«Jeŭraradyjo» vyśvietliła proźvišča biełarusa, jaki vyjhraŭ spravu suprać Francyi ŭ Jeŭrapiejskim sudzie pa pravach čałavieka.
Pračytańnie poŭnaj viersii vierdyktu (jon dastupny tolki na francuzskaj movie) nie pakidaje sumnievaŭ, što za inicyjałami YP staić Juryj Pčelnik. Sud pastanaviŭ, što Francyja nie maje prava departavać siamju Juryja ŭ Biełaruś, bo tam im pahražajuć represii, što supiarečyć 3 artykułu Jeŭrapiejskaj kanviencyi ab abaronie pravoŭ čałavieka.
Juryj Pčelnik źjaŭlaŭsia staršynioj mahiloŭskaha adździaleńnia partyi KCHP BNF (a nie Partyi BNF, jak paviedamlałasia raniej), jon źviedaŭ šmatrazovyja aryšty, žorstkija źbićci i cisk z boku siłavych struktur, što paćvierdžana ŭ sudzie dakumientacyjaj pravaabarončych arhanizacyj.
Vyjhryš biełarusa ŭ Jeŭrapiejskim sudzie — nadzvyčaj redkaja padzieja. Heta čaćviorty vypadak pieramohi biełarusaŭ za apošnija dva hady. Biełaruś — adzinaja jeŭrapiejskaja kraina, hramadzianie jakoj nie mohuć šukać spraviadlivaści ŭ Jeŭrapiejskim sudzie i abarony ad pravavoha biaźmiežža sudovych i inšych dziaržaŭnych orhanaŭ Biełarusi, bo naša kraina nie ŭvachodzić u Radu Jeŭropy i nie padpisała Jeŭrapiejskuju kanviencyju pravoŭ čałavieka. Biełarusy mohuć sudzicca tolki ź inšymi jeŭrapiejskimi krainami, jakija padpisali Kanviencyju (a heta ŭsie jeŭrapiejskija krainy, akramia Vatykana i Kosava).
Kamientary