Biełaruś pakul nie dałučyłasia da kanviencyi ab zabaronie na kasietnyja bomby

1 žniŭnia nabyła moc Kanviencyja AAN pa kasietnych bojeprypasach. Jana była padpisanaja ŭ Dublinie 30 maja 2008 hoda i adkrytaja dla dałučeńnia ŭ Osła ŭ śniežni taho ž hoda.

Udzielnikami Kanviencyi źjaŭlajucca 107 krain, 37 ź ich jaje ratyfikavali. U adpaviednaści z dakumientam kožnaja dziaržava-ŭdzielnica abaviazvajecca nikoli i ni pry jakich akaličnaściach nie prymianiać kasietnyja bojeprypasy; nie raspracoŭvać, nie vyrablać, nie nabyvać inšym čynam, nie nazapašvać, nie zachoŭvać i nie pieradavać nikomu, prama abo apasrodkavana, kasietnyja bojeprypasy.

Biełaruś pakul nie dałučyłasia da kanviencyi.

Takuju pazicyju krainy ŭ hutarcy z karespandentam BiełaPAN pradstaŭnik mižnarodnaj kampanii za zabaronu kasietnych bojeprypasaŭ, dyrektar HA «Centr SKAF», člen Hramadska-kansultatyŭnaha savieta pry Administracyi prezidenta Biełarusi Juryj Zahumiennaŭ rastłumačyŭ dźviuma akaličnaściami.

Pa-pieršaje, skazaŭ jon, heta mierkavańni nacyjanalnaj biaśpieki. Pa-druhoje, u krainy zaraz majecca bolš pryjarytetnaja zadača — źniščeńnie ŭ adpaviednaści sa svaimi abaviazacielstvami ŭ miežach Ataŭskaj kanviencyi 3,5-miljonnaha arsienała supraćpiachotnych mir typu PFM-1.

Z hetaj zadačaj nie ŭdajecca spravicca z 2004 hoda. Pa vynikach dvuch praviedzienych tenderaŭ Jeŭrakamisija pakul tak i nie zmahła vyznačycca z vykanaŭcam rabot, na jakija hatova vydzielić 4 miljony jeŭra. Utylizacyja biełaruskich zapasaŭ PFM-1 pavinna była zaviaršycca ŭ 2008 hodzie.

Pavodle słoŭ Zahumiennava, Biełaruś raździalaje humanitarnyja mety kanviencyi, ale pakul nie moža sabie dazvolić pryniać abaviazacielstvy, uličvajučy žorstkija ramki dakumienta, u pryvatnaści pa terminach źniščeńnia kasietnych bojeprypasaŭ. Taki padychod zasnoŭvajecca na vopycie vykanańnia Ataŭskaj kanviencyi i Dahavora ab zvyčajnych uzbrojenych siłach u Jeŭropie, miarkuje śpiecyjalist.

Razam z tym, paviedamiŭ Zahumiennaŭ, Biełaruś biare ŭdzieł u padrychtoŭcy «bolš miakkaha» prajekta Pratakoła ab zabaronie kasietnych bojeprypasaŭ da Kanviencyi AAN ab kankretnych vidach zvyčajnaj zbroi. Dakumient zabaraniaje peŭnyja vidy zvyčajnych uzbrajeńniaŭ, jakija, ličycca, nanosiać praźmiernyja paškodžańni abo majuć nievybiralnaje dziejańnie. Praca viadziecca sumiesna z krainami, jakija nie dałučylisia da bazavaj kanviencyi, — ZŠA, Rasijaj, Kitajem, Indyjaj i inšymi.

• 0
• 0
• 0
• 0
• 0
• 0
• 0
• 0