Prapahandyst Ihar Tur atrymaŭ «myš hańby» — što heta ŭvohule takoje?
Tłumačym, jak myš stała narodnym dyzłajkam, na prykładzie viadučaha ANT.
Prapahandyst Ihar Tur vyrašyŭ padzialicca ŭ Treds svajoj fiłasofijaj: «Biełaruskija mužčyny ź dziacinstva schilnyja vybirać ź niejkich supraćlehłaściaŭ: za kazakoŭ ci za razbojnikaŭ, za Nirvana ci za Prodigy, za ardu ci za aljans, za brunietak ci za błandzinak, za Łukašenku ci za «ja nie raźbirajusia ŭ palitycy».
Tura raskrytykavali za takija prymityŭnyja sproby manipulacyi. A bolš łajkaŭ, čym sam dopis, nabrała «myš hańby» ŭ kamientarach.
Mierkavańnie Tura spadabałasia 27 karystalnikam, a «myš hańby» padtrymaŭ 51 čałaviek.
Dyk što heta za myš? Heta novy miem: na malunku miłaja myš z podpisam: «Heta — myš hańby. Kali jana nabiraje bolš łajkaŭ za tvoj post, značyć tvoj post — łajno».
«Myš hańby» źjaviłasia ŭ ruskamoŭnym Treds litaralna niekalki dzion tamu, ale ŭžo stała šalona papularnaj.
Dakładna nie viadoma, chto prydumaŭ hety miem. Na aŭtarstva pretendujuć jak minimum dva akaŭnty: adzin naležyć dziaŭčynie ź Biełarusi, druhi — dziaŭčynie z Ukrainy. Ukrainka ŭ jakaści dokazu navat prymacavała skrynšot Photoshop — maŭlaŭ, voś tak stvarałasia lehienda.
Ale ž abiedźvie kažuć, što natchnialisia «žabaj hańby», jakaja papularnaja ŭ anhłamoŭnych sacsietkach.
Rastłumačyć fienomien papularnaści takich miemaŭ davoli prosta — jany vykonvajuć rolu narodnaha dyzłajka. Kali karystalnikam nie padabajecca niejki dopis, jany zamiest doŭhaha kamientara prosta kidajuć malunak s žyviołaj.
Na malunku jość zrazumiełaje praviła: kali jon naźbiraje bolš łajkaŭ, čym aryhinalny dopis, značyć, kamientatary pieramahli aŭtara. Heta pieratvaraje abmierkavańnie ŭ hulniu: ludzi pačynajuć łajkać myš (ci žabu) naŭmysna.
Na hetym narodnaja tvorčaść nie spyniłasia: ludzi pačali aktyŭna stvarać inšych myšej. Jość, naprykład, čyrvonaja myš hańby (jana ž mifičnaja) — kali jana naźbiraje bolš łajkaŭ, čym zvyčajnaja, značyć, dopis — «vyklučnaje łajno». Jość dyjamientavaja — hetaj navat adnaho łajka dastatkova, kab usie zrazumieli: dopis — «najtupiejšaje łajno».
A pad čornaj myššu hańby navat nie treba stavić łajkaŭ. Toje, što jana źjaviłasia ŭ kamientach, abaznačaje, što sam aŭtar — łajno.
Źjavilisia i inšyja piersanažy. Naprykład, «čorny drozd bazy» (heta značyć, aŭtar dopisu — małajčyna) i «kaała ačmurennaści» (taksama abaznačaje zachapleńnie aŭtaram). Ale jany pakul značna mienš papularnyja.
Ciapier čytajuć
«Spasibo, Lena! Prodołžajtie viesti nabludienije». Aficer, jaki pisaŭ Charysavaj, paśviŭsia ŭ čatach palitemihracyi, a niekatorym dziaŭčatam navat prapanoŭvaŭ abmianiacca niudsami54
Kamientary