U Rasii vykrali apazicyjaniera, jaki ź sinim viadrom na hałavie zalez na aŭto FSB
Moładzievy aktyvist Leanid Nikałajeŭ staŭ šyroka viadomy paśla adčajnaha pierformansu na Kramloŭskaj uźbiarežnaj.
Moładzievy aktyvist Leanid Nikałajeŭ staŭ šyroka viadomy paśla adčajnaha pierformansu na Kramloŭskaj uźbiarežnaj.
U Maskvie nieviadomyja vykrali moładzievaha aktyvista Leanida Nikałajeva. Małady čałaviek prasłaviŭsia ŭ internecie rolikam, na jakim jon, nadzieŭšy na hałavu siniaje viadro, pieraskokvaje aŭtamabil ź śpiecsihnałami na Kramloŭskaj uźbiarežnaj. Pa słovach sustaršyni maskoŭskaha adździaleńnia ruchu «Salidarnaść» Usievałada Čarnazuba, siońnia a 9-j ranicy, kali Nikałajeŭ vychodziŭ sa svajho doma na pracu, šlach jamu zastupili dva aŭtamabila. Nieviadomyja ŭ cyvilnym zapichnuli apazicyjaniera ŭ mašynu i źjechali ŭ nieviadomym kirunku. Jak pakazaŭ Čarnazub sa spasyłkaj na maci Nikałajeva, raniej ranicaj da ich u dom prychodziła milicyja, ale dźviery jany nie adčynili.
U adnym ź intervju Nikałajeŭ, jaki ŭvachodzić u palitradu maskoŭskaj «Salidarnaści», pryznaŭsia, što jaho nalot na mašynu, prypisanuju da FSB, byŭ nie tolki art-pierformans, ale i apazicyjnaj akcyjaj. «FSB zdajucca takimi strašnymi, niepieramožnym hihantami, — zajaviŭ jon «Svabodnaj presie». — A tut — uziać tak, pobač z Kramlom paviesialicca, pažartavać nad imi, i nie mieć paśla hetaha nijakich nastupstvaŭ». Akcyja z «sinim viadziercam» była arhanizavana ŭ minułuju niadzielu art-hrupaj «Vajna», viadomaj svaimi epatažny akcyjami.
Heta nie pieršy pierformans z vykarystańniem viadziercaŭ siniaha koleru. U krasaviku ŭ Maskvie prajšła masavaja akcyja, skiravanaja suprać sinich mihałak na słužbovych aŭto. Udzielniki akcyi načapili na svaje transpartnyja srodki sinija viadziercy, jakija imitavali śpiecsihnał čynoŭnickaha transpartu.
Ciapier čytajuć
Jakaja łohika sudoŭ za Hajun? Mužčyna, jakoha zatrymlivali pa hetaj spravie, apisaŭ ubačanaje23
Kamientary