Lotać nie strašna

Ź Minska da Homiela možna dabracca mienš za hadzinu… lotu. Heta adziny abłasny centr, jaki maje pramoje avijazłučeńnie sa stalicaj.

Jašče da vyletu praduziata pastaviŭsia da mahčymaści patrapić na samalocie ŭ Homiel. Skiepsis byŭ vyklikany ŭzrostam samalotaŭ AN-24: apošni ekziemplar hetaj madeli vypuścili tryccać adzin hod nazad. Ale, kali padnialisia ŭ pavietra, zrazumieŭ, što ŭzrost niespraktykavanamu voku pasažyra zaŭvažajecca tolki pa niejkich źniešnich detalach.

Chto ž lotaje na homielskich samalotach? Usich pasažyraŭ było kala tryccaci. Dzieviatnaccać lacieli z Kalininhrada (jašče dziesiatak vyjšaŭ u Minsku). Mužčyna ŭ dziełavym kaściumie. Baćka ź dziaŭčynkaj. Jašče adna dziaŭčynka biez supravadžeńnia. Šmat piensijanieraŭ.

Palot da Homiela zajmaje 55 chvilin. Kali dadać jašče čas rehistracyi na rejs, a taksama vyhruzku bahažu, to ahułam heta krychu bolš za paŭtary hadziny.

Vylet ź Minska ŭ 20.15. U Homieli ŭžo ŭ 21.10. Zručna, bo chutka. I nie treba marnavać na darohu pracoŭny dzień ci noč treścisia ŭ ciahniku. Ale avijarejsy arhanizavanyja tolki dvojčy na tydzień: u sieradu i niadzielu. Heta havoryć ab ich niepapularnaści, chaj navat i praz adsutnaść naležnaj rekłamy.

Homielski aeraport — heta terytoryja amal u try sotni hiektaraŭ. Uźlotna-pasadačnyja pałosy, aeravakzał, składy. Jość navat hatel. Prynamsi, toje, što ad jaho zastałosia. Adno kryło čatyrochpaviarchovaha budynka pustuje. Supracoŭniki raskazali, što jaho mierkavali zdać u arendu niejkaj firmie. Ale nie skłałasia. A pad numary ciapier vykarystoŭvajecca tolki druhi pavierch. Spyniajucca ŭ asnoŭnym kamandzirovačnyja. Dyj tyja, vidać, što pryjazdžajuć vyklučna pa spravach «lotnych». Bo dabiracca z aeraporta da Homiela niazručna: aŭtobusy chodziać redka, ich raskład padładžany pad niešmatlikija rejsy. Tutaka ž, na vyšejšych pavierchach, raźmiaščajecca i kiraŭnictva kampanii «Homielavija».

Razmaŭlaju z adnym supracoŭnikam. Jon nie maje dačynieńnia da avijacyi, a pracuje pa inšaj śpiecyjalnaści. Pracaj zadavoleny. Zarobak choć i zatrymlivajuć, ale płaciać niadrenna. U Homieli, pa jaho słovach, niašmat miescaŭ, dzie možna dobra zarabić.

Kali abychodziš navakolle, to nie vierycca, što hety zapasny aeraport Minska hatovy prymać navat samalot «Boinh-737».

Prynamsi, toje dazvalajuć katehoryi aeraporta — «V» i III. Miž tym jon jašče maje status mižnarodnaha. Staryja budynki. Niekatoryja ź ich choć adramantavanyja i pafarbavanyja, ale «havorać» ab tym, što infrastruktura jašče nie daciahvaje da mižnarodnych standartaŭ.

AN-24 pasažyrski samalot. Dalnaść palotu — 3000 km, krejsierskaja chutkaść — 490 km/h. Hady vytvorčaści: 1962-1979. Było vypuščana zvyš za 1000 samalotaŭ. Bolš za 300 jašče ekspłuatujucca, zbolšaha ŭ krainach SND i Afryki. Źmiaščaje 48 pasažyraŭ.

