Chto vałodaje biełaruskimi bankami

Asnoŭnyja zamiežnyja hulcy ŭ bankaŭskim siektary Biełarusi — heta Rasija, Šviejcaryja i Kipr.

Pryvatyzacyja bujnych dziaržaŭnych bankaŭ, takich jak «Biełarusbank», «Bielinviestbank» i «Biełahraprambank», — patencyjalnaje ratavańnie dla ŭłady, źbieražonaje na čorny dzień. Kab atrymać paru miljardaŭ dalaraŭ, dastatkova pradać amal pałovu akcyj, ale pakinuć sabie kantrolny pakiet.

Toje, što dziaržava ŭpeŭniena kantraluje situacyju ŭ bankaŭskim siektary, paćviardžaje niaŭmolnaja statystyka. Zamiežny kapitał prysutničaje ŭ statutnych fondach ažno 26-ci z 31-ho zarehistravanaha ŭ krainie banka. Ale pry hetym tolki 27% bankaŭskich hrošaj naležać zamiežnikam. Astatnija 73% — dola dziaržavy ci nabližanych da ŭłady biznesoŭcaŭ.

Biełaruskija banki

Jak užo było adznačana vyšej, «Biełarusbank», «Biełahraprambank» i «Bielinviestbank» zachoŭvajuć dziaržaŭnuju «prapisku». Cikava, što ŭsie jany — pradstaŭniki TOP-3 bankaŭ pa pamierach aktyvaŭ. Ich sumiesnaje bahaćcie pieravyšaje $20 miljardaŭ. Usie astatnija banki, skłaŭšysia, mahli b naskrebci tolki $8 miljardaŭ.

Pieršym u čarzie na prodaž staić «Bielinviestbank». Jaho chočuć pradać jeŭrapiejcam za $530 miljonaŭ. Ździełku mierkavali ažyćciavić da kanca pieršaha paŭhodździa, ale voz staić na raniejšym miescy da hetaha času… Da banka prajaŭlaŭ cikavaść adzin z bujnych niamieckich bankaŭ, ale, pavodle jaho stratehii, jon byŭ hatovy nabyvać adrazu nie pakiet akcyj u im, a bank całkam. Spačatku Biełaruś na toje nie išła. Ciapier sprava moža zrušycca: dziaržava hatova rasstacca z kantrolnym pakietam akcyj.

Astatnija dva bankaŭskija hihanty kali i buduć raspradavacca, to tolki pa častkach. Dziaržava hatovaja addać maksimum 25% akcyj kožnaha.

Nie maje zamiežnaha kapitału i «Parytetbank». Darečy, stvareńnie Nacbanka vyznačajecca samymi niavyhadnymi kursami abmiena valut.

Farmalna asnoŭnym akcyjanieram «RRB-Banka» źjaŭlajecca Jeŭrapiejski bank rekanstrukcyi i raźvićcia z 25% akcyj. Ale sapraŭdny kiraŭnik — heta biznesoviec z typova biełaruskim proźviščam V.Cybulin. Niepasredna jon vałodaje 18% akcyj banka, jašče 24% naležać padkantrolnaj jamu firmie «Dykrys».

Svoj ułasny bank maje «Handlovy centr «Ždanovičy». Naziralnuju radu rynka, a značyccca i «Jeŭrabank», ciapier uznačalvaje Vital Kuryła. Cikava, što pamočnikam člena savieta dyrektaroŭ źjaŭlajecca Siarhiej Jaŭhienavič Šyhałaŭ — syn skandalna viadomaha byłoha kiraŭnika «Ždanovič». Nahadajem, što Jaŭhien Šyhałaŭ byŭ vypuščany na svabodu paśla taho, jak vypłaciŭ šmatmiljonnuju sumu i paabiacaŭ udzielničać u pabudovie ladovaha pałaca ŭ minskaj Čyžoŭcy.

«Trastbank» uznačalvaje Viktar Šaŭcoŭ — uładalnik biznes-centraŭ i muzieja «Dudutki». Jahony bank u svoj čas byŭ abvinavačany amierykanskimi ŭładami ŭ dapamozie pa admyvańni hrošaj Sadama Chusiejna, a ciapier bankir pieraklučyŭsia na supracoŭnictva ź Iranam i Vieniesuełaj.

«Technabankam», jaki niadaŭna abjadnaŭsia ź Biełaruskim industryjalnym bankam, vałodaje siamja Kacarenkaŭ. Uładzisłaŭ i Alena skancentravali ŭ svaich rukach najbolšuju dolu akcyj. Darečy, muž — adzin z namieśnikaŭ Siarhieja Hajdukieviča ŭ Libieralna-demakratyčnaj partyi Biełarusi.

Rasijska-biełaruskim možna nazvać «MTBank». Jaho asnoŭnym akcyjanieram (64%) źjaŭlajecca aŭtamabilny chołdynh «Atłant-M», aficyjny dyler kampanij «Ford» i «Falksvahien» u Biełarusi. Siarod kiraŭnictva kampanii — i biełarus Aleh Chusajenaŭ, i rasijanin Ihar Malhin. Jašče tracina akcyj naležyć kiprskaj kampanii Monister Investments Ltd, jakaja ŭvachodzić u skład amierykanskaha inviestycyjnaha fondu.

