Raskryta sietka biełaruskich špijonaŭ pad dypłamatyčnym prykryćciom
Abjadnańnie byłych siłavikoŭ BELPOL apublikavała maštabnaje rasśledavańnie pra sietku biełaruskich śpiecsłužbaŭ za miažoj, vyjaviŭšy bolš za sto supracoŭnikaŭ KDB i HRU, što pracujuć pad dypłamatyčnym prykryćciom u amal saraka krainach śvietu.
Pradstaŭniki BELPOL śćviardžajuć, što častka apublikavanych źviestak adnosicca da 2024—2025 hadoŭ i atrymana z unutranych krynic. Ahułam u materyjale nazvana kala šaścidziesiaci mierkavanych raźviedčykaŭ i apisany mietady ich ukaranieńnia ŭ sistemu Ministerstva zamiežnych spraŭ, pierakazvaje rasśledavańnie partał «Lusterka».
Pavodle viersii abjadnańnia, usia hetaja dziejnaść kaardynujecca praz Upraŭleńnie dypłamatyčnaj biaśpieki MZS. Jaho načalnikam nazvany Usievaład Hłuškoŭ, jaki raniej udzielničaŭ u dypłamatyčnych misijach u Litvie, Łatvii, Polščy i Francyi. Siarod kiraŭnikoŭ padraździaleńnia taksama zhadvajucca namieśnik načalnika ŭpraŭleńnia Andrej Šviec, jaki nibyta pracavaŭ pad prykryćciom u Litvie, Hiermanii i Polščy, zahadčyk siektara ŭłasnaj biaśpieki Aleh Bujkievič i kiraŭnik siektara śpiecyjalnaj suviazi Viktar Kamienieŭ.
Rasśledavalniki adznačajuć, što častka supracoŭnikaŭ ukaraniajecca ŭ sistemu MZS jašče ŭ maładym uzroście i buduje karjeru jak zvyčajnyja dypłamaty. Inšyja ž pierachodziać u dypłamatyčnyja struktury paśla niekalkich hadoŭ słužby ŭ KDB ci HRU, atrymlivajučy pasady daradcaŭ, sakrataroŭ, ataše abo supracoŭnikaŭ konsulstvaŭ. Niekatoryja karystajucca śpiecyjalnymi pašpartami z vydumanymi imionami i bijahrafijami. Adna z najbujniejšych hrup, jak havorycca ŭ materyjale, była vyjaŭlena ŭ Bielhii, dzie znachodziacca štab-kvatery Jeŭrasajuza i NATA. Pavodle dadzienych BELPOL, u jaje ŭvachodziać daradca Pavieł Hurjanaŭ, ataše pa pytańniach abarony Dźmitryj Łuka, pieršy sakratar Dźmitryj Kryštal i ataše Siarhiej Arciemjeŭ. Pry hetym Hurjanaŭ nibyta vykarystoŭvaŭ pašpart prykryćcia na imia «Pavieł Karčahin».
Asobnaja ŭvaha ŭ rasśledavańni ŭdzielena ŭkrainskamu napramku. Śćviardžajecca, što da evakuacyi pasolstva Biełarusi ŭ Kijevie ŭ 2022 hodzie tam dziejničała paŭnavartasnaja hrupa supracoŭnikaŭ śpiecsłužbaŭ. Siarod ich nazvanyja daradca pasolstva Uładzimir Zubkoŭ, vajenny ataše Ihar Šmatok, pamočniki vajennaha ataše Jaŭhien Kasaviec i Vital Mielnikaŭ, pieršy sakratar Dźmitryj Pralub i aficer-šyfravalnik Eduard Dołmat. Aŭtary rasśledavańnia miarkujuć, što hetaja kamanda mahła pracavać nie tolki ŭ intaresach Minska, ale i na karyść rasijskich śpiecsłužbaŭ.
Pry hetym najbujniejšaja sietka biełaruskich ahientaŭ pad dypłamatyčnym prykryćciom, pavodle viersii BELPOL, dziejničaje zusim nie ŭ Jeŭropie ci ZŠA, a ŭ Rasii. U adroźnieńnie ad zachodnich krain, dzie havorka idzie pra niekalkich supracoŭnikaŭ u asobnych pradstaŭnictvach, u Rasii ich naličvajucca dziasiatki. Jany pracujuć jak u pasolstvie ŭ Maskvie, tak i ŭ hienieralnych konsulstvach u Rastovie-na-Donie, Krasnadary, Nižnim Noŭharadzie i inšych rasijskich haradach. Taki maštab prysutnaści tłumačycca ciesnym supracoŭnictvam dźviuch krain u śfiery biaśpieki i abarony.
Kamientary