U Jerevanie adkryvajecca niefarmalny samit ADKB

Siońnia ŭ Jerevanie adkryvajecca dvuchdzionny niefarmalny samit Arhanizacyi Dahavora ab kalektyŭnaj biaśpiecy (ADKB).

Jak paviedamiŭ žurnalistam napiaredadni samita pamočnik prezidenta Rasii Siarhiej Prychodźka, uličvajučy niefarmalny charaktar mierapryjemstva, luby z prezidentaŭ zmoža vynieści dadatkovyja pytańni na abmierkavańnie.

«Tak, naprykład, płanujecca, što prezident Rasii, jaki ciapier źjaŭlajecca staršynioj Savieta kalektyŭnaj biaśpieki ADKB, uzhodnić z astatnimi kiraŭnikami dziaržaŭ daty praviadzieńnia ŭ Maskvie čarhovaj siesii Savieta kalektyŭnaj biaśpieki ADKB», — skazaŭ Prychodźka.

Jon taksama paviedamiŭ, što «pa tradycyi pa vynikach niefarmalnaha samita nie praduhledžvajecca pryniaćcia jakich-niebudź dakumientaŭ». «Tym nie mienš, — padkreśliŭ Prychodźka, — lidery dziaržaŭ — členaŭ ADKB, niesumnienna, nadaduć impuls padrychtoŭcy rašeńniaŭ budučaha samita, a, mahčyma, jak heta było paśla sustrečy ŭ 2008 hodzie ŭ Baravym u Kazachstanie, vyjduć na novyja, praryŭnyja rašeńni.

Siońniašni samit — čaćviortaja pa liku niefarmalnaja sustreča ŭ historyi ADKB. Pieršaja adbyłasia ŭ śniežni 2008 hoda ŭ Baravym (Kazachstan), druhaja — u kancy lipienia — pačatku žniŭnia ŭ Čałpon-Acie (Kyrhyzstan), treciaja — u mai 2010 hoda ŭ Maskvie.

U prahramie ciapierašniaha samita zapłanavany jak rabočyja mierapryjemstvy, tak i kulturnyja — prezidenty naviedajuć voziera Sievan. U ramkach jerevanskaj sustrečy mahčyma praviadzieńnie asobnych dvuchbakovych sustreč prezidentaŭ, adznačyŭ Prychodźka.

U samicie ŭdzielničaje Alaksandr Łukašenka. Pra heta paviedamiŭ kiraŭnik pres-słužby prezidenta Biełarusi Pavieł Lohki. Razam z tym jon nie staŭ adkazvać na pytańnie ab terminach vizitu Łukašenki ŭ Armieniju.

Jak paviedamlałasia raniej, prezident Biełarusi znachodzicca ŭ Armienii jak minimum z 18 žniŭnia — heta paćvierdziła pres-słužba armianskaha prezidenta. Adnak nijakaj infarmacyi pra jaho znachodžańnie ŭ Armienii nie dajuć ni biełaruskija, ni armianskija krynicy.

Viečaram 19 žniŭnia ŭ Jerevan prybyŭ prezident RF Dźmitryj Miadźviedzieŭ. Jon naviedvaje Armieniju ź dziaržaŭnym vizitam, paśla čaho voźmie ŭdzieł u samicie ADKB.

Na minułym tydni rasijskija ŚMI sa spasyłkaj na Kreml paviedamili, što Miadźviedzieŭ nie maje namieru pravodzić dvuchbakovuju sustreču z Łukašenkam.

Varta taksama adznačyć, što 18 žniŭnia namieśnik kiraŭnika kramloŭskaj administracyi Alaksiej Hromaŭ paćvierdziŭ hatoŭnaść Maskvy apublikavać stenahramu z abiacańniami prezidenta Biełarusi pryznać Abchaziju i Paŭdniovuju Asieciju, jakija byli dadzienyja na adnym z pasiadžeńniaŭ kiraŭnikoŭ dziaržaŭ ADKB.

• 0
• 0
• 0
• 0
• 0
• 0
• 0
• 0