Pavieł Łatuška adkazaŭ na zaklik Kaleśnikavaj: Jak pieramahčy rak, kali jaho nie lačyć?
Kiraŭnik NAU adkazaŭ Maryi Kaleśnikavaj na jaje prapanovu spynić zmahańnie z režymam. Palityk ličyć taki padychod iłžyvym i niebiaśpiečnym, bo niemahčyma vyratavać krainu, ihnarujučy taho, chto skraŭ jaje svabodu, jak niemahčyma vylečyć ankałohiju bieź źniščeńnia rakavych kletak.
Nahodaj dla šyrokaj palemiki stała niadaŭniaja zajava eks-palitźniavolenaj Maryi Kaleśnikavaj na kanfierencyi GLOBSEC u Prazie. Jana prapanavała jeŭrapiejskim partnioram novuju stratehiju, jakaja zaklučajecca ŭ tym, kab nie zmahacca z Alaksandram Łukašenkam, a skancentravacca vyklučna na baraćbie za ludziej. Paśla taho jak hety padychod raskrytykavali Alaksandr Fiaduta i Siarhiej Navumčyk, da dyskusii dałučyŭsia Pavieł Łatuška.
Nižej pryvodzim tekst Paŭła Łatuški całkam.
Zmahacca suprać dyktatury ≠ zmahacca za svabodu?
Vy viedajecie, što ja starajusia paźbiahać vostraj krytyki pradstaŭnikoŭ i pradstaŭnic demsił. Ja addaju pieravahu nie nazyvać imionaŭ u publičnych dyskusijach i apaniravać, nie atakujučy. Prytrymlivajučysia apošniaha, ja ŭsio ž vymušany adkazać pavažanaj Maryi Kaleśnikavaj publična.
Bo, na moj pohlad, jaje apošniaja, taksama publičnaja, zajava ab tym, što nie treba zmahacca z dyktataram Łukašenkam, zmahajučysia za ludziej, za svabodu i svabodnyja vybary — heta značyć, za demakratyju — źmiaščaje ŭ sabie niešta bolšaje, čym prosta prapanovu «novaj stratehii» dla demsił i našych mižnarodnych partnioraŭ. A mienavita — padmienu paniaćciaŭ i iłžyvy pasył.
Pačniom z padmieny paniaćciaŭ. Vyjavić jaje nieskładana, kali pastavić pierad saboj tolki adno pytańnie: a chto ž adabraŭ u ludziej svabodu i svabodnyja vybary?
Jany ž nie vyparylisia sami saboj, a 2020 hod dakładna pakazaŭ, što biełaruski narod u svajoj pieravažnaj bolšaści nie admoviŭsia ad ich sam i dobraachvotna.
Svabodu ŭ biełarusaŭ adabraŭ Alaksandr Łukašenka i jahony piersanaliscki dyktatarski režym, jaki jon stvaryŭ. Stvaryŭ praz palityčnyja zabojstvy, praz masavyja represii, praz žorstkaje padaŭleńnie pratestaŭ i abapirajučysia na padtrymku Rasii.
Mienavita hety čałaviek, mienavita takim čynam utrymlivajučy ŭładu ŭsie hetyja hady, adabraŭ u biełarusaŭ pravy i svabody i adabraŭ va ŭsioj krainy mahčymaść być demakratyčnaj jeŭrapiejskaj dziaržavaj, pabudavaŭšy zamiest hetaha ŭžo praktyčna tatalitarnuju dyktaturu, jakaja realizuje represii ŭ takich maštabach, jakich sučasnaja Jeŭropa nie viedała mnohija dziasiatki hadoŭ.
Svaboda biełarusaŭ nie źnikła sama, nie rastvaryłasia ŭ pavietry prosta tak. Masavyja represii nie iduć sami saboj, jak doždž ci śnieh.
Miaža Biełarusi z Ukrainaj u lutym 2022 hoda nie adkryłasia sama saboj dla ŭvarvańnia ruskich u hetuju krainu ź biełaruskaj terytoryi, jakaja taksama nie sama siabie im dla hetaha pradastaviła. Ekanomika i pramysłovaść Biełarusi nie pačali raptam sami saboj pracavać na vajnu suprać Ukrainy. Jak i nie pryjechała ŭ Biełaruś samo, na aŭtapiłocie, rasijskaje jadziernaje ŭzbrajeńnie i zrabiła našu krainu mišeńniu na karcie Jeŭropy.
Ničoha z hetaha nie adbyłosia samo pa sabie. Za ŭsimi hetymi padziejami staić kankretny čałaviek, jaho zahady, rašeńni, dziejańni. I jaho imia Alaksandr Łukašenka. Dyktatar. Zabojca. Vajenny ahresar i złačynca.
Na dumku Maryi, ź im nie treba zmahacca. Treba zmahacca za ludziej i za svabodu. I voś heta — iłžyvy pasył. I niebiaśpiečny, kali da jaho prysłuchacca i ŭziać za kiraŭnictva da dziejańnia. Čamu?
Davajcie ŭjavim sabie, što pry lačeńni čałavieka, jaki maje ankałohiju, niechta prychodzić i kaža: «nie zmahajciesia z rakavymi kletkami, zmahajciesia za zdarovyja». Abo što padčas lasnoha pažaru niechta prapanuje nie zmahacca z ahniom, a zmahacca za drevy.
I ź niejkaj pryčyny daktary ci pažarnyja vybirajuć kiravacca hetymi paradami. Da čaho heta pryviadzie — vidavočna. Chvory na rak čałaviek — pamre. Les — zharyć.
Siońnia naša kraina chvoraja na rak pa proźviščy Łukašenka. Naša kraina achoplenaja pažaram pad nazvaj režym Łukašenki.
I ja chaču spytać: ci sapraŭdy zmahacca z chvarobaj — nie raŭnaznačna zmahacca za zdaroŭje i žyćci ludziej, jakija ad jaje pakutujuć? A zmahacca z ahniom — nie raŭnaznačna zmahacca za achopleny im dom, u jakim my žyviom?
Jak pieramahčy rak, kali jaho nie lačyć? I jak pieramahčy pažar, kali jaho nie tušyć? Dać siabie zabić i spalić datła?
Kali my pojdziem prapanavanym šlacham, to sieryjny zabojca praciahnie zabivać, a my i dalej budziem chavać achviar jaho złačynstvaŭ.
Zmahacca suprać Łukašenki nie aznačaje admovu ad baraćby za ludziej, za ich svabodu.
Žyvie Biełaruś? Ci niachaj zahinie?
Jak ličycie?
Kamientary