ES źbirajecca uzmacnić mižnarodny cisk na Rasiju paśla ŭdaraŭ «Arešnikam»
«Rasija zajšła ŭ tupik na poli boju, tamu teraryzuje Ukrainu naŭmysnymi ŭdarami pa centrach haradoŭ».
Kiraŭnica jeŭrapiejskaj dypłamatyi Kaja Kałas rezka adreahavała na čarhovy masiravany ŭdar Rasii pa haradach Ukrainy, uklučajučy prymianieńnie balistyčnaj rakiety siaredniaj dalokaści «Arešnik». Pra heta jana napisała ŭ sacyjalnaj sietcy X.
Pavodle słoŭ Kałas, Maskva pajšła na hety krok z-za niaŭdač na froncie:
«Rasija zajšła ŭ tupik na poli boju, tamu teraryzuje Ukrainu naŭmysnymi ŭdarami pa centrach haradoŭ».
Palityk padkreśliła, što takija ataki nakiravany mienavita suprać mirnaha nasielnictva, i nazvała ich «ahidnymi aktami teroru, zaklikanymi źniščyć jak maha bolš mirnych žycharoŭ».
Asobnuju ŭvahu Kaja Kałas źviarnuła na vykarystańnie rasijskimi vojskami najnoŭšaha rakietnaha kompleksu:
«Paviedamleńni ab vykarystańni Maskvoj balistyčnych rakiet siaredniaj dalokaści «Arešnik» — sistem, pryznačanych dla pieranosu jadziernych bojehałovak, — heta taktyka palityčnaha zapałochvańnia i nierazvažlivaje jadziernaje bałansavańnie na miažy».
Kiraŭnica dypłamatyi ES taksama anansavała surjozny adkaz z boku jeŭrapiejskich krain. Jana paviedamiła, što na nastupnym tydni ministry zamiežnych spraŭ krain Jeŭrasajuza źbiarucca razam, kab abmierkavać, «jak uzmacnić mižnarodny cisk na Rasiju».
Kamientary