Ministerstva enierhietyki Biełarusi paćvierdziła apłatu «Hazpromam» $228 młn. za tranzit hazu. Pra heta paviedamiła pres-sakratar Minenierha Ludmiła Ziańkovič.
***
«Hazpromu» byŭ dadzieny čas da 13 hadzin (pa minskim časie), kab pahasić doŭh. U advarotnym vypadku tranzit rasijskaha hazu ŭ Jeŭropu budzie abmiežavany praparcyjanalna niedapłačanaj sumie.
Takuju zajavu zrabiŭ siońnia pieršy vice-premjer Biełarusi Uładzimir Siamaška na pasiadžeńni apieratyŭnaha štaba pa zabieśpiačeńni ŭstojlivaj pracy sistem haza- i enierhazabieśpiačeńnia ŭ Ministerstvie enierhietyki. Na pasiadžeńnie było zaprošana vuzkaje koła žurnalistaŭ.
«My viedajem sa ŚMI, što «Hazprom» nibyta apłaciŭ 228 młn. dalaraŭ — heta 87% ad doŭhu. My heta možam razhladać jak avans», — cytuje Siamaška RIA Novosti.
Nahadajem, Biełaruś patrabuje ad «Hazproma» pahasić zapazyčanaść za tranzit hazu ŭ pamiery 260 młn. dalaraŭ. «Hazprom» pieraličyŭ Biełarusi 228 młn. dalaraŭ.
Jak patłumačyŭ siońnia ranicaj aficyjny pradstaŭnik «Hazproma» Siarhiej Kupryjanaŭ, «u adpaviednaści z kantraktam, jaki dziejničaje pamiž «Hazpromom» i «Biełtranshazam», bazavaja staŭka tranzitu ŭstanoŭlena na ŭzroŭni 1,45 dalara za 1.000 kub. m na 100 km».
Pry stvareńni SP z «Biełtranshazam» byŭ padpisany pratakoł, jaki praduhledžvaje mahčymaść pavieličeńnia staŭki ŭ 2009 hodzie da 1,74 dalara, u 2010 hodzie da 1,88 dalara, — skazaŭ jon. — Ale hetaje rašeńnie ŭviazana z uviadzieńniem aptovaj nadbaŭki «Biełtranshaza», jakaja dazvalaje hetaj kampanii, jakaja naležyć na hety momant na 50% «Hazpromu», atrymlivać dachod ad pracy na ŭnutranym rynku Biełarusi».
Kupryjanaŭ padkreśliŭ, što takaja nadbaŭka nie była ŭviedziena. «Uličvajučy, što hetyja pytańni źviazany, dapaŭnieńnie da kantrakta, jakim była ŭstanoŭlena novaja staŭka tranzitu na 2010 hod, nie było padpisana», — skazaŭ jon.
Hazprom», pavodle jaho słoŭ, byŭ hatovy apłacić pa staroj staŭcy, ale biełaruskija kalehi admaŭlalisia prymać taki płaciež. «Na hety momant niama padpisanaha dapaŭnieńnia, i adzinaja ličba, na jakuju my možam aryjentavacca, — heta 1,45 dalara», — padkreśliŭ Kupryjanaŭ. Zychodziačy z hetaj staŭki «Hazprom» zrabiŭ płaciež za listapad—śniežań 2009 hoda i za piać miesiacaŭ hetaha hoda, dadaŭ jon.
Biełaruski bok traktuje situacyju pa-svojmu. Jak paviedamiŭ 23 červienia žurnalistam Uładzimir Siamaška, na praciahu dziesiaci miesiacaŭ 2009 hoda «Hazprom» spraŭna płaciŭ za tranzit hazu ŭ Jeŭropu,
ale ŭ listapadzie čamuści spyniŭ prymać akty źvierki z boku «Biełtranshaza», dzie byli prapisany abjomy pastavak i taryf.
Siamaška padkreśliŭ, što taryf na prapampoŭvańnie 1 tys. kub. m hazu na 100 km składaje 1,74 dalara. Adnak «Hazprom» ažyćciaŭlaŭ apłatu za tranzit pa taryfie 1,45 dalara. «Hazprom» prydumaŭ sabie lehiendu: nibyta «Biełtranshaz» nie vytrymlivaje nacenku pry prodažy hazu ŭnutry Biełarusi», — skazaŭ pieršy vice-premjer. Pry hetym jon adznačyŭ, što hetaja nacenka letaś u Biełarusi była vytrymana.
U vyniku apłaty «Hazpromam» tranzitu hazu pa taryfie mienšym za praduhledžany ŭžo za listapad—śniežań 2009 hoda ŭtvaryłasia zapazyčanaść, paviedamiŭ Siamaška.
Jon padkreśliŭ, što «Hazprom» na praciahu piaci miesiacaŭ 2010 hoda «nie zapłaciŭ nivodnaha centa za tranzit hazu». Takim čynam, utvaryłasia zapazyčanaść u pamiery 260 młn. dalaraŭ. I heta pry tym, što tranzit hazu praź Biełaruś ažyćciaŭlajecca pa samych nizkich taryfach, zajaviŭ pieršy vice-premjer.
Heta daje «Hazpromu» mahčymaść atrymlivać da 500 młn. dalaraŭ prybytku, zaznačyŭ Siamaška. Razam z tym «Biełtranshaz», pavodle jaho słoŭ, vykanaŭ svaje abaviazacielstvy pa tranzicie hazu.
***
«Hazprom» paćvierdziŭ pahašeńnie Minskam zapazyčanaści za haz i zajaviŭ ab adnaŭleńni pastavak u Biełaruś u poŭnym abjomie. Pra heta ranicaj 24 červienia paviedamiła žurnalistam pres-sakratar prezidenta Rasii Natalla Cimakova.
Pavodle jaje słoŭ, adbyłasia telefonnaja razmova Dźmitryja Miadźviedzieva, jaki zaraz znachodzicca ź vizitam u Vašynhtonie, z kiraŭnikom praŭleńnia AAT «Hazprom» Alaksiejem Mileram. «Miler prainfarmavaŭ prezidenta ab tym, što biełaruski bok poŭnaściu apłaciŭ pastaŭki hazu zhodna z kantraktam i «Hazprom» pryniaŭ rašeńnie adnavić pastaŭki hazu ŭ Biełaruś u poŭnym abjomie», — cytuje pres-sakratara RIA Novosti.
Pra toje, što Minsk apłaciŭ zapazyčanaść za pastaŭleny ŭ 2010 hodzie haz, paviedamiŭ viečaram 23 červienia pieršy vice-premjer Biełarusi Uładzimir Siamaška.
Pavodle jaho słoŭ, Biełaruś pazyčyła 200 młn. dalaraŭ, ź jakich 187 młn. pajšli na pakryćcio doŭhu «Hazpromu».
