«Dumali, bandyty, akazałasia — palicyja». Udzielniki pierastrełki ŭ Polščy raskazali svaju viersiju, ale pytańniaŭ mienš nie stała

Dziaržaŭnyja miedyi praciahvajuć raźvivać siužet pra 60‑hadovaha žychara Słonima, jaki byŭ paranieny ŭ Polščy. U efiry telekanała «Biełaruś 1» paciarpiełyja padzialilisia svaimi ŭspaminami pra padziei nočy 12 maja.

Viersija paciarpiełych: napad biez apaznavalnych znakaŭ

Pavodle słoŭ udzielnikaŭ, jany viartalisia z Hiermanii na nabytych patrymanych aŭto, kali ich pačali pieraśledvać zataniravanyja džypy. Mužčyny śćviardžajuć, što na mašynach nie było nijakich apaznavalnych znakaŭ, nie vykarystoŭvalisia ni śvietłavyja, ni hukavyja sihnały. Padumaŭšy, što heta bandyty, jany vyrašyli źviarnucca ŭ palicyju na bližejšym parkinhu, ale tam na ich napali nieviadomyja ŭ cyvilnym.

Pavialičyć

«Sihnał čyrvonaha, siniaha koleru albo hukavy sihnał pavinien byŭ prysutničać. Hetaha ničoha nie było. Ja da apošniaha nie vieryŭ, što heta palicyja», — raskazvaje adzin z kiroŭcaŭ, Ivan. Jaho vyciahnuli z mašyny praz raźbitaje škło. «Pieršaja dumka, jakaja ŭźnikaje, — ciabie chočuć abrabavać, skraści, zabić», — padkreślivaje jon.

Druhi ŭdzielnik, Aleh, dadaje, što, kali jaho vyciahnuli z aŭto, jon pačuŭ napieradzie šmatlikija streły. «Ja prypadniaŭ hałavu i ŭbačyŭ, što toj aŭtamabil, jaki byŭ za mnoj, znachodziŭsia ŭžo napieradzie, kala jaho byli dźvie łužyny kryvi», — kaža jon.

Heta była kroŭ ich 60‑hadovaha siabra Alaksandra, jaki, ubačyŭšy napad, pasprabavaŭ uciačy. Pa jaho mašynie, jak śćviardžajecca, adkryli prycelny ahoń — u korpusie naličyli 29 dzirak, ale ŭsie koły zastalisia cełymi.

Pavialičyć

Kiroŭcu paranili ŭ nohi, vucha i ščaku. Pavodle ich viersii, palicyjanty nie akazali jamu dapamohi da pryjezdu chutkaj, a ŭ polskaj balnicy niajakasna apracavali rany.

Polskaja viersija: apieracyja suprać vykradalnikaŭ

Hety apovied kardynalna adroźnivajecca ad aficyjnaj infarmacyi Akruhovaj prakuratury va Urocłavie. Pavodle polskaha boku, u tuju noč palicyja pravodziła apieracyju pa zatrymańni hrupy vykradalnikaŭ aŭtamabilaŭ. Biełarusy na BMW padazravalisia ŭ supravadžeńni skradzienaha Citroen.

Padčas sproby pravierki kiroŭca Citroen uciok, najechaŭšy na nahu palicejskamu. Paśla hetaha kiroŭca druhoha BMW, 60‑hadovy Alaksandr, pačaŭ vykonvać niebiaśpiečnyja manieŭry i «nakiravaŭ aŭtamabil u bok supracoŭnika palicyi», što i stała pryčynaj prymianieńnia zbroi. Pry hetym polskija pravaachoŭniki śćviardžajuć, što ranieńni biełarusa «nie pahražali jaho žyćciu».

Niastykoŭki i pytańni biez adkazaŭ

Novy siužet dziaržTB nie daŭ adkazaŭ na hałoŭnyja pytańni, jakija vyklikali chvalu kpinaŭ u sacsietkach.

Nahadajem, u pieršapačatkovych paviedamleńniach Śledčaha kamiteta śćviardžałasia, što biełarus, niahledziačy na «vielmi ciažki stan» i 29 prastrełaŭ u aŭto, zdoleŭ samastojna prajechać bolš za 700 km praz usiu Polšču i pierasiekčy miažu. Hetaja viersija vyklikała škvał kpinaŭ u sacsietkach.

Ciapier ža siužet abychodzić hety momant, kažučy tolki pra «znajomych, jakija dapamahli jamu viarnucca dadomu». Sam aŭtamabil, chutčej za ŭsio, byŭ aryštavany polskaj palicyjaj jak rečavy dokaz.

Taksama vyhladaje vielmi dziŭnym śćviardžeńnie, što ŭsie 29 kul patrapili ŭ korpus, ale nie zakranuli koły. Jak praviła, palicyja stralaje mienavita pa kołach, kab spynić transpartny srodak. Hetaja detal nie atrymała nijakaha tłumačeńnia.

Viersii bakoŭ pra ciažkaść ranieńniaŭ dyjamietralna razychodziacca. Biełaruski bok nastojvaje na «vielmi ciažkim stanie» i pahrozie žyćciu, pravodziačy anałohii ź minna-vybuchovymi traŭmami. Polski bok śćviardžaje, što pahrozy žyćciu nie było.

Novy siužet dziaržaŭnaha telebačańnia tolki dadaŭ da historyi emacyjnych detalaŭ, ale nie raźviejaŭ sumnievaŭ nakont usioj aficyjnaj viersii Minska. Tym nie mienš polskaja prakuratura viadzie dźvie spravy: adnu — u dačynieńni da kiroŭcaŭ za napad na palicyjantaŭ, druhuju — adnosna samich pravaachoŭnikaŭ pa fakcie mahčymaha pieravyšeńnia paŭnamoctvaŭ. 

• 0
• 0
• 0
• 2
• 0
• 0
• 0
• 0