Vymierłyja vidy žyviołaŭ možna budzie ažyvić
Vymierłyja vidy žyviołaŭ možna budzie viarnuć ź niebyćcia dziakujučy namahańniam śpiecyjalistaŭ zaaparka San-Dyjeha i Daśledčaha instytuta imia Elen Skryps u Kalifornii.
Jany płanujuć stvaryć novych asobin hetakich vidaŭ, pieraŭtvaryŭšy zamarožanyja kletki ich arhanizmaŭ ŭ śpiermatazoidy i jajkakletki.
Na kanfierencyi Mižnarodnaha hramadstva pa daśledavańni stvałovych kletak u San-Francyska pradstaŭnik instytuta doktar Žanna Łorynh i jaje kalehi raskazali pra vyniki svajoj pracy: navukoŭcam udałosia atrymać inducyjavanyja plurypatentnyja stvałovyja kletki, zdolnyja pieratvarycca ŭ kletki luboha typu, z zamarožanych kletak skury samca madryła (Mandrillus leucophaeus), vidu prymataŭ, jakija žyvuć u Nihieryi, Kamierunie i Ekvataryjalnaj Hviniei i znachodzicca pad pahrozaj vymirańnia. Kančatkovaja meta navukoŭcaŭ — atrymać z hetych kletak śpiermatazoidy i jajkakletki.
«Hetak možna budzie nasamreč razvodzić žyvioł, jakija ŭžo miortvyja», — kaža Łorynh.
Navukoŭcy źbirajucca vykarystoŭvać kletkavy materyjał, sabrany ŭ ramkach prajektu «zamarožany zaapark», što realizuje zaapark San-Dyjeha. Admysłoŭcam udałosia sabrać uzory tkanin ad 8,4 tysiačaŭ asobinaŭ, jakija pradstaŭlajuć bolš za 800 vidaŭ. Jajkakletki dy śpiermatazoidy, pavodle zadumy navukoŭcaŭ, možna budzie vykarystoŭvać dla padtrymki hienietyčnaje raznastajnaści ŭ miežach prahramaŭ raźviadzieńnia žyviołaŭ u niavoli.
A ŭ pierśpiektyvie — uznaŭlać lubyja źnikłyja vidy.
Kamientary