašenki byli vymušanyja pradać svaju lubimicu.
Dzie prapisanaja spadkajemka Miłki — Łukašenka nie ŭdakładniŭ. Prezydenckaja pres‑słužba hetaksama nie paviedamlaje asabistych faktaŭ z žyćcia kiraŭnika dziaržavy, da jakich, naturalna, adnosicca i chatniaja haspadarka prezydenta. Varyjantaŭ dyślakacyi karovy №1 niašmat.
Pieradusim, heta žyłaja rezydencyja ŭ Drazdach na ŭskrajku Miensku dy asučaśnienaje lecišča ŭ Astrašyckim haradku. Na karyść pieršaha varyjantu śviedčyć pieradača z cyklu «Formuła ŭłady», padrychtavanaja letaś rasiejskim žurnalistam Michaiłam Husmanam.
Na televizijnych kadrach — elitnaja specbryhada, jakaja kosić travu ŭ rezydencyi. Na čale kalony sam Łukašenka, za im — syny Viktar i Dźmitryj, biznesoviec Juryj Čyž, bijatlanist Siarhiej Bułyhin, eks‑kapitan tenisnaj zbornaj Siarhiej Ciacieryn, chakiejny specyjalist Michaił Zacharaŭ. Zabiaśpiečyć takimi siłami adnu karovu — sprava niachitraja. Darečy, u adnym ź interviju Michaił Zacharaŭ raskazaŭ, što ŭ Drazdach piać paloŭ, jakija ŭ sezon davodzicca kasić ledźvie nie štodnia: pakul dojdzieš da apošniaha, na pieršym znoŭ trava ŭ pojas.
Ekspert u halinie sielskaj haspadarki, akademik Ivan Nikitčanka navinoj pra prezydenckuju karovu ašałomleny:
«Dzie jon jaje trymaje, u Drazdach? I sam, napeŭna, doić? (śmiajecca). U vioscy kłopat pra karovu kładziecca na plečy haspadara i haspadyni. Haspadar siena rychtuje, haspadynia kormić i doić jaje. Ale ž u Łukašenki farmalna haspadyni niama, značyć, jon i siena kosić, i doić?…
Ale dumaju, što ŭsio heta — jak i mnohaje ŭ jahonym vykanańni: uviečary skazaŭ, a ranicaj zabyŭsia, što napiaredadni naploŭ. Niesurjozna heta ŭsio. Jon, mabyć, svaim prykładam chacieŭ padšturchnuć da taho, kab ludzi ažyvili pryvatnyja haspadarki.
Ale ž vioska abiaźludnieła! Chto budzie pracavać? Spačatku ŭsie pačynańni zadušyli, a potym šturchać nadumalisia? Niama ŭžo kaho šturchać. Blef usio heta… Vy ž pamiatajecie, jak Łukašenka raskazvaŭ, što byŭ «fermeram». Mahčyma, ale tolki ŭ tym vypadku, što za saŭhasny košt siejaŭ bulbu na dziaržaŭnych paletkach, haspadarka za joj dahladała, a potym zdavali ŭ rajpo i atrymlivali hrošy va ŭłasnyja kišeni. Takoje «fermerstva» pry kancy 1980‑ch u nas sapraŭdy praktykavałasia siarod kiraŭnikoŭ haspadarak».
Zrešty, napačatku 2000‑ch praktyčna ŭ centry stalicy rychtavałasia miesca dla karovy prezydentavaj maci.
Za niekalki metraŭ ad praspektu Pieramožcaŭ pry pavarocie na Drazdy dla Kaciaryny Trafimaŭny byŭ zbudavany nievialiki katedž z abaviazkovym viaskovym atrybutam — chlavom. Adzin z budaŭnikoŭ raskazvaŭ, što ŭ chlavie byŭ abstalavany stajak dla karovy. Adnak nieŭzabavie plany źmianilisia — trymać karovu sapraŭdy vyhladała zanadta avanturna. U vyniku padłohu azdobili plitkaj, a miesca ŭ stajaku zaniaŭ milicyjant. A kab nie sumavaŭ, jamu pastavili televizar.
Kamientary