Urad FRH: Biełarusy zasłuhoŭvajuć, kab dźviery ŭ Jeŭropu dla ich zastavalisia adčynienymi
«Biełarusy zasłuhoŭvajuć, kab dźviery ŭ Jeŭropu dla ich zastavalisia adčynienymi», — zajaviŭ urad FRH u adkazie na piśmovy zapyt Partyi zialonych ab situacyi ŭ Biełarusi. Adkaz niamieckich uładaŭ byŭ apublikavany na sajcie bundestaha 8 vieraśnia.
Ułady FRH nazvali palityku Jeŭrasajuza «Uschodniaje partniorstva» «prydatnym instrumientam dla pieraadoleńnia izalacyi biełaruskaha hramadstva ŭnutry Jeŭropy, kab padtrymać doŭhaterminovuju metu raźvićcia jaho ŭpeŭnienaści i aryjentacyi na kaštoŭnaści ES».
U adkazie adznačajecca, što biełaruskija ŭłady kanstruktyŭna pracujuć u ramkach čatyroch tematyčnych płatform i biaruć udzieł u dyskusijach. Adnak pa pryčynie «surjoznych prablem u halinie vykanańnia pravoŭ čałavieka i viaršenstva zakona» Biełaruś zastajecca adzinaj krainaj Uschodniaha partniorstva, ź jakoj u ES jurydyčna nie aformleny dvuchbakovyja adnosiny.
Urad FRH bačyć cikavaść arhanizacyj hramadzianskaj supolnaści Biełarusi, u tym liku apazicyjnych, da pracy Forumu hramadzianskaj supolnaści palityki «Uschodniaje partniorstva» i jaje «aktyŭna padtrymlivaje».
Druhaja sustreča ŭ ramkach forumu projdzie 18–19 listapada ŭ Bierlinie. Niamieckija ŭłady spadziajucca, što Minsk nie budzie pieraškadžać udziełu ŭ joj pradstaŭnikoŭ hramadzianskaj supolnaści Biełarusi.
Razam z tym ułady FRH raskrytykavali vypadki admoŭ u biełaruskaj vizie pradstaŭnikam NDA Hiermanii, jakija supracoŭničajuć z apazicyjnymi strukturami ŭ Biełarusi, pakolki «palityčna matyvavanyja admovy nie adpaviadajuć duchu Uschodniaha partniorstva».
U adkazie ŭrada FRH padkreślivajecca, što struktury ES z pačatku hoda zrabili vialikuju kolkaść zajaŭ, jakija krytykujuć rost niehatyŭnych prajaŭ u halinie demakratyčnych kaštoŭnaściej i viaršenstva zakona.
Niamieckija ŭłady vykazali nadzieju na narmalizacyju adnosinaŭ pamiž Biełaruśsiu i ES i paŭnacennaje členstva krainy ŭ Jeŭrapiejskaj palitycy dobrasusiedstva i Uschodnim partniorstvie.
«Biełaruskaje kiraŭnictva ŭśviedamlaje, što ŭsimi pieravahami supracoŭnictva Biełaruś zmoža skarystać paśla važnych reform. Vosieńniu ES vierniecca da pytańnia adnosinaŭ ź Biełaruśsiu. FRH vystupić za zachavańnie dyjałohu pamiž ES i Biełaruśsiu na peŭnych umovach, a taksama mahčymaści šyrokaha supracoŭnictva, jakoje budzie prapanavana paśla vykanańnia peŭnych čakańniaŭ», — havorycca ŭ adkazie.
Kamientary