Advakat: Śviatłana Bajkova znachodzicca ŭ ciažkim stanie

Stan Śviatłany Bajkovaj, jakaja ŭžo piać miesiacaŭ znachodzicca ŭ SIZA KDB, — ciažki. Heta tyčycca jak fizičnaha, hetak i maralnaha aśpiektu, paviedamiŭ advakat staršaha śledčaha pa asabliva važnych spravach Hienieralnaj prakuratury Michaił Vołčak.

Jakija dziejańni ŭ dačynieńni da Bajkovaj prymajucca śledstvam, advakat nie skazaŭ, adznačyŭ tolki, što novych abvinavačańniaŭ padabaronnaj nie vystaŭlałasia.

24 lipienia hienieralny prakuror Biełarusi Ryhor Vasilevič pradoŭžyŭ termin utrymańnia pad vartaj Śviatłany Bajkovaj jašče na dva miesiacy — da 24 žniŭnia. Rabotnik Hienprakuratury była zatrymana supracoŭnikami KDB 25 lutaha. Kryminalnyja spravy ŭ dačynieńni da jaje staršynia Kamiteta dziaržbiaśpieki Vadzim Zajcaŭ raspačaŭ 24 lutaha pa prykmietach składaŭ złačynstvaŭ, praduhledžanych artykułami 399 (niezakonnaje vyzvaleńnie ad kryminalnaj adkaznaści) i 426 (pieravyšeńnie ŭłady abo słužbovych paŭnamoctvaŭ) Kryminalnaha kodeksa. Im ža da śledčaha była prymieniena miera strymańnia ŭ vyhladzie ŭziaćcia pad vartu.

U suviazi z adsutnaściu dastatkovych dokazaŭ vystaŭlenaha abvinavačańnia 23 krasavika ŭ pradaŭžeńni terminu ŭtrymańnia Bajkovaj pad vartaj hienprakuror admoviŭ, ale pry hetym termin praviadzieńnia papiaredniaha śledstva pa spravie pradoŭžyŭ pa 24 žniŭnia. 24 červienia ŭ Hienieralnaj prakuratury paviedamili, što śledstvam KDB vykładzieny fakty nieabhruntavanaha zatrymańnia, pryciahnieńnia ŭ jakaści abvinavačvanych, uziaćcia hramadzian pad vartu, dapuščanych Bajkovaj u 2006–2007 hadach. Tamu termin jaje ŭtrymańnia pad vartaj byŭ pradoŭžany.

U KDB pradaŭžeńnie terminu ŭtrymańnia Bajkovaj pad vartaj rastłumačyli «nieabchodnaściu stvareńnia ŭmoŭ dla poŭnaha i abjektyŭnaha rasśledavańnia kryminalnaj spravy, u tym liku ŭstanaŭleńnia matyvaŭ i padstaŭ nieprymianieńnia mier adkaznaści, praduhledžanych zakanadaŭstvam, u dačynieńni da hałoŭnych arhanizataraŭ kantrabandnych kanałaŭ».

Nahadajem, pavodle nieaficyjnaj infarmacyi, paśla taho jak hienprakuror Ryhor Vasilevič admoviŭ u kancy krasavika pradaŭžać termin utrymańnia svajoj padnačalenaj pad vartaj paśla zakančeńnia dvuch miesiacaŭ z momantu jaje zatrymańnia, u KDB u dačynieńni da Bajkovaj była raspačata jašče adna kryminalnaja sprava. 31 maja jana abjaviła haładoŭku pratestu, ź jakoj vyjšła 16 červienia pavodle patrabavańnia ŭračoŭ, svajakoŭ i abarony.

• 0
• 0
• 0
• 0
• 0