Buraŭkin u śpioku nie piša, a Ryžkoŭ «dabivaje» debiutny zbornik

Nad čym ajčynnyja litaratary pracujuć u čas letnich vakacyjaŭ?

Hienadź Buraŭkin: Ni nad čym nie pracuju. Śpiakotu takuju pieranošu ciažka. Tamu addajusia čytańniu. Pieračytvaju Jakuba Kołasa, Janku Kupału, Ivana Bunina… Čytaju presu.

Adam Hłobus: U nas ža nie sielskahaspadarčy cykł u litaratury. Piśmieńniki zaŭždy pracujuć. Ja havaru pra sapraŭdnych piśmieńnikaŭ, a nie pra chałturščykaŭ. Skieptyčna staŭlusia da pieryjadyčnych vydańniaŭ. Tamu pracuju nad błoham. Pišu cykł «Sučaśniki» (nie sučaśniki), jakija mnie darahija. Anatol Sys, Luda Rusava…

Vital Ryžkoŭ: Dapracoŭvaju svaju pieršuju knihu, jakaja, spadziajusia, vyjdzie da kanca hetaha hoda. Jana budzie mieć nazvu «Dźviery, zamknionyja na klučy». Redahuju najpierš pierakłady i ŭłasnyja teksty. U knihu ŭvojduć pierakłady z Uistana Chju Odena, Siarhieja Žadana, Tejłara Meli, Majkła Selindžera, Hieorhija Nachucryšvili i Ryšarda Krynickaha.

Siarhiej Dubaviec: Składaju hipiertekst «M. Historyja adnaho cudu» pra Biełaruskuju Majstroŭniu (1980-1984). Frahmienty vychodziać štotydzień na radyjo «Svaboda». Vynik uziać u ruki i prezientavać miarkuju na Kalady.

Andrej Kurejčyk: Pracuju nad scenaram kamiedyi dla pradziusiera Siarhieja Sialjanava i rasijskaj kinakampanii STV (vypuściła filmy «Manhoł», «Brat», «Brat-2», «Asablivaści nacyjanalnaha palavańnia»). Taksama pišu pjesu pad nazvaj «Minsk, ja lublu ciabie» dla cikavaha prajekta adnaho ź minskich teatraŭ.

Alhierd Bacharevič: Pracuju nad «Małoj miedyčnaj encykłapiedyjaj Bachareviča». Artykuły encykłapiedyi publikujucca kožnuju piatnicu na sajcie radyjo «Svaboda». Na siońnia ich užo dvaccać siem. U vyniku budzie zbornik ese na litaraturna-miedyčnyja temy. Aprača taho, pierakładaju adzin toŭsty sučasny niamiecki raman, siužetna taksama źviazany ź miedycynaj.

Viera Burłak: Adpačyvaju. Niekalki vieršaŭ napisała.

Uładzimir Arłoŭ: Pieršyja dva letnija miesiacy pracavaŭ nad praciaham knihi «Adkul naš rod». Ciapier kniha budzie ŭ try razy bolšaja pa abjomie, čym pieršaje vydańnie. Jana zaviaršajecca padziejami, jakija pryviali da niezaležnaści Biełarusi. Pisalisia vieršy, rabilisia nakidy da ramanu, jaki maru napisać.

• 0
• 0
• 0
• 0
• 0