Razhlad kasacyjnaj skarhi ab vyniasieńni dvuch śmiarotnych prysudaŭ padoŭžany na miesiac

Vyniasieńnie Viarchoŭnym sudom vierdyktu pa kasacyjnych skarhach pryhavoranych Hrodzienskim abłsudom da śmiarotnaj kary dvuch žycharoŭ Hrodna adkładvajecca.

Jak paviedamiŭ BiełaPAN pamočnik staršyni Viarchoŭnaha suda Alaksandr Rudzienka, pryniata rašeńnie pradoŭžyć vyvučeńnie materyjałaŭ spravy na miesiac.

Pasiadžeńnie suda pa hetaj spravie moža adbycca aryjencirovačna ŭ pačatku vieraśnia.

Nahadajem, pryhavor pa spravie ab zabojstvie troch čałaviek 14 kastryčnika 2009 hoda byŭ abvieščany ŭ abłasnym sudzie 14 maja 2010 hoda. Złačynstva było ŭčyniena nočču ŭ kvatery 2-ha korpusa doma № 8 pa vulicy Kabiaka ŭ Hrodnie. Tam pažarnyja, jakija prybyli likvidavać uzharańnie, znajšli trupy 65-hadovaha haspadara, jaho 34-hadovaj niaviestki i jaje 52-hadovaj znajomaj. Źnik syn maładoj žančyny — piacikłaśnik.

Śledstva ŭstanaviła, što 28-hadovy i 29-hadovy raniej sudzimyja žychary Hrodna źjavilisia ŭ kvatery pozna ŭviečary 13 kastryčnika pad markaj sumiesnaha raśpivańnia śpirtnych napojaŭ, majučy namier zavałodać majomaściu haspadaroŭ.

Pryblizna, a 2-j hadzinie 14 kastryčnika jany pasvarylisia z haspadarami, kuchonnym nažom zabili piensijaniera. Zatym złačyncy zabili i žančyn, školniku pryhrazili zabojstvam u vypadku, kali jon kamuści raskaža pra ŭbačanaje. Paśla hetaha padpalili kvateru i ŭciakli, prychapiŭšy z saboj kampjuter, inšyja rečy i dzicia.

Sprabujučy adjechać dalej ad Hrodna, złačyncy spynili taksi i prapanavali vadzicielu advieźci ich u Minsk abo Maskvu, majučy namier raźličycca ź im vykradzienym kampjuteram. Atrymaŭšy admovu, pryhrazili zabić i navat sprabavali ŭdaryć jaho nažom, adnak lohkaparanienamu taksistu ŭdałosia ŭciačy.

Zatym złačyncy pasprabavali vyhnać «Aŭdzi-80» na nieachoŭnaj stajancy na vulicy Piestraka, ale zrabić heta im nie ŭdałosia. Z sałona jany vykrali vadzicielskaje paśviedčańnie ŭładalnika, techpašpart na aŭtamabil i inšyja dakumienty.

Paśla hetaha maładyja ludzi ź dziciem nakiravalisia ŭ kvateru adnaho ź ich, kab abmierkavać dalejšyja płany, dzie ich i zatrymała milicyja.

Abłasny sud pryznaŭ abodvuch vinavatymi va ŭčynieńni złačynstvaŭ, praduhledžanych pp. 1, 6, 12, 15 č. 2 art. 139 (zabojstva dvuch i bolš asob z asablivaj žorstkaściu, spałučanaje z razbojnym napadam, učynienaje hrupaj asob), č. 3 art. 207 (razboj z pryčynieńniem ciažkich cialesnych paškodžańniaŭ), č. 2 art. 218 (naŭmysnaje paškodžańnie majomaści šlacham padpału), pp. 1, 6 č. 2 art. 182 (vykradańnie małaletniaha hrupaj asob), č. 2 art. 207 (razbojny napad), č. 1 art. 14 i č. 2 art. 205 (zamach na kradziež aŭtamašyny), art. 378 (kradziež dakumientaŭ) Kryminalnaha kodeksa.

Kasacyjnyja skarhi ŭ Viarchoŭny sud byli padadzieny ŭ kancy maja.

• 0
• 0
• 0
• 0
• 0