Na siońnia abvieščana štarmavoje papiaredžańnie

Pavodle infarmacyi Respublikanskaha hidramieteacentra, 28 lipienia na bolšaj častcy terytoryi krainy čakajucca navalnicy, u druhoj pałovie dnia — škvalistaje ŭzmacnieńnie vietru padčas navalnic da 15–20 mietraŭ u siekundu, miescami — da 25–28 m/s.

U asobnych rajonach mahčymy mocnyja liŭni, hrad.

U stalicy siońnia taksama čakajucca navalnicy, u druhoj pałovie dnia — paryvy vietru da 17–22 m/s.

29 lipienia sinoptyki prahnazujuć vobłačnaje z prajaśnieńniami nadvorje. Na bolšaj častcy terytoryi projduć karotkačasovyja daždžy, pa ŭschodniaj pałovie miescami mocnyja daždžy. U asobnych rajonach navalnicy, dniom miescami pa ŭschodzie mahčymy hrad. Viecier paŭdniovy ź pierachodam na zachodni 5–10 m/s, pry navalnicach paryvy da 15–20 m/s. Tempieratura pavietra nočču 13–20°S, dniom 18–25°S, pa ŭschodzie da 28°S.

***

Ci mahčymyja ŭ Biełarusi ŭrahany?

U Zachodniaj Čechii ŭpieršyniu zafiksavanaje tarnada — słup-vichor, jaki my časta bačym u amierykanskich navinach. Jaho nazirali žychary vioski Čysta la horada Rakoŭnik. Achviaraŭ niama, vichor minuŭ viosku, pavyvaročvaŭšy drevy ŭ navakolnych lasach.

Toje, što tarnada ŭtvaryŭsia ŭ Jeŭropie, paćviardžaje teoryju paskareńnia pracesu klimatyčnych źmianieńniaŭ i hłabalnaha paciapleńnia na płaniecie. Bo tarnada charakternyja dla terytoryj, na jakija upłyvaje vilhotny trapičny klimat. Što ich vyklikaje — da kanca nie jasna. Słup, jaki niščyć i ŭsmoktvaje ŭsio, što sustrakaje na šlachu, utvarajuć pavietranyja masy, jakija ruchajucca z roznaj chutkaściu na roznaj vyšyni. Kab razabracca ŭ miechaniźmie ŭtvareńnia detalna, treba trapić usiaredzinu słupa. Amierykanskija navukoŭcy raspracoŭvajuć dla hetaha śpiecmašynu, nakštałt tanka, ale dastatkova chutkuju, kab dahnać tarnada. (Chutkaść jaho ruchu — 40–65 km/h.)

U Biełarusi taksama niekalki tydniaŭ trymałasia haračaje nadvorje. A zaraz da nas iduć chałodnyja i vilhatniejšyja masy pavietra z Zachodniaj Jeŭropy. Sutyknieńnie z haračym pavietram moža vyklikać mahutnyja navalnicy pa ŭsioj krainie, kaža hałoŭny sinoptyk Biełhidramieteacentra Volha Fiadutava. «Biezumoŭna, my nie čakajem hrandyjoznych urahanaŭ, jakija adbyvajucca ŭ paŭdniovych krainach. Adnak i nie vyklučajem takich pryrodnych źjavaŭ navat i ŭ Biełarusi. Budziem adsočvać situacyju i adrazu ž davać papiaredžańni», — adznačyła V.Fiadotava.

Pavodle słovaŭ śpiecyjalista, chutkaść vietra padčas navalnic moža dasiahać 20 m/s. Da ŭzroŭniu štarmavoha vietra, zdolnaha ździrać strechi, nie chapaje ŭsiaho 0,7 m/s. A ŭrahannym ličycca viecier ad 32,6 m/s.

AP

• 0
• 0
• 0
• 0
• 0