Fond Maryi Šarapavaj vydzialaje $250 tysiač Rasii, Ukrainie i Biełarusi
Fond Maryi Šarapavaj vydzialaje 250 tysiač dalaraŭ na realizacyju novych inicyjatyŭ dla vyrašeńnia postčarnobylskich prablem u Rasii, Ukrainie i Biełarusi.
Pra heta zajaviŭ 1 lipienia na pres‑kanfierencyi ŭ Homieli pradstaŭnik AAN/PRAAN u Biełarusi Antonius Bruk. «Prajekt raźličany na 2011—2012 hady, i heta simvalična, bo ŭ 2011 hodzie spaŭniajecca 25 hadoŭ z dnia avaryi na Čarnobylskaj AES», — skazaŭ Bruk.
Viadomaja tenisistka Maryja Šarapava, jakaja prysutničała na pres‑kanfierencyi, dadała, što,
chutčej za ŭsio, hetyja hrošy buduć nakiravany na prajekty pa raźvićci sportu dla dziaciej, jakija paciarpieli ad avaryi na ČAES.
«Kali raniej my nakiroŭvali srodki na realizacyju prajektaŭ u zabrudžanych rehijonach u śfiery ekałohii i adukacyi, to zaraz nakirujem na sport. Vielmi važna, kab dzieci prajaŭlali fizičnuju aktyŭnaść. Nieabaviazkova heta budzie tenis, moža być, chakiej abo fihurnaje katańnie», — zaznačyła Šarapava.
Try hady tamu Fond Maryi Šarapavaj vydzieliŭ 100 tysiač dalaraŭ na realizacyju prajektaŭ, pryśviečanych postčarnobylskim prablemam va Ukrainie, u Biełarusi i Rasii. Z hetaj sumy 35 tysiač dalaraŭ byli vydzieleny na try biełaruskija prajekty, skiravanyja na palapšeńnie žyćcia ŭ zabrudžanych rajonach Homielskaj vobłaści.
U Brahinskim rajonie na hetyja hrošy byli zakupleny muzyčnyja instrumienty dla dziciačych škoł, u Čačersku była padtrymana praca ekałahičnaha hurtka i stvorany pakoj rełaksacyi dla dziaciej u rajonnaj balnicy. 30 červienia Šarapava pabyvała ŭ Čačersku, dzie aznajomiłasia z pracaj finansavanych joju abjektaŭ. Tenisistka zastałasia zadavolenaj ubačanym. «Ja ŭbačyła šmat talenavitych dziaciej, jakija tancujuć, śpiavajuć, malujuć, u jakich vialiki patencyjał, ale im treba dapamahać, ź imi treba pracavać», — skazała Šarapava.
1 lipienia jana sustrełasia ŭ Homieli sa stypiendyjatami svajho fondu, jakija vyvučajuć mastactva ŭ BDU i Biełaruskaj dziaržaŭnaj akademii mastactvaŭ. Pieršyja try takija stypiendyjaty byli adabrany vosieńniu 2009 hoda. Usiaho fond Šarapavaj vydzieliŭ na stypiendyi talenavitaj moładzi 210 tysiač dalaraŭ.
30 červienia —1 lipienia Maryja Šarapava ažyćciaŭlaje pajezdku ŭ Homielskuju vobłaść. Siońnia jana praviadzie majstar‑kłas pa tenisie dla vučniaŭ Centra alimpijskaha reziervu vobłaści.
Kamientary