Žyvy repartaž z «Džynsavaha festu»

Pavialičyć

19:42

Zhortvajuć scenu.

Valantery źbirajuć śmiećcie.

Ludzi masava razychodziacca.

Na raźvitańnie dali fajerverk.

Brus Ŭilis tak i nie pryjechaŭ

19:40

Adzin z arhanizataraŭ festu Mikałaj Chalezin našamu reparcioru: «Aficyjnaja pryčyna, jak nam paviedamili, – upaŭ rubilnik.

— A što nakont raniejšych zajavaŭ, što fest adbudziecca navat biez elektryčnaści?

— Ja vam mahu tolki skazać adno: zdavajcie bilety, idzicie dadomu – vam viernuć usie hrošy.

19:34

Sa sceny abvieścili, što kancertu ŭžo nia budzie. Kulinkovič pavitaŭ moładź. Muzyki, jakija rychtavalisia da vystupu, začachlajuć instrumenty. Ludzi pačynajuć razychodzicca.

19:31

Adklučeńnie śviatła, vyśviatlajecca, nie było zaplanavanaje. Arhanizatary źviarnulisia ŭ administracyju rajonu, dzie im adkazali, što ŭ ich śviatło jość, i jany nia viedajuć, jakija prablemy. Hienerataraŭ na miescy niama. A času, kab ich padvieźci, nie zastajecca. Tamu, mahčyma, kancert na hetym skončycca. Nahadajem, što kahadzie adzin z arhanizataraŭ festu Viktar Ivaškievič zajaviŭ litaralna nastupnaje: Samaje vialikaje, što mohuć zrabić nam na złość, – vymknuć elektraenerhiju padčas kancertu. Ale, treba skazać, što na minułych mierapryjemstvach vystupali i biez stacyjanarnaha padłučeńnia enerhii.

19:20

Hledačy kala sceny ŭzdymaciuć čorna-biełyja zdymki źnikłych palitykaŭ i siońniašnich palitviaźniaŭ — kala sotni partretaŭ roznych farmataŭ. Trymajuć zapalenyja źnički. Z boku vulicy Bahdanoviča niečakana ŭsčynajecca fajerverk. Mahčyma, adklučeńnie śviatła i fajerverk – tyja samyja siurpryzy, jakija abiacali arhanizatary.

19:13

Źnikła elektryčnaść.

19:12

U blic-interviju «NN» lidar «Nejra-Dziubiela» Alaksandar Kulinkovič skazaŭ, što vielmi rady, što hetak šmat narodu, asabliva moładzi. Tut sabrałasia samaja pravilnaja moładź. Skazaŭ, što spadziajecca hetym razam na dobry huk.

Užo vystupili «Parason», «Čyrvonym pa biełym». Zaraz na scenie «Krama».

Sa sceny pavitali adnaho z hledačoŭ, jaki pryjechaŭ na fest u invalidnym vazku.

Nad natoŭpam źjavilisia ściahi z čyrvonaj ružaj.

19:03

Karystalnik Žyvoha Časapisu vykłaŭ u svaim dziońniku fatanarys: Džynsavy Fest: Dakancertnaja častka.

18:56

Na fest dazvaniŭsia Finkievič, pieradaŭ vitańni sabranym. Jamu zładzili avacyju. Nad natoŭpam źjaviŭsia nacyjanalny ściah, bieł-čyrvona-biełyja parasony. Jość taksama maleńkija ściahi Ŭkrainy.

18:44

Na scenie načalnik mienskaha AMAPu Jury Padabied. Jon zajaviŭ, što i siarod udzielnikaŭ festu jość pjanyja. Skazaŭ, što jon supracoŭničaje z družynaj festu – ludźmi ź biełymi paviazkami. Pažadaŭ udačy.

Adzin z arhanizataraŭ festu Źmicier Bandarenka zajaviŭ našamu reparcioru, što prapanova pra ačapleńnie vakoł festu była vyklikanaja tym, što pjanyja pravakatary ŭsčynajuć bojki, čaplajucca da ludziej. Prynamsi, jość užo dva fakty takich pavodzinaŭ. Hetym i było abhruntavanaje źjaŭleńnie dadatkovych siłaŭ milicyi na feście.

Pavodle jahonych acenak, zaraz na feście kala 10 tysiač hledačoŭ.

18:34

Paviedamlajuć pra zatrymańni pa perymetry akcyi – jak pjanych, tak i tych, chto z symbolikaj. Bandarenka na scenie: «Hańba AMAPu»! Zaklikaje stvaryć ačapleńnie vakoł hledačoŭ kala sceny, kab praduchilić zatrymańni. Zaraz na scenu idzie čałaviek z racyjaj...

18:33

Radyjo Svaboda pieradaje pieršyja kadry z «Džynsavaha festu».

18:24

Da sceny padjechaŭ aŭtobus z tanavanymi šybami. Adtul vyjšła ź dziasiatak milicyjantaŭ u čornaj formie. Ź ichnych pieramovaŭ stanovicca zrazumieła, što im zahadana «raźbiracca» z tymi, u kaho niezarehistravanaja symbolika. Tym časam racyi šypiać i z-pad kurtak niekatorych «cyvilnych» z symbolikaj džynsavaha festu.

Kancert praciahvajecca.

