Paśla «aryhinalnych» dziejańniaŭ manapalista Andrej Skurko nie vyklučaje, što «Naša Niva» ŭpieršyniu ŭ historyi biełaruskaj niezaležnaj presy atrymaje dziaržaŭnuju datacyju.
Andrej Skurko z kopijami nakładnych na adhruzku «NN» № 25'2010.
Na pres-kanfierencyi ŭ ofisie «Biełaruskaj asacyjacyi žurnalistaŭ» 13 lipienia hałoŭny redaktar «Našaj Nivy» Andrej Skurko raskazaŭ ab situacyi vakoł źniknieńnia častki apošniaha numara.
– Na minułym tydni my sutyknulisia z novym vidam cenzury – cenzuraj časoŭ «libieralizacyi», kali častka nakładu haziety z materyjałam pra film NTV «Kriostnyj baťka» była vyniata z raspaŭsiudžvańnia. Pryčym była vyniata samaja lohkadastupnaja častka haziety, jakaja išła praz kijoski «Biełsajuzdruku», – adznačyŭ Andrej Skurko.
Hałoŭny redaktar «Našaj Nivy» padćvierdziŭ, što numar haziety źnik niedzie pamiž drukarniaj i «Biełsajuzdrukami».
Redakcyja źviartałasia ŭ abłasnyja «Biełsajuzdruki», ale atrymoŭvała tam roznyja adkazy. Niechta kazaŭ, što numar pastupiŭ u prodaž (ale čytačy haziety znajści jaho nie mahli), niechta kazaŭ, što apošni numar da ich nie pastupiŭ.
Pry hetym Andrej Skurko ličyć, što ŭ situacyi z zatrymańniem numaru haziety «Biełsajuzdruk» vystupiŭ tolki ŭ roli vykanaŭca, a rašeńnie ab hetym prymałasia na niekalki ŭzroŭniej vyšej.
Redakcyja skiravała zvarot da RUP «Biełsajuzdruk» z patrabavańniem tłumačeńniaŭ. Akramia taho, zaraz rychtujecca skarha ŭ prakuraturu i zvarot u haspadarčy sud, pakolki vydańnie paniesła davoli vialikija materyjalnyja straty. U «Biełsajuzdruki» było nakiravana 3 485 asobnikaŭ – takim čynam, razam z NDS redakcyja hublaje 4 młn rubloŭ.
– Nastupny akt hetaha sumnaha marlezonskaha baletu budzie tady, kali my atrymajem naprykancy miesiaca ad «Biełsajuzdruku» ličby śpisańnia. I tut nas čakaje takaja kalizija: kali śpisańnie numaru ad 7 lipienia budzie nadzvyčajna vialikim, heta budzie značyć, što «Biełsajuzdruk» niehałosna raśpisvajecca: numar byŭ zatrymany, – skazaŭ Andrej Skurko.
– Kali ž śpisańnie budzie zvyčajnym i «Biełsajuzdruk» budzie rabić vyhlad, što numar pajšoŭ u prodaž, rehijanalnyja pradpryjemstvy buduć vymušanyja pieraličyć nam hrošy za numar. Heta moža być pieršym prykładam dziaržaŭnaj datacyi niezaležnaj presy.
Naprykancy pres-kanfierencyi Andrej Skurko adznačyŭ: – Chaču vykazać «Biełsajuzdruku» padziaku. Za toje, što u čas letnich adpačynkaŭ, kali ŭvaha da presy tradycyjna padaje, jany takim aryhinalnym čynam pryciahnuli ŭvahu da haziety «Naša Niva».
