Mikałaj Aŭtuchovič prypyniŭ haładoŭku

Vaŭkavyski pradprymalnik Mikałaj Aŭtuchovič prypyniŭ haładoŭku, abjaŭlenuju im u śledčym izalatary №1 Minska. Pra heta paviedamiŭ jaho advakat Pavieł Sapiełka.

Aŭtuchovič abjaviŭ haładoŭku 16 červienia. Doŭhi čas jon biezvynikova damahajecca akazańnia jamu miedycynskaj dapamohi pa pratezavańni zuboŭ. Jak pieršy krok da vyrašeńnia hetaj prablemy asudžany zapatrabavaŭ sustrečy z namieśnikam načalnika pa miedycynskaj čaści departamienta vykanańnia pakarańniaŭ MUS.

Pavodle słoŭ Sapiełki,

Aŭtuchovič damohsia vyniku na pieršym etapie vykanańnia jaho patrabavańniaŭ.

«Administracyja kałonii ŭsio‑taki vykanała svajo abiacańnie i arhanizavała jamu sustreču z čynoŭnikam, jaki adkazvaje ŭ departamiencie vykanańnia pakarańniaŭ za akazańnie miedycynskich pasłuh. U vyniku sustrečy, jakaja prajšła 22 červienia, była dasiahnuta damoŭlenaść, što na praciahu dvuch dzion da Aŭtuchoviča pryjedzie śpiecyjalist, jaki jaho ahledzić na pradmiet mahčymaści akazańnia dapamohi pa pratezavańni zuboŭ», — skazaŭ advakat.

Jon ličyć, što

dapamohu Aŭtuchoviču mohuć akazać tolki ŭ Minsku.

»Na čas lačeńnia Aŭtuchovič pavinien znachodzicca ŭ stalicy. Kali hetaha nie adbudziecca, to, kali jaho adpraviać u kałoniju, paŭnavartasnaja dapamoha akazana nie budzie. Tady Aŭtuchovič moža adnavić haładoŭku, i ja nie vyklučaju, što ŭ hetym vypadku jana budzie »suchoj», — zajaviŭ Sapiełka.

Jak paviedamiŭ BiełaPAN pravaabaronca Aleh Vołčak, mahčyma, što na čas lačeńnia i pratezavańnia zuboŭ Aŭtuchoviča pieraviaduć ź SIZA № 1 u inšaje miesca. «Zubny kabiniet, jaki byŭ u SIZA, rasfarmiravany dva hady tamu nibyta z‑za niepatrebnaści. Tamu Aŭtuchoviča daviadziecca kudyści pieravieści», — adznačyŭ Vołčak.

Na jaho dumku,

svajoj haładoŭkaj Aŭtuchovič vyrašaje nie tolki svaje prablemy, ale i prablemy »ŭsich, chto znachodzicca ŭ miescach pazbaŭleńnia voli, — heta pryblizna 37 tys. čałaviek».

«U nas ludzi siadziać u turmach pa 10—15 hadoŭ i časta nie mohuć atrymać takuju ž miedycynskuju dapamohu, u jakoj maje patrebu Aŭtuchovič. Tamu jaho haładoŭka važnaja i dla ich», — skazaŭ Vołčak.

6 maja Viarchoŭny sud pryhavaryŭ Aŭtuchoviča da piaci hadoŭ i dvuch miesiacaŭ pazbaŭleńnia voli z adbyvańniem pakarańnia ŭ kałonii strohaha režymu. Jon pryznany vinavatym u pieravozcy i zachoŭvańni piaci patronaŭ da palaŭničaj vintoŭki.

Pravaabaroncy ličać Aŭtuchoviča i inšych asudžanych pa kryminalnaj spravie vaŭkavyskich pradprymalnikaŭ palitźniavolenymi, ukazvajučy na surjoznyja pracesualnyja parušeńni, zafiksavanyja padčas suda.

47‑hadovy Mikałaj Aŭtuchovič užo nieadnarazova pravodziŭ haładoŭki pratestu. Jaho apošniaja haładoŭka doŭžyłasia z 16 krasavika pa 16 lipienia 2009 hoda. Za hety čas Aŭtuchovič schudnieŭ na 35 kh.

• 0
• 0
• 0
• 0
• 0
• 0
• 0
• 0