I ŭ najbližejšyja 50 hadoŭ u Biełarusi čakajecca pavieličeńnie kolkaści apadkaŭ.
U Biełarusi nazirajecca tendencyja da pavieličeńnia kolkaści apadkaŭ,
zajaviŭ načalnik słužby hidramietearałahičnych prahnozaŭ Respublikanskaha hidramietearałahičnaha centra Dźmitryj Rabaŭ 29 červienia na pres‑kanfierencyi ŭ Minsku.
Pryčym, zaŭvažyŭ jon, u apošnija hady rost kolkaści apadkaŭ nazirajecca ŭ Biełarusi letam: staić ciopłaje, ale vilhotnaje nadvorje. «Nie tolki sioleta, ale i ŭ minułym hodzie byŭ daždžlivy červień, kali vypadała ŭ niekatorych rajonach bolš za miesiačnuju normu apadkaŭ», — skazaŭ Rabaŭ.
Ciopłaje i vilhotnaje nadvorje letam śviedčyć ab prajaŭleńni ŭ krainie prykmiet trapičnaha klimatu.
U svaju čarhu dyrektar departamienta pa hidramietearałohii Ministerstva pryrodnych resursaŭ i achovy navakolnaha asiarodździa Maryja Hiermiančuk paviedamiła, što ŭ najbližejšyja 50 hadoŭ u Biełarusi čakajecca pavieličeńnie kolkaści apadkaŭ. Choć u zachodniaj častcy krainy, Hrodzienskaj i Bresckaj abłaściach, pavodle niekatorych raźlikaŭ, kolkaść apadkaŭ, naadvarot, moža pamienšycca.
Pavodle słoŭ Hiermiančuk, tendencyja da pavieličeńnia kolkaści apadkaŭ charakternaja dla siarednich šyrotaŭ usiaho paŭnočnaha paŭšarja. U Jeŭropie heta — Biełaruś, častka Polščy, Hiermanija, krainy Bałtyi, zachodniaja častka jeŭrapiejskaha rehijonu Rasii. U toj ža čas u krainach Mižziemnamorja, paŭdniovaj častcy Jeŭropy i rehijonu Paŭnočnaj Sachary adznačajecca tendencyja da pamianšeńnia kolkaści apadkaŭ, što viadzie da rostu kolkaści zasuch.
Śpiecyjalisty tłumačać takija tendencyi asablivaściu źmianieńnia cyrkulacyi atmaśfiery, a nie vykidami parnikovych hazaŭ, jak ličać mnohija.
«Tut možna ŭspomnić i pra Halfstrym, i pra rastavańnie palarnych ildoŭ, ale naŭprost rabić vyvady nielha: heta vielmi šmatfaktarnaja sistema, jakaja słaba madelujecca i słaba prahnazujecca», — skazała Hiermiančuk.
Kamientary