Umoŭna ich možna padzialić na dźvie hrupy — «aficyjnyja» i «nieaficyjnyja».
Umoŭna ich možna padzialić na dźvie hrupy — «aficyjnyja» i «nieaficyjnyja». Pieršyja — raspracavanyja turystyčnymi strukturami. Liderstva ŭ hetaj śfiery naležyć Biełaviežskaj puščy.
Dzied Maroz i dzikija źviary
Supracoŭniki nacyjanalnaha parku raspracavali čatyry viełamaršruty — ad 10 da 45 km. Nieabchodnaje abstalavańnie dajuć na miescy. U dadatak tut razbudavanaja infrastruktura z kaviarniami, restaranami i handlovymi radami. A cikavostak u Puščy šmat — ad Duba-patryjarcha i Carskaha trakta da Dzieda Maroza i dzikich źviaroŭ.
Prachodzić maršruty pa Puščy možna jak samomu, tak i hrupaj da 16 čałaviek. Tut ža, na miažy z Polščaj, dziejničaje pamiežny punkt propusku dla arhanizavanych ravarystaŭ. Majučy žadańnie i vizu, možna zajechać rovaram u susiedniuju krainu.
Turystyčny centr Biełaviežskaj Puščy — (01631) 56-398, [email protected]
Try krainy za tydzień
Inšy vidoviščny viełamaršrut — Aŭhustoŭski šlach. Jon nazyvajecca «Za siem dzion u try krainy na rovary i bajdarcy». Prapanujecca naviedać Biełaruś, Polšču i Litvu pa šlachu Aŭhustaŭ — Mikašoŭka (Polšča) — pamiežny pierachod «Rudaŭka Lasnaja» (šluz «Kužyniec», šluz «Vaŭkušak» — Dambroŭka — šluz «Dambroŭka» — Sapockin —Hrodzienski ŭmacavany rajon № 68 (Linija Mołatava) — fort Hrodzienskaj krepaści — Saničy — rečki Marycha, Čornaja Hańča, Šlamica, aziory Jandrenia, Kavienia, Saviek — Niamnova — pamiežny pierachod «Pierałom» — Druskieniki (Litva).
Jak i ŭ Biełaviežy, na Aŭhustoŭskim kanale viełaturystam prapanujuć arandavać usio nieabchodnaje.
U navakolli jość ahrasiadziby, hateli i inšyja punkty absłuhi turystaŭ. Uzrovień absłuhoŭvańnia pakidaje žadać lepšaha, adnak infrastruktura pastupova raźvivajecca.
Hety maršrut, akramia šenhienskaj vizy,
patrabuje ad turystaŭ padrychtoŭki, kab vytrymać fizičnyja nahruzki. Kampiensacyja za heta — krajavidy troch krain.
Infarmacyju pra maršruty pa Aŭhustoŭskim kanale možna atrymać u bolšaści biełaruskich turfirm. Albo niepasredna ŭ firmie «Niamnova Tur».
«Niamnova Tur» — teł. +375 152 74-29-43. Je-mail: nemnovotour_grodno@ tut.by
Dla amataraŭ rovara, što lubiać padarožničać volna, raim niekalki malaŭničych miaścinaŭ, złučanych adnosna niepraciahłymi pierajezdami.
Stoŭbcy — Mir — voziera Kromań — Nalibockaja pušča — Kołasava — Kojdanava
Maršrut składany, raźličany na dva dni z adnoj načoŭkaj. Ale chto prajšoŭ jaho — nie zabudziecca. Akramia mahčymaści naviedać znakamity Mir, padarožža dazvolić adpačyć siarod dzikaj pryrody. Voziera z Puščaj hetamu paspryjajuć.
Da Stoŭbcaŭ možna dabracca elektryčkaj. Pry nahodzie ŭ miastečku možna pabačyć Nioman, tut jašče zusim nievialiki.
Siadziby: «U opuški», Nalibockaja pušča, Staŭbcoŭski rajon, t.: (029) 674-70-74 (Volha), 348-70-41 (Źmicier)
«Stary młyn», kala v. Jačanka, Staŭbcoŭski rajon, t.: (029) 641-23-22 (Aleh), 674-70-74 (Volha)
Asipovičy — uzdoŭž Pcičy — Marjina Horka
Jašče adzin cikavy dvuchdzionny maršrut pačynajecca z Asipovičaŭ. Dabraŭšysia tudy elektryčkaj, možna dalej skiravacca ŭzdoŭž raki Pcič pa vialikaj duzie da Marjinaj Horki.
Što praŭda, z ahrasiadzibami ŭ tych vakolicach składana. Biarycie namioty.
Pcič nievierahodna pryhožaja. Kožnyja niekalki hadzin maršrut budzie prachodzić praź miescy źlićcia hetaj pavolnaj raki ź jaje šmatlikimi prytokami: Šaćciu, Dakolkaj, Aresaj, Asačankaj, Nieratoŭkaj, Niasłaŭkaj…
Błakitnyja Aziory
Maršrut pa Błakitnych Aziorach pralahaje praz Narač — Švakty — Bałduk — Hłublu.
Tut vas čakajuć sapraŭdnyja pryrodnyja dzivosy — Łysaja hara, źviarynyja ściežki, zavały pavalenych drevaŭ dy pachkija bałotnyja jahady.
Jak niama ŭłasnaha transpartu, dabiracca da Naračy składana. Ź Minska pryjdziecca dajechać da Maładziečna, a adtul užo dyzielem u kirunku Naračy (najbližejšaja stancyja — Kniahinin). Padobnym čynam i nazad u stalicu. Pry adsutnaści ŭ Biełarusi śpiecyjalnych vahonaŭ dla pieravozu rovaraŭ, takoje padarožža moža pieratvarycca ŭ pakuty.
Siadziba: «Naračanka», vuł. Padlesnaja, 12, v. Narač, Miadzielski r-n, t.: (01797) 49-0-84, (01797) 55-0-39
* * *
Heta daloka nie poŭny pieralik mahčymych trasaŭ. U vakolicach kožnaha vialikaha horada znojdziecca mnostva cikavych miaścinaŭ, kudy možna dajechać rovaram.
Spraktykavany ravaryst moža za dzień adoleć 70 km šlachu, pry hetym znojdziecca čas i na aznajamleńnie z navakollem.
Padarožničajučy z małodšymi školnikami, nie varta płanavać pierachodaŭ, daŭžejšych za 10—20 km.
Vypraŭlajučysia ŭ padarožža pa «dzikim» maršrucie,
varta brać z saboj pryłady, nieabchodnyja dla terminovaha ramontu «žaleznaha kania».
Mohuć być i prablemy z načlehami — z ahrasiadzibami lepiej damaŭlacca zahadzia, a hatelčyki rajcentraŭ davoli darahija. Alternatyva — namioty.
Kamientary