ABSIE nakiruje dvuch kryminalistaŭ dla rasśledavańnia pryčyn śmierci Aleha Biabienina

Arhanizacyja pa biaśpiecy i supracoŭnictvie ŭ Jeŭropie (ABSIE) stanoŭča adkazała na zvarot biełaruskich uładaŭ nakiravać u Minsk dvuch ekśpiertaŭ-kryminalistaŭ dla rasśledavańnia pryčyn śmierci žurnalista Aleha Biabienina, kiraŭnika apazicyjnaha internet-resursa «Chartyja'97».

Jak paviedamiŭ namieśnik kiraŭnika Ofisa ABSIE ŭ Minsku Žandos Asanaŭ, ciapier bakam nieabchodna abmierkavać techničnyja detali.

Jak raniej paviedamiŭ žurnalistam pres-sakratar MZS Biełarusi Andrej Savinych, zajava ad imia biełaruskaha boku ab hatoŭnaści zaprasić ekśpiertaŭ była zroblena 9 vieraśnia na pasiadžeńni pastajannaha savieta ABSIE ŭ Vienie.

«ABSIE — heta aŭtarytetnaja ahulnajeŭrapiejskaja placoŭka, dzie abmiarkoŭvajucca pytańni biaśpieki, čałaviečaha vymiareńnia, tamu mienavita hetaja arhanizacyja była vybrana miescam, dzie Biełaruś abjaviła pra svaju hatoŭnaść zaprasić ekśpiertaŭ. Takim čynam, siońnia lubaja kraina, jakaja ŭvachodzić u ABSIE, moža zajavić pra svaju hatoŭnaść nakiravać ekśpierta ŭ Biełaruś. Biełaruski bok nie maje namieru ŭstanaŭlivać niejkija ramki pa padbory nazvanych ekśpiertaŭ. Kryteryj moža być, napeŭna, tolki adzin — vysokija prafiesijnyja jakaści i vopyt kryminalista», — skazaŭ pres-sakratar.

Rašeńnie aficyjnaha Minska pryciahnuć ekśpiertaŭ-kryminalistaŭ z krain — členaŭ ABSIE dla rasśledavańnia pryčyn śmierci apazicyjnaha žurnalista pryvitaŭ Jeŭraparłamient. «Hety biesprecedentny krok biełaruskaha ŭrada demanstruje hatoŭnaść pravieści tradycyjnaje dla sučasnych krain prazrystaje i biesstarońniaje rasśledavańnie», — zajaviŭ kiraŭnik delehacyi Jeŭraparłamienta pa suviaziach ź Biełaruśsiu Jacek Pratasievič.

Cieła 36-hadovaha Aleha Biabienina było znojdziena ŭviečary 3 vieraśnia ŭ dačnym domie, raźmieščanym u Dziaržynskim rajonie. Ekśpiertyza ŭstanaviła, što pryčynaj śmierci stała aśfiksija ŭ vyniku zadušeńnia piatloj pry paviešańni. Pavodle źviestak ekśpiertaŭ, akramia stranhulacyjnaj barazny na šyi, inšych paškodžańniaŭ na ciele Biabienina nie było. U Hienprakuratury zajavili, što ŭ pieršuju čarhu razhladajecca viersija ab samahubstvie.

Siabry, svajaki i kalehi zahinułaha sumniavajucca ŭ tym, što žurnalist moh rasstacca z žyćciom dobraachvotna. Pavodle słoŭ jaho kaleh, u Biabienina nie było nijakich matyvaŭ dla samahubstva, a aficyjnyja dakumienty ab jaho śmierci ŭtrymlivajuć šerah supiarečnaściaŭ, jakija prymušajuć sumniavacca ŭ aficyjnaj viersii zdareńnia.

Mižnarodnyja arhanizacyi zaklikali ŭłady Biełarusi pravieści dakładnaje i niepraduziataje rasśledavańnie abstavinaŭ hibieli apazicyjnaha žurnalista.

• 0
• 0
• 0
• 0
• 0
• 0
• 0
• 0