18:07

Pačynajecca kancert. Jaho adkryvaje hurt «Parason».

18:04

Vystupaje Milinkievič. Dziačyć moładzi za jejnuju rolu ŭ revalucyi.

Uvohule, adznačaje naš reparcior, z vusnaŭ usich pramoŭcaŭ sa sceny hučać ahulnyja zvykłyja lozunhi.

Ludzi troški pačynajuć sumavać ad sucelnaha mitynhu i čakajuć kancertu.

Pravakatary taksama ścišylisia biez uvahi videakameraŭ i čytajuć ulotki festu.

Paśla vystupu Milinkieviča čakajecca pačatak kancertnaj častki.

17:48

Źjaviłasia hrupa pravakataraŭ – pjanych ludziej, jakija ledźvie stajać na nahach. Za imi idzie aperatar ź vialikaj kameraj. Kali ludzi paklikali družynu festu, vialikaja kamera źnikła, zamiest jaje źjavilisia «cyvilnyja» z maleńkimi kamerami i filmujuć chto adkryta, a chto potajki z-pad kurtki. Družyńniki skazali, što ŭ ich mała siłaŭ dla takoj hrupy. Zaraz pravakatary hurtujucca kala sceny.

17:33

Vystupiŭ Mikita Sasim u džynsavaj kašuli. Mienavita Mikita pieršy ŭźniaŭ džynsavuju kašulaju jak ściah, paśla čaho i pačaŭsia džynsavy ruch u Biełarusi.

U hety momant pramaŭlaje Ihar Marynič, arhanizatar ruchu za svabodu palitviaźniaŭ.

Raspaŭsiudžvajucca čutki, što kancert nibyta admienieny. Viadoŭcy ŭ źviazku z hetym abvieścili, što kancert pačniecca nieŭzabavie. Ludziej užo sabrałasia bolej, čym na minułym kancercie.

17:20

Stała viadoma, chto dakładna budzie siońnia vystupać. Heta «Krama», «Tavaryš Maŭzer», «Čyrvonym pa biełym», «Parason».

U blic-interviju «NN» lider pradprymalnikaŭ Valer Levanieŭski raskazaŭ, što pradprymalniki dapamahali ŭ arhanizacyi festu: aformili scenu, ustalavali niekalki prybiralniaŭ, pryviali ludziej.

Prachodzić zapis u valanterskija ruchi, siarod jakich asobna – ruch Milinkieviča.

Viadoŭcy abvieścili sa sceny, što byŭ zatrymany 12-hadovy chłopiec, jaki biaspłatna razdavaŭ hazetu pra «Džynsavy fest».

17:13

Ad praprymalnikaŭ vystupaje Valer Levanieŭski. Viadučyja, dajučy jamu słova, adznačyli, što pradprymalniki vielmi dapamahli arhanizavać fest i «siońnia jany tut z nami».

17:04

Vystupaje «Svabodny teatar».

Pierad hetym byli začytanyja listy žonki Hančara i pryvitalny list Daškieviča, jaki jon pieradaŭ praź siabroŭ, z-za krataŭ.

16:46

Źjaviłasia infarmacyja, što na padychodzie da płoščy Banhałor ludzi ŭ formie i cyvilnym čaplajuca da junakoŭ, zadajuć pytańni, ci jany za Łukašenku i zatrymlivajuć tych, chto kaža “nie”.

Z škołaŭ čytačy-nastaŭniki paćviardžajuć infarmacyju pra prymusovyja dyskateki.

16.25

Na hety momant na «Džynsavym feście» sabrałasia kala dźviuch tysiačaŭ hledačoŭ i ludzi praciahvajuć padychodzić. Pa niekatorych źviestkach, u rajonie praviadzieńnia festu zakrytyja niekatoryja maršruty hramadzkaha transpartu. Pastupaje taksama infarmacyja, što ŭ rajonie Akademii navuk, dzie pieršapačatkova planavaŭsia zbor udzielnikaŭ, prachodziać zatrymańni adpaviedna apranutych ludziej z symbolikaj i značkami.

U natoŭpie łunajuć pieravažna ściahi Miensku. Mnohija trymajuć bieł-čyrvona-biełyja ściahi na plačach.

Scena ŭsia abciahnutaja džynsam. Vystaŭlenyja fatazdymki źnikłych aktyvistaŭ. Na scenie try ściahi Miensku i adzin Eŭraźviazu.

Zaŭvažanyja muzyki hurtoŭ «Krama» i «Tavaryš Maŭzer», a taksama ŭdzielniki «Svabodnaha teatru» i biełaruskija palityki: Bandarnenka, Sańnikaŭ, Vajtovič i inšyja.

Zaraz vystupiła 17-hadovaja Valeryja Krasoŭskaja.

Milicyi ŭ formie amal nie vidno, u asnoŭnym zaŭvažanyja «supracoŭniki ŭ cyvilnym».

Huk na paradak lepšy, čym na minułym kancercie.

Arhanizatary papiaredžvajuć nie ŭžyvać ałkahol i nie palić. Taksama było papiaredžańnie pra mahčymyja zatrymańni za vykarystańnie nacyjanalnaj symboliki.

• 0
• 0
• 0
• 0
• 0
• 0
• 0
• 0