Čym skončyłasia historyja ź mierkavanym lasnym katom na Paleśsi, jaki apynuŭsia ŭ kapkanie

Miarkujučy pa zdymkach, jakija trapili tady ŭ internet (paźniej jany byli vydalenyja), heta moh być paŭmifičny lasny kot, jakoha daŭno šukali biełaruskija zaołahi i entuzijasty. Praź niekalki hadzin kot, jaki siadzieŭ na łancuhu (i, mabyć, byŭ surjozna traŭmavany), źnik: nibyta źbieh. Onliner.by źviarnuŭsia ŭ Dziaržinśpiekcyju achovy žyviolnaha i raślinnaha śvietu z prośbaj prakamientavać situacyju. I voś pryjšoŭ adkaz.

Nahadajem, kaliści lasny kot vadziŭsia na našaj terytoryi, ale ličycca, što apošni ekzemplar byŭ zabity palaŭničym u 1927 hodzie. Pra jaho ničoha nie było čuvać da 2017 hoda, kali padobnaja žyvioła była źniataja fotapastkaj u biełaruskaj častcy čarnobylskaj zony. Biełaruskija i zamiežnyja śpiecyjalisty tady syšlisia, što heta, chutčej za ŭsio, jon i jość, ale dla aficyjnaj rehistracyi takoj vyjavy akazałasia niedastatkova.

Pavialičyć

A 16 červienia 2025 hoda padazravany trapiŭ na barsučuju kamieru ŭ nacparku «Prypiacki». Tut užo ciažka sumniavacca.

Jaho potym doŭha sprabavali vyličyć, znajści bijałahičnyja ślady, ale pośpiechu nie damahlisia.

14 sakavika, jak miarkujecca, lasnoha kata vyjavili ŭ vioscy Dziaržynsk, dzie da hetaha byli zahryzienyja niekalki kurej. Kapkan pakidali, mahčyma, u raźliku na kunicu ci charka, ale trapiła ŭ jaho inšaja žyvioła. A potym dziŭnym čynam źnikła — razam z łancuhom, jakim hety kapkan byŭ pryšpileny da žerdki.

Dziaržinśpiekcyja nakiravała śpiecyjalistaŭ na miesca. Na zapyt Onliner pryjšoŭ adkaz: ahledžanyja haspadarčaja pabudova i prylehłaja terytoryja, apytanyja śviedki i asoby, jakija majuć śpiecyjalnyja viedy ŭ bijałohii.

Taksama paviedamlajecca: «Na terytoryi, prylehłaj da haspadarčaj pabudovy, znojdzieny kapkan, pry hetym fakta znachodžańnia žyvioły ŭ kapkanie nie ŭstanoŭlena, a pošuki na blizkaj terytoryi nie prynieśli stanoŭčych vynikaŭ».

Bijałahičnych materyjałaŭ (poŭści, kryvi i t. d.) taksama nie znojdziena, a značyć, paćvierdzić, što ŭ kapkan trapiŭ mienavita lasny kot, nie ŭjaŭlajecca mahčymym, adznačyli ŭ Dziaržinśpiekcyi. U toj ža čas u viedamstvie znajšli parušeńni z boku žychara vioski:

«U suviazi z ustanaŭleńniem prykmiet ažyćciaŭleńnia palavańnia biez naležnaha na toje dazvołu ŭ zabaronienym miescy ŭ dačynieńni da vinavataj asoby pryniaty miery ŭździejańnia ŭ adpaviednaści z častkaj 1 artykuła 16.27 Kodeksa Respubliki Biełaruś ab administracyjnych pravaparušeńniach».

Zhodna z artykułam 16.27, palavańnie biez naležnaha na toje dazvołu, albo ŭ zabaronienych miescach, albo ŭ zabaronieny čas, albo zabaronienymi pryładami, albo zabaronienymi sposabami, albo ŭ zabaronienyja terminy ciahnie nakładańnie štrafu ŭ pamiery ad dziesiaci da tryccaci bazavych vieličyń z kanfiskacyjaj ruž, inšych pryład palavańnia i inšych pradmietaŭ, jakija źjavilisia pryładaj albo srodkam ździajśnieńnia pakazanaha parušeńnia, abo biez kanfiskacyi i z pazbaŭleńniem prava zajmacca peŭnaj dziejnaściu.

• 0
• 0
• 0
• 4
• 0
• 3
• 0
• 0