Što pa čym

Minsk —Kalininhrad — 75 jeŭra.
Homiel — Kalininhrad — 87 jeŭra
Homiel — Minsk — 45410 bieł. rub.
Hrodna — Kalininhrad — 62 jeŭra
Brest — Kalininhrad — 75 jeŭra.

«Homielavija» čakaje inviestaraŭ

Ab pracy «Homielavija» raspaviadaje namieśnik dyrektara avijakampanii Ihar Zacharanka.

«NN»: Homiel — adziny abłasny centr Biełarusi, jaki maje svaju avijakampaniju i zajmajecca pasažyrskimi pieravozkami. Kudy latajecie, aproč Minska?

Ihar Zacharanka: Raniej z aeraporta Homiela ažyćciaŭlałasia ŭ zaležnaści ad letniaj ci zimovaj navihacyi bolš za 70 rejsaŭ. Byŭ etap, kali ŭ štacie «Homielavija» pracavała tolki adnych ściuardes kala sta. Ciapier možna tolki ŭjavić, jakimi byli park pavietranych sudoŭ, sietka palotaŭ, stupień zahružanaści. Ale razvał Savieckaha Sajuza paŭpłyvaŭ na dziejnaść našaha pradpryjemstva.

Ciapier pa pasažyrskich pieravozkach my ažyćciaŭlajem rejsy «Homiel-Minsk-Kalininhrad». I my adzinaja biełaruskaja avijakampanija, jakaja lataje z Bresta i Hrodna. U raniejšyja hady my latali jašče z Mahilova i Viciebska praź Minsk u Kalininhrad.

«NN»: Jakaja schiema palotaŭ?

IZ: Dvojčy na tydzień z Homiela my lacim u Minsk. U stalicy zabirajem pasažyraŭ, jakija kirujucca da Kalininhrada. Z Kalininhrada — u Brest. Znoŭ viartajemsia ŭ Kalininhrad, a adtul — u biełaruskuju stalicu. Ci, pavodle raskładu, my lacim z Kalininhrada ŭ Hrodna, adkul pieravozim pasažyraŭ u Kalininhrad i potym viartajemsia ŭ Minsk. «Biełavija», da prykładu, lataje ŭ Kalininhrad biez pasadki ŭ abłasnych centrach. Hetak ža my možam arhanizavać čarterny rejs u luby nasieleny punkt Rasii.

«NN»: A ci hatovyja vy latać u Jeŭropu?

IZ: U Jeŭropie na našych samalotach latać možna i jany latajuć, ale dla hetaha patrabujecca techničnaja dapracoŭka. Našy samaloty pralacieć u Jeŭropu pakul nie mohuć. I my ciapier dumajem, ci varta ŭkładvać hrošy ŭ pieraabstalavańnie avijasudoŭ, abo ŭsio-tki pierachodzić na inšyja typy samalotaŭ, jakija adpaviadajuć i jeŭrapiejskim standartam.

«NN»: Jakija i kolki samalotaŭ u vašym parku?

IZ: Siońnia my ekspłuatujem dva samaloty AN-24. Bolš pakul nie patrabujecca. Ale na bałansie jość jašče dadzienyja madeli.

Heta była nadziejnaja technika. Jana siabie stanoŭča zarekamiendavała va ŭsim śviecie. Hetyja samaloty latajuć i ŭ Azii, i ŭ Afrycy, i ŭ Jeŭropie, i ŭ Łacinskaj Amierycy. Ale čas niaŭmolny. I technika maralna stareje. AN-24 nadziejny, ale pa ŭzroŭni kamfortu, pa chutkasnych paramietrach sastupaje inšym typam samalotaŭ.

«NN»: Samaloty maralna sastareli. A kolki jany ŭžo ekspłuatujucca i kolki im zastałosia latać?

