Top-20 stratnych biełaruskich AAT

Pavodle dadzienych Ministerstva finansaŭ, kolkaść stratnych adkrytych akcyjaniernych tavarystvaŭ u Biełarusi pavialičyłasia ŭ paraŭnańni z 2008 hodam na 55 pradpryjemstvaŭ — amal na 25%. 2009 hod skončyli sa stratami 239 AAT.

U dakryzisnym 2008 hodzie takich pradpryjemstvaŭ było 184. Istotna pavialičylisia i abjomy atrymanych imi strataŭ. Tak, kali pa vynikach 2008 hodu tolki ŭ dvuch AAT («Motavieła» i «Rumiancaŭskaje») suma strataŭ pieravyšała 20 młrd rubloŭ, to ŭ 2009 hodzie takich pradpryjemstvaŭ było ŭžo šeść. Ahulnaja suma strataŭ dziesiaci samych prablemnych AAT u 2009 hodzie skłała 225 młrd rubloŭ.

Na praciahu dvuch apošnich hadoŭ samyja vialikija abjomy strataŭ i najbolšaja kolkaść stratnych AAT prypadaje na biełaruskuju małakapierapracoŭku.

U 2008 hodzie ŭ top-20 stratnych AAT trapili 14 pradstaŭnikoŭ hetaj haliny. Ź ich dva byli pradadzienyja: «Małočnyja horki» ŭ Horkach — rasijskamu inviestaru, a Pinski małočny kambinat vykupiŭ u miascovych uładaŭ «Savuškin pradukt». Ale heta praktyčna nie paŭpłyvała na dolu małakapierapracoŭčych zavodaŭ u śpisie dvaccaci stratnych AAT pa vynikach 2009 — u antyrejtynhi ŭvajšli 13 małočnych zavodaŭ, pry hetym nazirajecca paharšeńnie ich finansavych pakazčykaŭ, u tym liku i rost strataŭ.

Naprykład, u «staražyła» rejtynhu — Lidskaha małočna-kansiervavaha kambinata — straty vyraśli da 31 066 młn rubloŭ (u 2008 hodzie — 15 446 młn), u «Rumiancaŭskaha» — da 28 254 młn rubloŭ (u 2008 hodzie — 26 024 młn), u Aršanskaha małočnaha kambinata — da 23 940 młn rubloŭ (12 563 młn rubloŭ), viciebskaha «Małaka» — da 23 328 młn (13 898 młn), u Navahrudskaha masłarobnaha kambinata — da 21 528 młn (12 180 młn).

U liku stratnych pradpryjemstvaŭ u 2009 apynuŭsia i Škłoŭski masłarobny zavod (7 607 młn rubloŭ), jaki niadaŭna adkryŭ SP z rasijskaj hrupaj «Junimiłk». Na pradpryjemstvie, treba mierkavać, raźličvajuć, što partniorstva z rasijcami dapamoža papravić finansavaje stanovišča zavoda.

Ale, jak adznačajuć ekśpierty «Zaŭtra tvajoj krainy», na ŭsie małočnyja zavody Biełarusi inviestaraŭ nie chopić, navat kali biełaruskaje kiraŭnictva narešcie adkryje dla ich hetuju halinu. Toj fakt, što jana doŭhi čas była i zastajecca začynienaj dla vonkavych inviestycyj, admoŭna adbiŭsia na małakapierapracoŭčaj halinie, pra što śviedčać i pakazčyki pa stratach u 2008–2009 hadach.

Na dadzieny momant možna kazać usiaho pra šeść pryvatnych prajektaŭ u biełaruskaj małočnaj halinie. Najbujniejšy ź ich — «Savuškin pradukt», jaki staŭ u minułym hodzie ŭładalnikam Pinskaha małočnaha kambinata (z učastkam u Stolinie) i faktyčna ŭžo ŭstalavaŭ kantrol nad «Biełłaktam», dzie ŭ dziaržavy adsutničaje dola.

Niama doli dziaržavy i ŭ Dziatłaŭskim syrarobnym zavodzie. I, narešcie, čatyry pryvatnych prajekty z udziełam rasijskich inviestaraŭ — SP u Pružanach i Škłovie («Junimiłk»), «Biełaviežskija syry», «Małočnyja horki» i Lachavicki małočny zavod.

Zrešty, za vyklučeńniem hrupy «Savuškin pradukt», hetyja pradpryjemstvy nie źjaŭlajucca asnoŭnymi u małočnaj halinie. Jakraz klučavyja ź ich fihurujuć u topie-20 stratnych AAT. I miarkujučy pa tym, što francuzskaja hrupa Danone pakul admoviłasia ad idei budaŭnictva zavoda pa hłybokaj pierapracoŭcy małaka ŭ Kiraŭskim rajonie Mahiloŭskaj vobłaści, chutka biełaruskija małakazavody zusim pierastanuć cikavić pakupnikoŭ. Asabliva z tymi finansavymi pakazčykami, jakija majuć ciapier. 

Nižej pradstaŭlenyja tablicy sa źviestkami pra straty biełaruskich AAT za 2008 i 2009 hh.

• 0
• 0
• 0
• 0
• 0