Ratyfikacyja Pałataj pradstaŭnikoŭ Mytnaha kodeksa Mytnaha sajuza Biełarusi, Kazachstana i Rasii znoŭ adkładziena. Jak paviedamili ŭ pres‑słužbie nižniaj pałaty parłamienta, hetaje pytańnie nie ŭniesiena ŭ paradak pasiadžeńnia Pałaty pradstaŭnikoŭ, jakoje prachodzić 14 červienia ŭ druhoj pałovie dnia.
Pavodle nieaficyjnaj infarmacyi, dakumient płanavałasia ratyfikavać jašče 10 červienia, adnak jaho razhlad byŭ pieraniesieny ŭ suviazi z rabočaj pajezdkaj prezidenta Biełarusi ŭ Rasiju.
Sustrečy Alaksandra Łukašenki ź Dźmitryjem Miadźviedzievym i Uładzimiram Pucinym adbylisia 11 červienia. Adkryvajučy pieramovy, prezident Rasii prapanavaŭ svajmu kalehu «skancentravacca na dvuchbakovych adnosinach». «Ja maju na ŭvazie našy intehracyjnyja pamknieńni: naša žadańnie stvaryć Mytny sajuz, a ŭ dalejšym — Adzinuju ekanamičnuju prastoru», — skazaŭ Miadźviedzieŭ.
Padrabiaznaści pieramoŭ u Maskvie nieviadomyja — pra ich nie paviedamlajuć ni biełaruskija, ni rasijskija krynicy. Pavodle mierkavańnia analitykaŭ, pajezdka Łukašenki była niaŭdałaj, i ŭ suviazi z hetym Minsk znoŭ adkłaŭ ratyfikacyju Mytnaha kodeksa.
Miž inšym, praca biełaruskaha parłamienta nabližajecca da zaviaršeńnia. Zhodna z hrafikam pracy Pałaty pradstaŭnikoŭ, akramia siońniašniaha dnia parłamient, pry nieabchodnaści, moža sabracca na plenarnaje pasiadžeńnie jašče 23 červienia. Apošniaje pasiadžeńnie hetaj siesii i jaje zakryćcio zapłanavany na 30 červienia.
Parłamient Rasii ratyfikavaŭ Mytny kodeks u kancy maja, Kazachstana — 10 červienia.
Nahadajem, 28 maja ŭ Sankt‑Pieciarburhu prem`ier‑ministry Rasii i Kazachstana damovilisia ab uviadzieńni Mytnaha kodeksa Mytnaha sajuza na dvuchbakovaj asnovie, bo biełaruski prem`ier na sustreču nie prybyŭ. Dakumient adkryty dla padpisańnia Biełaruśsiu.
Minsk źviazvaje svoj udzieł u Mytnym sajuzie z admienaj abmiežavalnych mier na pastaŭki rasijskaj nafty i naftapraduktaŭ u Biełaruś. Pry hetym biełaruski bok adznačaje, što ŭ dačynieńni da Kazachstana takija miery nie ŭvodzilisia.