IZ: Samalotam za tryccać hadoŭ. Dla avijacyi heta nie krytyčny termin. Na techničnym stanie ŭzrost absalutna nie adbivajecca. My płanava pravodzim tyja ramontnyja pracy, jakija nieabchodna pravodzić zhodna z patrabavańniami, što pradjaŭlajucca normami pa biaśpiecy ekspłuatacyi. Samaloty ŭ spraŭnym stanie, choć i znachodziacca ŭ pavažnym uzroście.

«NN»: Niahledziačy na adsutnaść kankurentaŭ u rehijanalnych avijapieravozkach, vy sutykajeciesia z prablemami?

IZ: Samyja vialikija prablemy, biezumoŭna, — heta finansavyja. Ale my imkniomsia znajści kampramisnyja varyjanty, kab zachavać tuju strukturu, jakaja isnuje. Ciapier pravodzicca rearhanizacyja, jakaja dazvolić zachavać pracoŭny kalektyŭ, budynki. Paśla rearhanizacyi, jakaja prajšła bolš za hod nazad, častka budynkaŭ pierajšła da filijała «Biełaeranavihacyi». I heta dazvoliła pačać ich rekanstrukcyju. Našy kalehi finansava bolš ustojlivyja. U ich jość mahčymaść układvać srodki ŭ infrastrukturu. Ciapier, da prykładu, idzie ramont na ŭźlotnaj pałasie. Zadača ž «Homielavija» — iści da pieraabstalavańnia pavietranaha parku. My pravodzim rearhanizacyju dla taho, kab pamienšyć finansavuju nahruzku, jakuju my niasiom. I heta dapamoža nam zachavać pracoŭny kalektyŭ, pierajści na novyja typy pavietranych sudoŭ i, viadoma, budziem pracavać nad źnižeńniem koštu avijapieralotaŭ. A heta pryviadzie da stvareńnia novaj maršrutnaj sietki abo viartańnia da toj, što była ŭ raniejšyja časy. Heta dazvolić stać avijakampanii jakasna inšaj.

«NN»: A ŭ čym zaklučajecca rearhanizacyja?

IZ: Častka srodkaŭ i častka pracoŭnaha kalektyvu pierachodziać u susiedniaje pradpryjemstva «Biełaeranavihacyju», jakoje pracuje ŭ tym ža kirunku, što i «Homielavija». «Biełaeranavihacyi» ŭžo naležyć aeraport. I častka našaha kalektyvu prosta pamianiaje nazvu pradpryjemstva, na jakim budzie pracavać.

«NN»: Adzin sa šlachoŭ chutkaha rašeńnia finansavych pytańniaŭ — pryciahnieńnie inviestaraŭ. Šukajcie dapamohi takim sposabam?

IZ: Jość prapanovy ź inviestycyjami i da nas. Ale pakul nie budu ahučvać nijakaj infarmacyi. Varyjanty znachodziacca jašče ŭ pracoŭnym stanie.

Avijacyja — finansava jomistaja halina. Košt samalota biez uliku vydatkaŭ na pieranavučańnie ekipaža i h.d. składaje niekalki miljonaŭ dalaraŭ. I tamu adnym składana. Jość varyjanty, ale vyniki ahučvać rana.

Hutaryŭ Siarhiej Makarevič

***

«Biełaeranavihacyja» dziaržaŭnaje pradpryjemstva, jakoje zajmajecca aeranavihacyjnym absłuhoŭvańniem pavietranaha ruchu. Uźloty i pasadki, pašpartny kantrol i pamiežnaje afarmleńnie. «Biełaeranavihacyi» naležać aeraporty Homiela, Hrodna, Mahilova, Viciebska i Bresta. «Homielavija» akazvaje inžynierna-avijacyjnyja pasłuhi, zajmajecca šturmanskim zabieśpiačeńniem, zabieśpiačeńniem avijaHZM.

• 0
• 0
• 0
• 0
• 0
• 0
• 0
• 0