«Hetaja pamyłka moža stać dla palityka Milinkieviča fatalnaj»

kaža pra źniaćcio im kandydatury jahony namieśnik ŭ Ruchu za Svabodu Viktar Karniajenka. U interviju partału Euramost.org jon zajaviŭ, što takoje rašeńnie stała dla jaho «mocnym rasčaravańniem».

Mnie ciažka mierkavać ab tym, nakolki ciažka dałosia takoje rašeńnie samomu Alaksandru Milinkieviču, ale ja liču sychod lidera ruchu «Za svabodu» z prezydenckaj vybarčaj dystancyi vielmi vialikaj pamyłkaj, jakaja, na žal, moža stać dla palityka Milinkieviča fatalnaj. Ja nie padtrymlivaju takoje jaho rašeńnie.

MEŭramost: Čamu vy ličycie heta pamyłkaj?

Karniajenka: Viedajecie, siońnia, jak mnie zdajecca, nichto, akramia Alaksandra Milinkieviča nia moža abjadnać u adnu kamandu patryjatyčnyja siły krainy. Tamu što ŭsie astatnija pretendenty adstojvajuć albo svaje vuzkapartyjnyja albo asabistyja ambicyjnyja zadačy. Heta vielmi dobra adčuvajecca, ludzi heta zaŭvažajuć. I tamu, na vialiki žal, na hetym patryjatyčnym flanhu nia budzie svajho kandydata na vybarach. Aktyŭnyja ludzi, viadoma, znojduć sabie niejkuju pracu. Ale heta budzie praca, jak i praca Alaksandra Milinkieviča, nie na lazie palityčnaha momantu, a dzieści ŭ baku. Na ŭzbočynie palityčnaha žyćcia. Što naŭrad ci nadaść ŭ perspektyvie vialiki patencyjał hetamu palityku.

Eŭramost: Vy vykazvali Milinkieviču svaju pazycyju?

Karniajenka: Biezumoŭna. Ja skažu, što mocna rasčaravany takim rašeńniem, choć heta asabista majo mierkavańnie. Mahu i pamylacca — čas (bližejšy hod) pakaža. Chacia razumieju, što dla pryniaćcia takoha rašeńnia isnavali i niejkija abjektyŭnyja pryčyny. Heta metanakiravanaje ckavańnie Milinkieviča na praciahu apošniaha hodu. Nierazumieńnie mnohimi palitykami vastryni momantu. Usio heta, viadoma, prysutničaje. Ale navat pry ŭsich hetych raskładach, na moj pohlad, lideru «Za Svabodu» treba było zastavacca flahmanam patryjatyčnaha ruchu.

Eŭramost: Kaho zaraz na vybarach budzie padtrymlivać Ruch za Svabodu?

Karniajenka: Rašeńnie było adno — padtrymać Alaksandra Milinkieviča. Viadoma, prymusić čałavieka niejkim partyjnym rašeńniem iści na vybary niemahčyma. Zaraz dumaju, što siabry ruchu razyducca pa roznych pretendentach i kandydatach. Što tyčycca mianie, to ja nia budu ŭdzielničać u kampanii nivodnaha z kandydataŭ, ale taksama nie zastanusia ŭ baku ad palityčnaha žyćcia. Choć, biezumoŭna, hetuju dziejnaść ciažka budzie nazvać aktyŭnaj. Ja maju daručeńnie Rady Ruchu razam z astatnimi apazycyjnymi strukturami pravodzić pracu pa vyłučeńni ŭ vybarčyja kamisii i ahulnamu aktyŭnamu nazirańniu. Kab spynić fakty falsyfikacyj. Kali spynić ich budzie niemahčyma, to zafiksavać, a vyniki dać i niezaležnym naziralnikam, i mižnarodnym. Pakolki paralelny padlik hałasoŭ u nas pravodzić nielha, to fakty mohuć być momantam mabilizacyi. Voś takija perspektyvy na bližejšuju budučyniu. Dalej zahadvać pakul nia maje sensu.

Eŭramost: Mahčyma, paśla zajavy Alaksandra Milinkieviča vašamu ruchu ŭžo pastupali niejkija prapanovy ad inšych pretendentaŭ?

Karniajenka: Da ruchu nichto aficyjna nie źviartaŭsia. Chacia viedaju, što prapanovy pastupajuć da pradstaŭnikoŭ ruchu. I na dastatkova vysokija pasady. Ale asabista ja ŭžo vykazaŭ svaju pazycyju. Nikoha, akramia Milinkieviča, kandydatam na hetych vybarach nia baču.

• 0
• 0
• 0
• 0
• 0
• 0
• 0
• 0