Minenierha RF ličyć cikavymi prapanovy Alaksandra Łukašenki pieradać Rasii kantrolny pakiet akcyj hazatranspartnaha pradpryjemstva «Biełtranshaz» u abmien na tanny haz, a taksama pradać doli ŭ biełaruskich naftapierapracoŭčych zavodach u abmien na biaspošlinnuju naftu. Pra heta viečaram 27 maja zajaviŭ žurnalistam ministr enierhietyki RF Siarhiej Šmatko.
Niekalkimi hadzinami raniej prezident Biełarusi padčas rabočaj pajezdki ŭ Mahiloŭ zajaviŭ: «Voś kali jany (Rasija. — BiełaPAN.) skažuć, što buduć pa ŭnutranych cenach pradavać haz u Biełaruś — na roŭnych umovach i pa ŭnutryrasijskich cenach — my nie suprać, biarycie kantrolny pakiet. Hetak ža i pa naftapierapracoŭčych zavodach. Tannaja nafta — dobryja ŭmovy, ale nie biaspłatna».
Kamientujučy słovy Łukašenki, kiraŭnik Minenierha RF zaŭvažyŭ, što «pytańnie 51% nie vyrašaje sutnaści prablemy».
«Bo tam biełarusy zabirali častku prybytku «Biełtranshaza»,— cytuje ministra RIA Novosti. Šmatko nahadaŭ, što hetaja prablema źviazana z unutrykarparatyŭnym kiravańniem paśla tranšu, što pieraličyŭ «Hazpram», jaki vałodaje 50% «Biełtranshaza».
Razam z tym rasijski ministr padkreśliŭ, što hetaja tema moža abmiarkoŭvacca. «Heta dobry, pazityŭny sihnał», ale takija pytańni, pavodle słoŭ Šmatko, «pavinny surjozna abmiarkoŭvacca, treba ličyć ekanomiku pytańnia». «Hetyja pytańni treba vyrašać u miežach Adzinaj ekanamičnaj prastory», — miarkuje kiraŭnik Minenierha RF.
Zaraz «Hazpromu» ŭ SP «Biełtranshaz» naležać 50%.
U adpaviednaści z čatyrochhadovym kantraktam pamiž «Hazpromom» i «Biełtranshazam», Biełaruś z 2011 hoda pavinna apłačvać 100% roŭnadachodnaj siaredniejeŭrapiejskaj cany na haz — za vylikam ekspartnaj pošliny i transpartnych vydatkaŭ.
Pavodle infarmacyi «Hazproma», kantraktnaja cana na haz dla Biełarusi składaje 169 dalaraŭ za tysiaču kubamietraŭ, adnak Biełaruś płacić 150 dalaraŭ, z‑za čaho ŭźnikła zapazyčanaść, jakaja dasiahnuła, pavodle źviestak «Hazproma», da 1 maja 192 młn. dalaraŭ.
Aficyjny pradstaŭnik «Hazproma» Siarhiej Kupryjanaŭ pakul ustrymaŭsia ad kamientaryjaŭ z nahody prapanovy Łukašenki. Raniej rasijski vice‑premjer Ihar Siečyn vykazaŭ upeŭnienaść u tym, što Minsk vykanaje svaje kantraktnyja abaviazacielstvy pa canie zakupki hazu, i skazaŭ, što Rasija naŭrad ci pojdzie na abmiežavańnie pastavak hazu Biełarusi.
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža31
Kamientary