«Efiekt viečnaha leta». U Biełarusi ŭžo ŭ kancy krasavika dzie-nidzie rastuć padasinaviki
Pakul Biełaruś zasynaje śniežnym krupami, a sady, što tolki pačali ćviści, nakryvajuć zvarotnyja zamarazki, ad biełaruskich hrybnikoŭ prychodziać nievierahodnyja naviny — dzie-nidzie źjavilisia pieršyja padasinaviki. Takoj niečakanaj znachodkaj dniami padzialiŭsia ŭ sacsietkach prafiesijny hrybnik i błohier Alaksandr Harbacevič, zaŭvažyła vydańnie Telegraf.news. «Hrybnuju anamaliju» jon patłumačyŭ łakalnym «efiektam viečnaha leta».
Pieršyja padasinaviki da siabie ŭ košyk Harbacevič u hetym siezonie pakłaŭ nadzvyčaj rana — 24 krasavika. Niahledziačy na ŭvieś svoj bahaty dośvied, takoje rańniaje źjaŭleńnie hetaha vidu ździviła navat prafiesijanała.
Jak praviła, padasinaviki źjaŭlajucca bližej da siaredziny červienia i pładanosiać tryma asnoŭnymi chvalami. Samaja pieršaja i, jak praviła, niešmatlikaja chvala ŭ našych šyrotach moža startavać u pačatku červienia (tak zvanyja «kasaviki»). Masavy zbor padasinavikaŭ prypadaje na lipień-žnivień, a samym bahatym na ŭradžaj pieryjadam ličycca treci zbor — ź siaredziny žniŭnia pa vierasień.
24 apriela 2026 Biełaruś PODOSINOVIKI! ☢️
Źjaŭleńnie padasinavikaŭ u krasaviku Harbacevič nazvaŭ «anamalijaj», ale joj znajšłosia racyjanalnaje tłumačeńnie. Akazałasia, što hryby źjavilisia nie na randomnaj lasnoj palancy, a nad ciepłatrasaj. Mienavita jana stvaryła ŭ hetym miescy «efiekt viečnaha leta» — tak jaho nazvała śpiecyjalistka z Akademii navuk Biełarusi.
«Micelij padasinavika, jaki ŭ normie čakaje prahrevu ziamli da kanca maja abo pačatku červienia, atrymlivaje sihnał ab pačatku siezona značna raniej. Pastajanny prahreŭ ad trub imituje ŭmovy pačatku leta, zapuskajučy praces farmiravańnia pładovych cieł, jak tolki sychodzić śnieh. Viasnoj hleba maksimalna nasyčanaja vilhaćciu ad śniehu, jaki rastaje. Spałučeńnie vysokaj vilhotnaści i ciapła ad ciepłatrasy stvaraje efiekt parnika», — patłumačyła śpiecyjalistka.
Pavodle jaje słoŭ, takija «anamalnyja miescy» mohuć źjavicca kala ciepłatras, dzie rastuć asiny i biarozy, ale tolki ŭ tym vypadku, kali ŭ dreŭ užo sfarmiravany simbijoz z hrybnym micelijem.
Darečy, svoj pieršy viasnovy «ŭłoŭ» Harbacevič adnios na pravierku ŭ łabaratoryju. Vyprabavańni pakazali, što krasavickija padasinaviki absalutna čystyja z punkta hledžańnia radyjeaktyŭnaha zaražeńnia.
Kamientary