Rasijskija banki

Na rynak našaj krainy paśpieli vyjści, zdajecca, usie bankaŭskija hihanty Rasii. Padrabiazna pra rasijskija banki «Naša Niva» pisała ŭ №26 za 14 lipienia. Ciapier — u ścisłym vyhladzie.

«Maskva-Minsk» kantralujecca ŭradam Maskvy i miljanieram Andrejem Baradzinym.

98% akcyj «Biełhazprambanka» naležyć rasijskamu «Hazprombanku».

Tyja ž 98% akcyj maje rasijski «Vniešekonombank» u biełaruskim «Biełźniešekanambanku».

«Alfa-bank» znachodzicca va ŭłasnaści aliharcha Michaiła Frydmana, jaki vykupiŭ jaho ŭ Nacbanka i niepalskich biznesoŭcaŭ.

Prodaž «Biełprambudbanka» — hordaść biełaruskaj ułady. Pakupnik, rasijski «Śbierbank», vykupiŭ 93% akcyj za $280 miljonaŭ.

«Biełrasbank» — na ŭsie 100% naležyć «Rosbanku». Kantrolny pakiet akcyj rasijskaha banka maje francuzskaja inviestycyjnaja hrupa, a reštu — aliharch Uładzimir Patanin.

«Bank VTB» naležyć rasijcam na 71%.

Jeŭrapiejskija banki

Z bujnych biełaruskich bankaŭ naležyć jeŭrapiejcam pakul što tolki «Pryjorbank». Jon byŭ kupleny aŭstryjskaj finansavaj hrupaj «Rajfazen» paraŭnalna daŭno, jašče ŭ 2003 hodzie.

Polskaja prysutnaść u bankaŭskim siektary našaj krainy abmiažoŭvajecca dziejnaściu małoha «Sombiełbanka». Miljarder Lešak Čarniecki i padnačaleny jamu Geting Holding vałodaje 75% akcyj banka.

«Deltabank» maje ŭkrainskaje pachodžańnie. Jaho ŭłaśnik Mikałaj Łahun maje adnajmienny bank i na terytoryi našaha paŭdniovaha susieda.

Kali rasijskija ŭstanovy vyznačajucca i kolkaściu, i pamieram aktyvaŭ, to šviejcarskija — tolki kolkaściu. U našaj krainie try banki, ale ŭsie paraŭnalna nievialikija. Heta «Cepter-Bank», na čale jakoha staić uładalnik biznes-impieryi Filip Cepter, «BiełŚvisBank», jakim kirujuć try akcyjaniery — usie šviejcarcy, — i «Kredeksbank». Darečy, apošni ź ich da 1 kastryčnika hetaha hoda pavialičycca, bo ŭ jaho skład uvojdzie samy maleńki biełaruski bank — Mižnarodny reziervovy bank, jaki raniej naležyŭ kiprskim biznesoŭcam.

Paśla chutkaha źniknieńnia hetaha banka kiprskaje pradstaŭnictva na terytoryi Biełarusi zastaniecca nievialikim. Adzinym ihrakom zastaniecca sumnaviadomy «Absalutbank», pra isnavańnie jakoha biełarusy daviedalisia paśla šerahu hučnych rabavańniaŭ abmieńnikaŭ banka. Kiprskija inviestycyjnyja kampanii vałodajuć 88% akcyj.

«Biełaruski narodny bank» jašče niadaŭna mieŭ na emblemie vieršnika z «Pahoniaj» i biełaruskamoŭny nazoŭ. Ciapier emblema źmianiłasia — ci to na vyjavu sabaki, ci to na lva. Uładalnik zastaŭsia raniejšym — Bank Hruzii.

Najbolš šmatnacyjanalny kapitał pradstaŭleny ŭ Biełaruskim banku małoha biznesu. Siarod akcyjanieraŭ — niamieckija, hałandskija, šviedskija i amierykanskija kampanii. Internacyjanalny i «ChoumKredytBank» — jon karystajecca hrašyma mižnarodnaj hrupy kampanij PPF.

Azijackija banki

Iranskija hrošy kruciacca ŭ «Anerbanku» i «TK Banku». Nievialikuju častku akcyj — 2,39% apošniaha — maje aŭtamabilnaja kampanija «Łada OMS — Chołdynh». Bank z pryhožaj nazvaj «Załaty taler» uvosień 2008 hoda byŭ na 99,9% vykupleny livanskaj kampanijaj Fransaholding. Uśled za pakupkaj adbyłosia i pierajmienavańnie ŭ «Fransabank».

Narešcie, «BTA Bank» — daččynaje padraździaleńnie adnajmiennaha kazachstanskaha banka.

• 0
• 0
• 0
• 0
• 0
• 0
• 0
• 0