Sidorski zapiarečyŭ Prakapoviču

Biełaruś hatova źviarnucca pa dapamohu da MVF u vypadku nieabchodnaści, zajaviŭ prem'jer-ministr Siarhiej Sidorski 6 žniŭnia na sustrečy z pastajannym pradstaŭnikom Mižnarodnaha valutnaha fondu ŭ Biełarusi Natallaj Kaladzinaj.

Na dumku prem'jer-ministra, MVF i Biełaruś «vybudavali dobruju prahramu». Jon padkreśliŭ, što ŭ miežach vykanańnia prahramy biełaruski bok imknuŭsia prymać miery pa maksimalnaj libieralizacyi ekanomiki. «Heta nie łozunh, heta była ŭzvažanaja praca ŭrada pa libieralizacyi», — adznačyŭ premjer.

Jon taksama padkreśliŭ, što Biełaruś aktyvizavała praces pryvatyzacyi. U adpaviednaści z abaviazacielstvami pierad MVF u vieraśni-kastryčniku adbuducca konkursy pa prodažy akcyj piaci biełaruskich pradpryjemstvaŭ. Akramia hetaha, zaraz idzie aktyŭny praces pieraŭtvareńnia pradpryjemstvaŭ roznych form ułasnaści ŭ AAT.

Sidorski nahadaŭ, što ŭłady Biełarusi aktyŭna abmiarkoŭvajuć pytańnie stvareńnia śpiecyjalizavanaha finansavaha ahienctva. Praciahvajecca praca ŭrada z Nacbankam i vyrašajucca pytańni pa stvareńni ŭmoŭ dla raźvićcia ekanomiki, bankaŭ i pryciahnieńnia inviestaraŭ. «Usio heta havoryć pra toje, što my šmat z vami zrabili», — zajaviŭ Sidorski.

Prem'jer-ministr padkreśliŭ, što «ekanomika Biełarusi na ŭzdymie». «My zakončyli paŭhodździe z rostam VUP bolš jak 6%», — padkreśliŭ jon. Urad, pavodle jaho słoŭ, raźličvaje da kanca hoda vyjści na značnyja tempy rostu ekanomiki z tym, kab «zakłaści asnovy dla dalejšaha rostu ŭ nastupnaj piacihodcy».

Natalla Kaladzina, u svaju čarhu, zhadziłasia, što ŭ miežach prahramy stand-by pamiž Biełaruśsiu i MVF «było zroblena vielmi šmat». Razam z tym, padkreśliła jana, nieabchodna «nie stracić toje, što było zroblena ŭ ramkach prahramy, a vykarystoŭvać heta, kab biełaruskaja ekanomika dasiahnuła vysokich i ŭstojlivych tempaŭ rostu, a taksama dla zachavańnia makraekanamičnaj stabilnaści».

Nahadajem, u kancy sakavika 2010 hoda Biełaruś atrymała apošni tranš kredytu MVF na 670 młn. dołaraŭ pa prahramie kredytavańnia stand-by u 3,5 młrd. dołaraŭ, zaćvierdžanaj u kancy 2008 hoda.

29 lipienia na pres-kanfierencyi ŭ Minsku kiraŭnik Nacbanka Piotr Prakapovič zajaviŭ, što siońnia adsutničaje nieabchodnaść dla pryciahnieńnia ŭ Biełaruś novych kredytaŭ Mižnarodnaha valutnaha fondu. «Što da abmierkavańnia realnaj prahramy z MVF i ci budzie jana, hetaje pytańnie budzie vyrašacca padčas nastupnych misij. Pakul pytańnie ab pryciahnieńni novych zapazyčańniaŭ nie abmiarkoŭvajecca», — zajaviŭ Prakapovič.

Kiraŭnik Nacbanka padkreśliŭ, što «MVF nikomu nie vydzialaje resursy biez vykanańnia asablivych umoŭ, a hetyja ŭmovy nie zaŭsiody sadziejničajuć ekanamičnamu raźvićciu krainy. Tamu da MVF mała chto źviartajecca».

• 0
• 0
• 0
• 0
• 0
• 0
• 0
• 0